Mɔgɔ minw tɛ diinan na, an k’a kɛ kibaro diiman k’u dusu sɔrɔ

1. Saan tɛmɛninw na, yɛlɛmani juman lo kɛra jamana dɔw la?

SAAN waa caaman kɔnɔ, duniɲamɔgɔw fanba tun be diinan dɔ la. Nka saan tɛmɛninw na, yɛlɛmaniba dɔ kɛra. Mɔgɔ caaman tɛ diinan na tugun. Jamana dɔw la yɛrɛ, mɔgɔw fanba b’a fɔ k’olu tɛ diinan na.b—Mat. 24:12.

2. Mun na mɔgɔ caaman tɛ diinan na?

² Mun na mɔgɔ caaman b’a fɔ k’olu tɛ diinan na?c Ɲɛnagwɛkow lo ka di dɔw ye wala u be miiri u ka kunkow dɔrɔn lo la (Luka 8:14). Dɔw lanin tɛ Ala la tugun. Dɔ wɛrɛw lanin be Ala la, nka u b’a miiri ko diinan tɛ mɔgɔ mako ɲɛ bi, ko a ka kalanw bɛnnin tɛ ni lɔnnikow ye ani ko u tilennin tɛ. N’a sɔrɔ u teriw wala u ka kalanfaw y’a fɔ u ye ko bɛgɛnw lo yɛlɛma yɛlɛmana ka kɛ mɔgɔw ye. Wala u y’o mɛn arajo, telewisɔn n’a ɲɔgɔnnaw na. Nka, mɔgɔ si ma dalilu ɲumanw yira u la ko Ala be yen. Diinan kuntigiw fana y’a to diinanko nege bɔra dɔw la pewu! O diinan kuntigiw b’a ɲini ka kuntigiya kɛ tɔɔw kan ani u ye wasabaliw ye. Jamana dɔw la fana, faamanw ye bali sigi diinanko faan dɔw kan.

3. Barokun nin kuun ye mun lo ye?

³ Yezu ye cii di an ma ko: “Aw ye taga siyaw bɛɛ kɛ ne ka kalandenw ye.” (Mat. 28:19). Mɔgɔ minw tɛ diinan na, an be se k’olu dɛmɛ cogo di u ka Ala kanu ani u ka kɛ Krista ka kalandenw ye? An k’a lɔn ko mɔgɔ lamɔna yɔrɔ min na, o be se k’a to a tigi b’an lamɛn wala a t’an lamɛn. Ɲɛyirali fɛ, mɔgɔ minw lamɔna Erɔpu jamanaw na, olu ni Azi mara mɔgɔw tɛ kibaro diiman ta cogo kelen na. Mun na do? Sabu Erɔpu, mɔgɔ caaman be dɔ lɔn Bibulu koo la ani u y’a mɛn ko Ala lo ye fɛɛn bɛɛ dan. Nka Azi mara la, mɔgɔw fanba tɛ bɛrɛ lɔn wala u yɛrɛ tɛ foyi lɔn Bibulu koo la. N’a sɔrɔ u yɛrɛ lanin t’a la ko Danbaga be yen. An be mɔgɔ minw kunbɛn waajuli la, barokun nin kuun ye k’an dɛmɛ k’u dusukun sɔrɔ, u bɔyɔrɔ n’u ka lannako mana kɛ min o min ye.

KƐ NI MIIRIYA ƝUMAN YE MƆGƆW KOO LA

4. Mun na an ka ɲi ka kɛ ni miiriya ɲuman ye?

⁴ Kɛ ni miiriya ɲuman ye. Mɔgɔ minw tɛ diinan na, saan o saan u dɔw be kɛ Jehova Seerew ye. U caaman sɔɔn tun ka ɲi ka ban ani diinanw ka filankafoya lo tun ye diinanko nege bɔ u la. Nka, u dɔw tun tɛ ni tagamacogo ɲuman ye ani dɔ wɛrɛw ye delinanko juguw dabila. An ka la a la ko Jehova ka dɛmɛ barika la, ‘minw bɛɛ labɛnnin lo ka sɔn ɲɛnamaya banbali ma,’ an bena olu sɔrɔ.—Kɛw. 13:48, NW; 1 Tim. 2:3, 4.

5. Mun lo ka teli k’a to mɔgɔ be sɔn Masaya kibaro diiman na?

⁵ Koow kɛ nɛmɛnɛmɛ ani ɲumanya la. Tuma caaman, an be min fɔ, o lo t’a to mɔgɔw be sɔn kibaro diiman na, nka a fɔcogo lo b’a to u be sɔn a la. N’an b’an mako don u la sɔbɛ la, k’u minɛ ni ɲumanya ye ani ka koow kɛ nɛmɛnɛmɛ, o ka di u ye. An t’u waajibiya u ka sɔn an ta ma. Nka, an b’a ɲini k’u ka miiriya lɔn diinanko la ani fɛɛn min kama u be n’o miiriya ye. Ɲɛyirali fɛ, dɔw t’a fɛ ka baro kɛ diinankow la ni mɔgɔ dɔw ye u tɛ minw lɔn. Dɔw b’a miiri ko a bɛnnin tɛ ka mɔgɔ ɲininga a be min miiri Ala koo la. Dɔw fana be maloya mɔgɔw k’u ye u be Bibulu kalanna, sanko n’u b’o kɛra ni Jehova Seerew ye. A mana kɛ min o min ye, an b’a ɲini k’u dusukunnakow faamu.—2 Tim. 2:24.

6. Ciden Pol y’a janto mɔgɔw ka koow cogoya la cogo di? An be se k’a ladegi cogo di?

⁶ Dɔw t’a fɛ an k’a fɔ ko Bibulu, danfɛnw, Ala wala diinan. N’o lo, an be se ka ciden Pol ladegi ani ka baro kɛ n’u ye cogo wɛrɛ la. Pol basigira Ala ka Kuma kan ka hakili jagabɔ kɛ ni Yahutuw ye. Nka, a ye mun lo kɛ tuma min na a tun be kumana ni Grɛkiw ka lɔnnikɛlaw ye u ka kititigɛyɔrɔ la? A ma sin k’a fɔ ko a ka kumaw bɔra Ala ka Kuma kɔnɔ (Kɛw. 17:2, 3, 22-31). An be se ka Pol ladegi cogo di? N’i ye mɔgɔ dɔ kunbɛn min lanin tɛ Bibulu la, n’a sɔrɔ a ka fisa i kana a fɔ a ye ko i ka kumaw bɔra Bibulu lo kɔnɔ. A be se ka kɛ fana ko dɔ t’a fɛ u k’a ye a be Bibulu kalanna n’i ye. N’o lo, i be se ka vɛrisew yira a la i ka telefɔni wala tablɛti kan walisa mɔgɔw kana a lɔn ko aw be Bibulu lo kalanna.

7. Pol ka koo lakalila 1 Korɛntikaw 9:20-23 kɔnɔ. An be se k’a ladegi cogo di?

⁷ U faamu ani u lamɛn. An be minw kunbɛn, an ka ɲi k’a ɲini k’u ka miiriya lɔn ani fɛɛn min kama u be n’o miiriya ye (Talenw 20:5). An ka Pol ka koo lajɛ tugun. A lamɔna Yahutuw fɛ. O kama, minw tɛ Yahutuw ye, tuma min na a tun b’u waajura, a tun ka ɲi k’a ka waajuli kɛcogo yɛlɛma ka kɛɲɛ u ka koow cogoya ma. A tun ka ɲi k’o kɛ sabu o mɔgɔw tun tɛ bɛrɛ lɔn wala u tun tɛ foyi lɔn Jehova n’a ka Kuma koo la. Walisa ka kiinmɔgɔw miiricogo n’u dusukunnakow faamu, n’a sɔrɔ an ka ɲi ka sɛgɛsɛgɛri kɛ an ka gafew kɔnɔ wala ka baro kɛ ni kerecɛn kolɔnbaga dɔ ye o koo la.—1 Korɛntikaw 9:20-23 kalan.

8. An be se ka baro daminɛ ni mɔgɔw ye Bibulu kan cogo di?

⁸ An ka laɲinita ye ka mɔgɔ sɔbɛw ɲini (Mat. 10:11). Walisa k’o kɛ, an ka ɲi ka mɔgɔw ɲininga u ka miiriya la ani k’u lamɛn ka ɲɛ. Angletɛri jamana na, balimacɛ dɔ be mɔgɔw ɲininga u ka miiriya la koo nunu na: hɛɛrɛ sɔrɔcogo denbaya kɔnɔ, deenw lamɔcogo wala tilenbaliyakow muɲucogo. A b’u lamɛn koɲuman ani a b’a fɔ ko: “I be mun miiri ladili nin koo la min sɛbɛra a saan 2 000 ɲɔgɔn ye nin ye?” O kɔ, a be vɛrise bɛnnin dɔw yira u la a ka telefɔni kan. Nka, a t’a fɔ u ye ko a be Bibulu lo kalanna.

A ƝINI KA MƆGƆW DUSUKUN SƆRƆ

9. Mɔgɔ minw t’a fɛ ka baro kɛ Ala koo la, an be se k’olu dɛmɛ cogo di?

⁹ Dɔw t’a fɛ ka baro kɛ Ala koo la. An be se k’olu dusukun sɔrɔ n’an be kuma fɛɛn wɛrɛ koo la min ɲɛsinna u ma. Duniɲa kɔnɔfɛnw cogoya be mɔgɔ caaman kabakoya. O la, i be se k’a fɔ ko: “N’a sɔrɔ i b’a lɔn ko lɔnnikɛlaw sera ka fɛɛn dɔw dilan sabu u ye duniɲa kɔnɔfɛn dɔw ladegi. Ɲɛyirali fɛ, u ye tulo cogoya filɛ ka mikro dilan ani ka ɲɛden filɛ ka fototalan dilan. Nka ele fɛ, jɔn lo ye tulo ni ɲɛden dilan?” A tigi lamɛn koɲuman. O kɔ, i be se k’a fɔ ko: “Lɔnnikɛla dɔ ye koo dɔ sɛbɛ min ye ne kabakoya. A ko: ‘Min ye tulo dibaga ye, ale te mɛnni kɛ wa? Ale min ye ɲaa di, a te yeli kɛ wa? . . . Ale min ye adamaden kalan.’ Lɔnnikɛla dɔw sɔnna o ma ani u lara a la ko Danbaga be yen.” (Zab. 94:9, 10). O kɔ, i be se ka jw.org^® ka videwo dɔ yira a la. A filɛ yɔrɔ nin na: “Points de vue sur l’origine de la vie.” (Yɔrɔ nin lajɛ faransɛkan na: LA BIBLE ET VOUS > LA BIBLE ET LA SCIENCE.) Wala, i be se ka sɛbɛ nunu dɔ di a ma: La vie a-t-elle été créée? wala Cinq questions à se poser sur l’origine de la vie.

10. Mɔgɔ min t’a fɛ ka kuma Ala koo la, an be se ka baro daminɛ n’o tigi ye cogo wɛrɛ juman na?

¹⁰ Mɔgɔw fanba b’a fɛ ka siniɲasigi ɲuman sɔrɔ. Nka, u caaman sirannin lo ko dugukolo bena halaki wala ko mɔgɔ tɛna se ka sigi a kan. Kɔrɔsibaga tagamakɛla dɔ be Nɔrvɛzi. Ale ko minw t’a fɛ ka kuma Ala koo la, a ka di u ye ka kuma duniɲa cogoya koo la. Foli kɔ, a b’a fɔ ko: “Ele fɛ, adamadenw be se ka siniɲasigi ɲuman sɔrɔ cogo di? Yala politiki mɔgɔw, lɔnnikɛlaw wala mɔgɔ wɛrɛ lo bena se k’o kɛ wa?” A be lamɛnni kɛ koɲuman, o kɔ, vɛrise minw be kuma siniɲasigi ɲuman koo la, a b’u dɔ kalan wala a b’a kofɔ. Dɔw be kabakoya k’a ye ko Bibulu b’a fɔ ko dugukolo tɛna halaki ani ko mɔgɔ ɲumanw bena to a kan fɔɔ abada.—Zab. 37:29; Waaj. 1:4.

11. Mun na an man ɲi k’a ɲini ka baro daminɛ ni mɔgɔw ye cogo kelen na? Ka kɛɲɛ ni Ɔrɔmukaw 1:14-16 ye, an be se ka ciden Pol ladegi cogo di?

¹¹ An man ɲi ka baro daminɛ ni mɔgɔw ye cogo kelen na waajuli la sabu mɔgɔw tɛ kelen ye. Min ka di dɔ ye, o be se ka dɔ wɛrɛ kɔnɔ gwan. Dɔw b’a fɛ ka baro kɛ Ala ani Bibulu koo la k’a sɔrɔ dɔ wɛrɛw t’a fɛ an ka sin ka baro kɛ o kan. A mana kɛ min o min ye, an ka ɲi ka tɛmɛ sababu bɛɛ fɛ ka kibaro diiman fɔ mɔgɔ sifa bɛɛ ye (Ɔrɔmukaw 1:14-16 kalan). An ka ɲi k’a to an hakili la ko tilenninya ka di minw ye, Jehova lo b’a kɛ tiɲɛn kisɛw be falen ani ka bonya olu dusu la.—1 Kor. 3:6, 7.

KIBARO DIIMAN FƆ AZI MARA MƆGƆW YE

12. Azi mara mɔgɔ minw ma deli ka wagati ta ka miiri k’a filɛ ni Danbaga be yen, an be se k’olu dɛmɛ cogo di?

¹² Duniɲa kuru bɛɛ kɔnɔ, weleweledala caaman be Azi mara mɔgɔ dɔw kunbɛn. U be dɔw kunbɛn fana minw ka jamana faamanw ye bali sigi diinanko faan dɔw kan. Jamana caaman na Azi mara la, mɔgɔw fanba ma deli ka wagati ta ka miiri k’a filɛ ni Danbaga be yen wala n’a tɛ yen. U dɔw b’a fɛ k’o lɔn. O kama, u be sin ka sɔn bibulukalan na. Nka a daminɛ na, dɔw be sigasiga sabu u tɛ dɔ lɔn Bibulu koo la. An be se k’olu dɛmɛ cogo di? Balima kolɔnbaga dɔw be baro daminɛ n’o mɔgɔw ye teriya la ani u b’u janto u la. Wagati bɛnnin na, u b’a fɔ o mɔgɔw ye cogo min na olu ka ɲɛnamaya fisayara tuma min na u y’a daminɛ ka Bibulu ka sariyakolo dɔ labato. U y’a kɔrɔsi ko n’u be koow kɛ o cogo la, o mɔgɔw b’u lamɛn.

13. Mun lo be se k’a to mɔgɔw b’u mako don Bibulu la? (Jaa lajɛ ɲɛɛ fɔlɔ kan.)

¹³ Ladili ɲuman minw be sɔrɔ Bibulu kɔnɔ, o lo ka di dɔw ye a daminɛ na (Waaj. 7:12). Niyɔriki dugu la, mɔgɔ minw be sinuwakan fɔ, balimamuso dɔ be to k’olu waaju. A ko: “N’ b’a ɲini ka n’ mako don u la ani k’u lamɛn. Ni n’ y’a mɛn k’u dɔ nana kura ye, n’ b’a ɲininga ko: ‘I b’a kɛra di ka deli yan mɔgɔw la? I ye baara sɔrɔ wa? Yala mɔgɔw b’i minɛna ka ɲɛ wa?’ ” Tuma dɔw la, o be sababu di balimamuso ma ka baro kɛ Bibulu koo la. N’a bɛnnin lo, a b’a fɔ ko: “Ele fɛ, mun lo be se ka mɔgɔ dɛmɛ kosɔbɛ ka jɛnɲɔgɔnya ɲuman kɛ ni tɔɔw ye? N’ be se ka Bibulu ka ntalen dɔ yira i la wa? A fɔra yen ko: ‘Ka kɛlɛ daminɛ ani ka dalan kari, o ye kelen ye. Sanni sɔsɔli ka gwan, i k’a dabila.’ Ele fɛ, o ladili be se k’an dɛmɛ ka bɛn ni tɔɔw ye wa?” (Talenw 17:14). O barow ɲɔgɔn be se k’an dɛmɛ k’a lɔn minw b’a fɛ an ka segi ka na bɔ u ye.

14. Minw b’a fɔ k’olu lanin tɛ Ala la, balimacɛ dɔ be olu dɛmɛ cogo di?

¹⁴ Minw k’olu lanin tɛ Ala la, an be se ka mun lo fɔ olu ye? Azi mara kɔrɔn fan fɛ, balimacɛ dɔ b’o mɔgɔw waaju kabi wagatijan. A ko: “Yan, ni mɔgɔ ko ale lanin tɛ Ala la, o kɔrɔ ko mɔgɔw fanba be ala minw bato, a lanin tɛ olu lo la. O la, n’ b’a fɔ a ye ko tiɲɛn lo, mɔgɔw be fɛɛn minw bato, adamadenw lo y’u fanba dilan ani ala yɛrɛ yɛrɛw tɛ. N’ ka teli ka Zeremi 16:20 kalan ko: ‘Mɔgɔ tɛ se ka batofɛn dilan a yɛrɛ ye. A be min dilan, batofɛn halala tɛ.’ O kɔ, n’ be ɲiningali kɛ ko: ‘Mɔgɔ be se ka tiɲɛn Ala lɔn cogo di ka bɔ adamadenw ka batofɛn dilanniw na?’ N’ b’a tigi lamɛn koɲuman. O kɔ, n’ be Ezayi 41:23 kalan: ‘Koo minw be nana, aw ka olu fɔ an ye, o la, an ben’a lɔn ko aw ye batofɛnw ye sɔbɛ la.’ O vɛrise kalannin kɔ, Jehova y’a kɛ kiraya kuma minw dafara galen, u dɔ kofɔ.”

15. Azi mara kɔrɔn fan fɛ, balimacɛ dɔ ka koo b’an dɛmɛ ka mun lo faamu?

¹⁵ Azi mara kɔrɔn fan fɛ, minw b’a fɔ k’olu lanin tɛ Ala la, ni balimacɛ dɔ segira ka taga bɔ olu ye, a be min kɛ, a y’o ɲɛfɔ. A ko: “N’ be kuma fɛɛn nunu dɔ koo la: Bibulu ka hakilitigiya kumaw, Bibulu ka kiraya kuma minw dafara wala dugukolo koo la. O kɔ, n’ b’u dɛmɛ k’a faamu o fɛɛnw bɛɛ b’a yira cogo min na ko Danbaga hakilitigi dɔ be yen. Ni mɔgɔ dɔ y’a daminɛ k’a miiri ko n’a sɔrɔ Ala be yen, n’ b’a yira a la Bibulu be min fɔ Jehova koo la.”

16. Ka kɛɲɛ ni Eburuw 11:6 ye, mun na Bibulu kalandenw ka ɲi ka la Ala ani Bibulu la? An be se k’u dɛmɛ cogo di o la?

¹⁶ Mɔgɔ minw tɛ diinan na, n’an be bibulukalan kɛra n’olu ye, an ka ɲi ka to k’u dɛmɛ u ka la Ala ani Bibulu la kosɔbɛ (Eburuw 11:6 kalan). N’a sɔrɔ an ka ɲi ka segi tiɲɛn kalan dɔw kan siɲɛ caaman. Tuma o tuma n’an be kalan kɛra n’u ye, an ka ɲi k’a yira u la ka gwɛ ko Bibulu ye Ala ka Kuma lo ye. O kama, n’a sɔrɔ an ka ɲi ka koo nunu dɔ lajɛ n’u ye dɔɔni: Bibulu ka kiraya kuma minw dafara ka ban, Bibulu be tiɲɛn kuma minw fɔ lɔnnikow ni tarikikow la ani Bibulu ka hakilitigiya kumaw.

17. N’an be mɔgɔw kanu, o be se ka nɔɔ juman to u kan?

¹⁷ Mɔgɔw be diinan na wo, u tɛ diinan na wo, an be se k’u dɛmɛ ka kɛ Krista ka kalandenw ye, n’an b’a yira ko an b’u kanu (1 Kor. 13:1). N’an b’u kalanna, an ka laɲinita ye k’a yira u la ko Ala b’u kanu ani ko a b’a fɛ u k’ale kanu fana. Dɔw t’u mako don bɛrɛbɛrɛ diinanko la wala u mako yɛrɛ t’a la. Saan o saan, olu waa caaman be batize sabu u sera ka Ala kanu. O kama, to ka koow filɛ ni ɲɛɛ ɲuman ye, i mako don mɔgɔ sugu bɛɛ la ani u kanu. U lamɛn ani a ɲini k’u faamu. I ka ɲɛyirali fɛ, u kalan u ka kɛ Krista ka kalandenw ye.