An ka sɔn k’an yɛrɛ di baara ɲuman bɛɛ kama
1 Zurunaliba dɔ ye nin fɔ Jehova Seerew koo la: “A bena gwɛlɛya ka diinan jɛkulu wɛrɛ sɔrɔ, min ka diinandenw be baara kɛ ni kisɛya ye i n’a fɔ Jehova seerew.” Mun na Jehova Seerew be sɔn k’u yɛrɛw di ka baara kɛ ten ni kisɛya ye?
2 A kuun dɔ bɔra nin na: Kɔrɔtɔ hakili ye u ka miiriya fa. Yesu tun y’a lɔn ko wagati fitinin dɔrɔn lo tun b’a bolo k’a ka baara dafa dugukolo kan ( Yuh. 9:4). Bi bi nin na, Ala dencɛ nɔɔrɔman be kuntigiya kɛra a juguw cɛ. Jehova Seerew y’a faamu ko wagati man ca u bolo k’u ka baara dafa. O de y’a to, u be sɔn k’u yɛrɛw di baara senuman kama (Zab. 110:1-3). Komi u mako be baarakɛla caaman na ka siman ladon, u tɛ se ka timinangoya (Mat. 9:37, 38). O kama, o b’u jija ka Yesu sennɔ ta, ale min ye yɛrɛsaraka hakili ni timinandiya yira cogo dafalen na.—Yuh. 5:17.
3 Koo wɛrɛ b’a to Jehova Seerew be baara kɛ n’u dusukun bɛɛ ye i n’a fɔ u b’a kɛra Jehova ye: Duniɲa kuru bɛɛ kɔnɔ, u ka ɔriganisasiyɔn be daan na ni jɛkulu tɔɔw bɛɛ ye. Duniɲa kɔnɔ, diinan jɛkuluw delinanko ye ka wagati ni jijali fitininman dɔrɔn waajibiya u ka diinandenw ma. U ka lannakow tɛ nɔɔ bɛrɛ, wala nɔɔ foyi to u ka loon o loon ɲɛnamaya kan, u ka laɲinitaw kan, wala u be sigiɲɔgɔnya min kɛ ni mɔgɔ wɛrɛw ye. Komi lanaya lakika ŋaniya t’u la, u b’a ɲini u ɲɛminɛbagaw fɛ u ka ‘kuma nugulenw dama fɔ u ye’, u k’a fɔ ko olu be jijali fitininman minw kɛ, o be labɔri kɛ (Esayi 30:10). U ka diinan kuntigiw waajibiyalen be ka ‘tulow diyanyekow fɔ’ u ye. O cogo la u be timinangoya ni saliya hakili don u la.—2 Tim. 4:3.
4 Nin be daan na ni Jehova ka mɔgɔw ye dɛ! An ka batoli koow bɛɛ be kɛ ni jijali, ni baara ye. Loon o loon, ani an ka koo kɛtaw bɛɛ la, an b’an ka lannakow sira tagama. Siga t’a la, tiɲɛn be ɲagali lase an ma. Nka a fana b’a waajibiya an ma an k’a sira tagama “gwɛlɛya caaman cɛma” (a filɛ 1 Tesalonikekaw 2:2, ABBF, 1999). Ka loon o loon ka kunkanbaaraw dafa, o dama be mɔgɔ caaman ka wagati ta. O bɛɛ n’a ta, an t’a to o koow k’an bali ka Masaya ka tɔnɔw bila yɔrɔ fɔlɔ la.—Mat. 6:33.
5 An be min kɛra Jehova ka baara la, nafa b’a la ani teliya koo lo. O kama, o b’an lasu ka ‘wagati kunmabɔ.’ Sanni ka koo wɛrɛ kɛ o wagati kɔnɔ, an b’a ta ka hakilimaya koow kɛ, minw nafa ka boon ka tɛmɛ (Efes. 5:16). An b’a lɔn ko n’an be kantigiya kɛ ani n’an b’an yɛrɛ di ni diyanye ye, o ka di Jehova ye. O be dusu don an na ka kisɛya tuma o tuma a ka baara la. An be duga caaman sɔrɔ sisan. Ani, ɲɛnamaya nata lahidu tara an ye. O kama, an b’an cɛsiri ka to ka “baara kɛ ka sɛgɛn ani ka bondori kɛ” Masaya ka tɔnɔw kama.—1 Tim. 4:10, ABBF, 1999.
6 Kantigiya ni yɛrɛsaraka hakili: Bi, mɔgɔ caaman be bololafɛnw n’u yɛrɛw ka tɔnɔ bila koo bɛɛ ɲɛ. U b’a jate ko a dagalen be ka domuni ni minni ni fani lo ɲini fɔlɔ (Mat. 6:31). Dunkafa t’u wasa. U ka laɲinita ye ka ɲɛnamaya diya bɔ a ɲɛɛ ma, ani ka ‘fɛɛn caaman mara saan caaman ɲɛ, walisa ka lafiya, ka domuni kɛ, ka minni kɛ, ani ka ɲɛnagwɛ.’ (Luka 12:19). N’u ka diinan y’a ɲini u fɛ u ka jijali dɔ kɛ, Eglisi tagamabagaw b’a jate k’u ka diinan donna u gasi la. N’a fɔra u ye k’u ka boliboli dabila bololafɛnw nɔfɛ, wala u k’a nɔgɔya yɛrɛ, wala u ka diyanye koow dɔw dabila, o miiriya yɛrɛ ka gwo u ye. Komi u be miiri u yɛrɛ dɔrɔn koo la, u b’a jate ko yɛrɛsaraka hakili tɛ tiɲɛnko ye, ko a tɛ se ka kɛ.
7 An be o koow filɛ daan na. Ala ka Kuma ye an ka miiriliw kɔrɔta. O cogo la, sanni an ka miiri i ko hadamadenw, Ala ka miiriliw lo b’an fɛ (Esayi 55:8, 9). An ka ɲɛnamaya kɔnɔ, an ka laɲinitaw be tɛmɛ farisogo ka fɛtaw kan. Duniɲa kuru bɛɛ kɔnɔ, koo fila lo kɔrɔtalen be ka tɛmɛ fɛɛn bɛɛ kan: Ka joo di Jehova ka Masabaya ma, ani k’a tɔgɔ saniya. O koow kuntaga ka boon haali, fɔɔ “Siyaw bɛɛ be Matigi ɲɛ na i ko fuu.” (Esayi 40:17). K’a ɲini k’i ka ɲɛnamaya kɛ n’i t’i janto Jehova ka sago la, o ka kan ka filɛ i ko hakilintanya.—1 Kɔr. 3:19.
8 Tiɲɛn lo, an mako be fɛɛn dɔw la walisa ka dɛmɛ don Masaya baara la. Dɔ wɛrɛw fana be se k’an nafa. Nka, an b’a faamu k’o fɛɛnw tɛ jate i ko “koo fisamanw.” (Filip. 1:10, NW ). An be sɔn 1 Timote 6:8 ka miirili la: ka taga bololafɛnw ɲinini fan fɛ, an b’an ka boliboli nɔgɔya, ani an b’an jija k’an dusukun sinsin ‘fɛɛn yebaliw kan, minw ye badaa fɛɛnw ye.’—2 Kɔr. 4:18.
9 An mana a to Ala ka miiriliw bonyana an na, dɔ be bɔ an ka haminankow la ka taga bololafɛnw fan fɛ. Jehova ye fɛɛn dɔw kɛ an ye ka tɛmɛ. A fana ye lahidu cɛɲumanbaw ta an ye sini kama. N’an be miiri o bɛɛ la, a mana saraka o saraka ɲini an fɛ, an be sɔn k’o kɛ (Marka 10:29, 30). An ka ɲɛnamaya yɛrɛ ye ale ta ye. Ni ale ka hinɛ n’a ka kanuya tun tɛ, an tun tɛna ɲɛnamaya diya bɔ sisan janko ka siniɲasigi sɔrɔ. An b’a jate ko waajibi lo an fɛ k’an yɛrɛ di a ma, sabu an be fɛɛn o fɛɛn kɛ a ka baara la, ‘an ye an ka ninyɔrɔ baara dama de kɛ.’ (Luka 17:10). O mana a ɲini an fɛ ko an ka fɛɛn o fɛɛn segi Jehova ma, an b’o kɛ ni diyanye ye. An b’a lɔn ko an bena “suman caaman tigɛ” o la.—2 Kɔr. 9:6, 7.
10 Minw b’u yɛrɛw di ka baara kɛ, an mako b’olu la sisan: Kabini a daminɛ tuma, kerecɛn kɔngeregasiyɔn y’a seen don baaraba kɛli la. Seereya tun ka kan ka kɛ ka dafa sanni Jerusalɛm ka ben saan 70 an ka wagati la. O wagati nin kɔnɔ, Yesu ka kalandenw y’u ka “wagati bɛɛ ta ka waajuli kɛ.” (Kew. 18:5). Komi baara ye ɲɛtaga sɔrɔ joona, waajibi tun lo ka waajulikɛlaw ni kɔrɔsibaga setigi wɛrɛw dege baara la, ani k’olu bɛɛ ka dɛmɛ doncogo labɛn. Kɔngeregasiyɔn mako tun be cɛɛ kolɔnbagaw la, minw delila ka ɲɛsin faamanw ma. A mako fana tun be cɛɛ setigiw la, minw tun bena baara nin kɔrɔsi: ka bololafɛnw lajɛn, ani k’u tilantilan (Kew. 6:1-6; Efes. 4:11). Hali ni mɔgɔ damanin tɔgɔ bɔra u ka baara la, u caamanba tɔgɔ tora dogo la. Nka u bɛɛ ‘y’u jija sɔbɛ la’ ka jɛn ka baara kɛta dafa n’u dusu bɛɛ ye.—Luka 13:24.
11 Saan kɛmɛkulu caaman minw tugura o wagati kɔ, waajibi tun tɛ k’o baaraba ɲɔgɔn kɛ duniɲa kuru bɛɛ kɔnɔ. Nka tuma min na Yesu y’a ka Masaya fanga ta saan 1914 la, Masaya baara ye barika sɔrɔ kokura. A daminɛ na, caaman tun m’a lɔn ko makoyaba bena kɛ baarakɛla caaman na Masaya ka koow kama: fɔɔ mɔgɔ miliyɔn caaman dugukolo yɔrɔ bɛɛ la.
12 Bi, ɔriganisasiyɔn ye baara kɛta caaman dabɔ. A ka sɔrɔ bɛɛ be donna o musakaw la. Masaya baara be ɲɛtaga sɔrɔla fɔɔ yɔrɔ jan. An be kɔrɔtɔ wagati lo la. O b’an ɲɔndi k’an jija, ani k’an seko n’an ka bololafɛnw bɛɛ ta ka baara kɛta dafa. Nin koow sigicogoya juguman laban be surunya kosɔbɛ. O kama, an b’a lɔn ko baara kɛta bena caya an bolo. Minw y’u yɛrɛkun di Jehova ma, welekan lasera u bɛɛ ma u ka sɔn k’u yɛrɛ di ka siman tigɛ baara nin kɛ, kɔrɔtɔ be min na.
13 Mun lo ka kan ka kɛ? Tiɲɛn na, an be se k’a fɔ ko ‘baara kɛta ka ca Matigi ka baara la’ (1 Kɔr. 15:58). Yɔrɔ caaman na, siman kɔgɔra, nka a tigɛbagaw ka dɔgɔ. A ɲininen be an fɛ an k’an ninyɔrɔ kɛ: Ka seereya kɛ ni timinandiya ye an ka kiinw kɔnɔ. Nka o yɔrɔw dama tɛ. An ka kan ka see sɔrɔ gwɛlɛyaw kan walisa ka taga dɛmɛ don yɔrɔ wɛrɛ, makoya be yen yɔrɔ minw na.
14 Duniɲa yɔrɔ bɛɛ kɔnɔ, Seerew b’u yɛrɛ di gwansan kama ka baara sifa caaman kɛ i n’a fɔ: ka batoli kɛyɔrɔw lɔ, ka baara kɛ lajɛnbaw wagati la, ka dɛmɛ lase mɔgɔw ma balawow tuma na, ka Masaya Boonw saniya tuma o tuma. Nin ka kan ni tandoli ye dɛ! Ka ɲɛsin Masaya Boon saniya koo ma, an k’an hakili to a la ko lajɛn kelen kelen bannen kɔ, a kɔrɔtalen be ka boon saniya, ani k’a kɔnɔna fɛɛnw ladon ka ɲɛ ka sɔrɔ ka taga. Baara dɔw be se ka jate i ko koo misɛnmanw lo. Nka mɔgɔ min b’o kɛ ka dafa, a tigi b’a yira ko a ye Yesu ka kumaw faamuya, minw be sɔrɔ Luka 16:10 la ko: “Min ye dannamɔgɔ ye koo fitininw koo la, o ye dannamɔgɔ ye kobaw fana koo la. Min ye tilenbali ye koo fitininw koo la, o ye tilenbali ye kobaw fana koo la.” A.B.U. 19987.
◼ An ka dɛmɛ don kɔngeregasiyɔn ka koow la: Tiɲɛn lo, koow be kɛ kɔngeregasiyɔn kelen kelen kɔnɔ i ko ɔriganisasiyɔn kuturu tilan yɔrɔ dɔ. “Jɔncɛ kantigiman hakiliman” be cikanw lase a ma. Nka weleweledala hakɛ dɔ lo be kɛ kɔngeregasiyɔn ye (Mat. 24:45). Seere kelen kelen b’a fɛ ka min kɛ, ani a be se ka min kɛ, kɔngeregasiyɔn ka walew fangaba be bɔ o lo la. O b’a yira ko a kɔrɔtalen be an ka kibaro duman waajuli kɛ an ka kɔngeregasiyɔn ka kiinw kɔnɔ. An fana ka mɔgɔw kɛ kalandenw kuraw ye, ani ka fanga don u la hakilimaya ta fan fɛ. An bɛɛ be se ka dɔ kɛ o baara la. An fana be se k’an tɔgɔla laɲinitaw latigɛ: kelenna kalan, k’an daa don kosɔbɛ lajɛnw koo la, ka dɛmɛ lase mɔgɔ wɛrɛw ma kɔngeregasiyɔn kɔnɔ. Baara ninw bɛɛ be sababu ɲuman di an ma k’a yira ko ŋaniya ɲuman b’an na.
◼ Ka ɲɛmɔgɔya ta i ko kɔrɔsibaga: Jehova ye kɔngeregasiyɔn kɔrɔsili kalifa diinan mɔgɔkɔrɔw ma (Kew. 20:28). U ye cɛɛw ye, minw y’a ɲini ka koo dɔw dafa walisa k’o nɛɛma sɔrɔ (1 Tim. 3:1). See be balimacɛ kelen kelen bɛɛ ye ka koo dɔw dafa walisa ka kunkanbaarabaw kɛ. Balima caaman be bonyana hakilimaya ta fan fɛ. U mako b’a la ka to ka bonya ka taga, ani ka sɔn ko kɔngeregasiyɔn ka diinan mɔgɔ kɔrɔw b’u ɲɛminɛ ni kanuya ye. U ka kan ka timinandiya Bibulu ni gafew kalan kɛli la. U be se k’u ka ŋaniya ɲuman yira nin cogo la: Hakili senu ye diinan mɔgɔ kɔrɔw minw sigi, u ka kan ka kolo olu ye, ani k’u ka lanaya ladege. U fana mako b’a la ka jogow sɛnɛ, minw ɲininen be kɔrɔsibagaw fɛ.—Heb. 13:7, 17.
◼ An ka kudayi cidenyabaara ta: Kɔngeregasiyɔn sigi kuun fɔlɔ ye ka kibaro duman waajuli kɛ (Mat. 24:14). Mɔgɔ kisɛmanw mana dɔ fara u ka jijali kan ka kɛ piyɔniye ye, o ye duga ye dɛ! Tuma caaman na, u ka kan ka yɛlɛmani dɔw don u ka ɲɛnamaya kɛcogo kɔnɔ. N’u b’a fɛ ka timinandiya o dan na baara kɛli la, u ka kan ka to ka yɛlɛmaniw don u ka ɲɛnamaya kɔnɔ. Koo dɔw be se ka kɛ farifaga sababu ye wagati kukurunnin kɔnɔ. Nka minw b’u ka nɛɛma fɛ sɔbɛ la, ani u tɛ baara dabila saan kelen wala saan fila kɔ, olu be se ka la a la ko u bena Jehova ka duga caaman sɔrɔ. Kanuya be diinan mɔgɔkɔrɔ minw na, ani kerecɛn kɔgɔnen wɛrɛw be se ka dɔ kɛ walisa piyɔniyew ka baara ka ɲɛ. U ka kan k’u jija kumaw ni kɛwalew fɛ. Kamalenw ni sunguru dɔw ka kalan mana ban, u be sin ka piyɔniye baara ta. Nin ye miirili ɲuman ye dɛ! Baliku dɔw fana b’o ɲɔgɔn lo kɛ. U ka baloɲini kunkanbaaraw mana nɔgɔya, u b’u sendon kudayi piyɔniye baara la. Kerecɛn min y’a yɛrɛkun di, ani a be bolo di Jehova ma ka siman tigɛ baara teliya, o tigi be wasaliba sɔrɔ dɛ!—Esayi 60:22.
◼ An k’an sendon lajɛn yɔrɔw lɔli n’u ladon koo la: Tiɲɛn na, Masaya Boonw ni lajɛnba boon ɲuman kɛmɛ caaman lo lɔra. Kabako lo, sabu, an balimacɛw n’an balimamusow lo ye baara nin fanba kɛ. U sɔnna k’u ka wagati n’u see di (1 Tilew Kib. 28:21). Mɔgɔ waa caaman b’u yɛrɛ di ni diyanye ye walisa k’o boonw ladon. Baara o baara mana kalifa u ma, u b’a kɛ (2 Tilew Kib. 34:8). Komi baara nin ye cidenyabaara senuman faan dɔ ye, a kɛbagaw b’u yɛrɛ di ni diyanye ye. U tɛ sara ɲini a la i ko u t’a kɛ tuma min na u be taga waajuli kɛ soo ni soo, u be foroba kalan kɛ kɔngeregasiyɔn kɔnɔ, u be dɛmɛ don lajɛnbaw ka baaraw la. O mɔgɔw b’a bɔ u yɛrɛw la gwansan ka baara labɛn batoli kɛyɔrɔw kama. U fana b’u sendon baara la k’o boonw lɔ Jehova tandoli kama. U be dɛmɛ don ni dusu diya ye walisa ka sariya sɛbɛw dafa, ka wari jateminɛ kɛ, ka sɔsɔli kɛ fɛɛnw sɔngɔw kan, ani ka minanw hakɛ jate minɛ. Jehova sagokɛla kantigiman ninw tɛ dɔ fara kɔngeregasiyɔnw ka musakaw kan. U be baara min kɛ, u t’a ɲini cogo si la ka tɔnɔ dɔ sɔrɔ o la bololafɛn ta fan fɛ. U ka hakilidiya n’u ka sɔrɔ bɛɛ dira Jehova ma (a filɛ An ka Masaya Cidenyabaara kɔnɔ. Saan 1992, feburukalo ta, ɲɛɛ 4nan , dakun 10nan.) O baara tɛ ɲɛ ni mɔgɔw ma sɔrɔ, minw be baara kɛ ni timinandiya ye. U be koow kɛ ni “dusukun bɛɛ ye, i n’a fɔ [u] b’a kɛ Matigi ye.”—Kolos. 3:23.
15 O tuma, mun lo b’a to Jehova sagokɛlaw ka yɛrɛsaraka hakili ɲɔgɔn tɛ yen? O ye sɔnni hakili de ye. U b’u tɛgɛ labila ka sɔnni min kɛ, a tɛ daan wari ni bololafɛn dama ma: u be u yɛrɛ di ni “dusukun ɲuman” ye (Zab. 110:3). K’i yɛrɛkun di Jehova ma, o kɔrɔ yɛrɛ yɛrɛ lo ye o de ye. Sara kabakoman b’an fɛ. An be “duba” caaman sɔrɔ, ani an be “suman caaman tigɛ”, katugu an be min kɛ, o ka di mɔgɔ wɛrɛw ye ani u b’a yira an na (Kew. 20:35; 2 Kɔr. 9:6; Luka 6:38). An ka ɲumankɛlaba ye an sankolola Faa, Jehova, ye. “Min be nili kɛ ni diyanye ye”, o tigi koo ka di Jehova ye (2 Kɔr. 9:7). A bena o ɲɔgɔn kɛmɛ sara an ye, a kɛtɔ ka duga banbaliw di an ma (Mal. 3:10; Rom. 6:23). O kama, nɛɛma baara mana bila an seen kɔrɔ Jehova ka baara la, yala i b’i yɛrɛ di ni diyanye ye wa? Yala i b’a jaabi Esayi cogo la, min ko: “Ne, i ka ne ci.”—Esayi 6:8.