An ka ɔridinatɛri koo filɛ k’a dama kɛɲɛ

¹ Ciden Pol ye kerecɛn fɔlɔw jija u kana u yɛrɛ bila ɲɛmalɔbaliya la sabu “wagati surunyara” (1 Kɔr. 7:29). Komi nin koow sigicogoya laban surunyana, a kɔrɔtalen be an ka ‘Ala ka Masaya n’a ka tilennenya ɲini fɔlɔ’, ani an ka ‘wagati nafaman’ kunmabɔ! Wagati man ca.—Mat. 6:33; Efes. 5:15, 16.

² Mɔgɔw ye mansiw fo i ko wagati kunmabɔbagaw. Ɲɛyirali fɛ, mɔgɔ mana ɔridinatɛri butɔn dɔ digi, a tigi be se ka kunnafoni caamanba labilanen sɔrɔ. Ɔridinatɛriw be baara min kɛ sekɔndi damanin kɔnɔ, fɛɛrɛ wɛrɛw b’o kɛ lɛri wala lɔgɔkun caaman kɔnɔ. Ɔridinatɛriw ye baarakɛminan nafamanw ye n’u ta cogo ka ɲi.

³ Yala o bena wagati kunmabɔ tiɲɛn na wa? Faan wɛrɛ fɛ, baara tɛ se ka kɛ ni ɔridinatɛri ye ni wari ani wagati caaman ma don o koo la. Tuma dɔw la, a be lɛri caaman ta walisa ka ɔridinatɛri ka baara kɛcogo dɔ dege. Ka fara o kan, mɔgɔ min jarabira o mansi koo la, a tigi be se ka wagati tiɲɛ, wagati min be se k’a nafa cogo fisaman wɛrɛ la. An ka kan ka koow filɛ k’a dama kɛɲɛ. An ka ciden Pol ka lasɔmini miiriya to an hakili la. A ko an ka tagama “i ko hakilitigiw, ka wagati kunmabɔ.”— 1 Kɔr. 7:31 fana filɛ.

⁴ Ŋaniya ɲuman ye dɔw lasun k’o mansiw ka baarakɛcogo labɛn walisa ka kafo ka kunnafoniw mara. Tiɲɛn lo, bɛɛ lo b’a latigɛ a yɛrɛma a b’a fɛ ka baara kɛ n’a ka ɔridinatɛri ye cogo min na. O bɛɛ n’a ta, kafoli sɛbɛw dira walisa ka kafo ka kunnafoniw sɛbɛ ka mara. O kunnanfoniw man kan ka mara ɔridinatɛri kɔnɔ, sabu denmisɛnw wala mɔgɔ wɛrɛ be se ka se u ma k’a masɔrɔ u joo tɛ. Sosiyete ye kafoli sɛbɛ minw di, kafo ka kunnafoniw bɛɛ ka kan ka sɛbɛ olu kɔnɔ: wari jateminɛ, weleweledalaw ka waajulibaara sɛbɛw, a n’a ɲɔgɔnnaw. O kunnafoniw man kan ka mara ɔridinatɛri kɔnɔ. O cogo la kafo ka kunnafoniw gundo bena tanga.

⁵ Kɔrɔsibagaw ka kan ka hakili sɔrɔ n’u be Ala ka Mara cidenyabaara Lakɔli ani waajuliko lajɛn ka labɛnw kɛra walisa ka cii kɛta kalifa mɔgɔw ma. U ka kan ka miiri kalan kɛta kɔnɔnakow la. Ɲɛyirali fɛ, lakɔli la, kalan dɔw man kan ka kalifa lakɔliden sifa bɛɛ ma. Kɔrɔsibaga ka kan k’a janto kalan kuun n’a kɔnɔnakow la, ani kalanden ka setigiya la. Ɔridinatɛri lo man kan k’o koow latigɛ.

⁶ Mɔgɔ dɔw be kalan labɛn ani u b’a labila ɔridinatɛriw kan jama kama. Ni cii kalifara balimacɛ dɔ ma ka kalan dɔ kɛ kafo ka lajɛn na, a man kan k’a bolo la o kalan labɛnnen ɲɔgɔn kan, sabu o bena baara nɔgɔya ale fɛ, janko n’a t’a tigi lɔn. Kerecɛn minw be koow ta sɔbɛ la, u tɛ kuncɛbaya kɛ ka Bibulu foroba kalan wala barokun dɔ labɛn ani k’a labila jama kama ɔridinatɛri kan. Tiɲɛn lo, ɔridinatɛri ani CD-ROM Watchtower Library ye baarakɛminan nafamanw ye. Balimacɛ dɔ be se ka tɛmɛ u fɛ ka sɛgɛsɛgɛri kɛ walisa ka dɔ fara a ka kalan diya kan ni wagati labilanen b’a bolo.

⁷ Balima dɔw be baara labɛncogo ni fɛɛn dɔw tɔgɔw ani kunnafoni sifa bɛɛ ta ɔridinatɛri kɔnɔ ani u b’o tilan tilan ka di balimaw ma. Dɔ wɛrɛw be Alako Lakɔli wala waajuliko lajɛn ka kalan dɔw labɛn ka bila ɔridinatɛri fɛɛn dɔ kɔnɔ. Ani, u b’o kalan tilan tilan balimaw cɛ. A ka fisa balimaw ma olu k’u ka kalan labɛn u yɛrɛma , u kɛtɔ ka miiri kafo ka makoya la (1 Tim. 4:13, 15). Koo foyi si man kan k’an lasun ka tɛmɛ kafo ka jɛnɲɔgɔnya fɛ walisa ka tɔnɔn dɔ ɲini wari ta fan fɛ.

⁸ Dɔ be La Tour de Garde ni kitabukalan ka bibulusenw bɔ ɔridinatɛri kɔnɔ ka sɛbɛ karadasi kan. Ani, u b’u tilan ka di balimaw ma. Ayiwa, a ka fisa weleweledalaw ka sin ka hakilinataw sɛbɛ u ka Bibulu n’u ka gafe yɛrɛw kɔnɔ. Minw be baara kɛ ni ɔridinatɛri ka vɛrise sɛbɛriw ye, u fari be faga ka Bibulu dayɛlɛ ani ka vɛrisew ɲini a kɔnɔ. K’a masɔrɔ o ye kololi faan dɔ ye, an be min sɔrɔ lajɛnw na, ani Bibulukalan kɛtɔ. O b’an ladege baara fisaman kɛcogo la ni Bibulu ye waajuli la. Tuma caaman na, nafaba b’a la ka sin ka kalan kɛ Bibulu yɛrɛ kɔnɔ, janko ni vɛrise kalantaw ka jan ani a ɲinina lamɛnnikɛlaw fɛ u ka Bibulu dayɛlɛ ka tugu kalan na.

⁹ Farati dogonen wɛrɛw: I n’a fɔ a fɔra La Tour de Garde ɲɛɛ 17nan kɔnɔ (saan 1993, utikalo tile fɔlɔ ta), mɔgɔ be se ka kunkobaw sɔrɔ Alako ta fan fɛ, n’a tigi ye jɛnɲɔgɔnya sigi a ka ɔridinatɛri ni ɔridinatɛri tɔnkulu dɔ cɛ. Ɲɛyirali fɛ, mɔgɔ kɔnɔjugu dɔ be se ka baga dɔ don ɔridinatɛri tɔnkulu kɔnɔ: fɛɛrɛ dɔ lo, min dabɔra ka ɔridinatɛri tiɲɛ wala k’a halaki. O cogo kelen na, diinan kuntigiw, murutili kalankɛbagaw, ani minw b’a ɲini ka tɔɔw ka tagamacogo tiɲɛ, olu be se k’u ka hakilinata kolonw labila ɔridinatɛri tɔnkulu kɔnɔ. Kerecɛn dɔ be se ka don “jɛɲɔgɔn juguw” kɔnɔ n’a y’a sen don ɔridinatɛri tɔnkulu dɔ kɔnɔ (hali “J. S.” tɔgɔ lara min kan): tɔnkulu min ma kɔrɔsi kosɔbɛ, ani n’a ma labila Jehova ka baarakɛla kɔgɔnen kantigimanw dɔrɔn ye (1 Kɔr. 15:33). Sosiyete ye lakalita dɔw sɔrɔ o halala tɔnkuluw koo la (réseaux privés). O tɔnkuluw tɛ sɔsɔli dɔrɔn kɛ Alakow kan. U fana be ladili juguw di, u be nafigiya kumaw ni ngalon kunnafoniw jɛnsɛn. U be miiriya juguw don mɔgɔ hakili la. U be ɲiningaliw ni sigasigaliw lawili, minw be mɔgɔ ka lanaya bɔsi a la. U fana b’u tɔgɔla ɲɛfɔliw kɛ Bibulu kan k’u jɛnsɛn. Ɲɛfilɛri fɛ, kunnafoni dɔw be se ka kɛ komi u ka di ani u be mɔgɔ kalan. Nka, pɔsɔni (poison) be sɔrɔ u la. Kerecɛnw b’u bolo la “jɔncɛ kantigiman hakiliman” kan ka hakilimaya domuni sɔrɔ wagati bɛnnen na, ani ka ɲɛfɔli wɛrɛw sɔrɔ fana. (A filɛ saan 1994, zuwekalo ka La Tour de Garde kɔnɔ ɲɛɛ 9-11nan kɔnɔ.) Kerecɛn ka kunkanbaaraba ye k’a ka lanaya tanga fɛɛnw ma, minw be se k’a tiɲɛ. O kama, a ka kan k’a ka jɛnɲɔgɔnw lɔn tuma bɛɛ.—Mat. 24:45-47; 2 Yuh. 10, 11, NW.

¹⁰ O La Tour de Garde kelen kelen y’a fɔ ka gwɛlɛya ko an ka kan ka fɛɛn dilanbagaw ka joow sariyaw bato (droits d’auteur). Minw be ɔridinatɛriw ka baarakɛcogo dilan ani u b’a feere, u caamanba b’u ka sariyaw sigi. O kɔ, u be sɛbɛ di a sanbagaw ma: o sɛbɛ b’a yira cogo min na o ɔridinatɛri baarakɛcogo daganen be sariya ɲɛ kɔrɔ. Tuma caaman na, o sɛbɛ b’a fɔ ko a daganen tɛ k’o baarakɛcogo bisigi kɛ ka di mɔgɔ wɛrɛw ma. Tiɲɛn na, o kɛcogo be sariyaw kɛlɛ: sariya minw tara duniɲa bɛɛ kɔnɔ walisa ka fɛɛn dilanbagaw ka joow tanga. Nataba caaman dusu t’u kɛlɛ ka sariya tiɲɛ. Kerecɛnw kɔni ka ɲi ka sariya sira tagama sɔbɛ la, u kɛtɔ ka faamanw ka fɛɛnw di u ma (Mat. 22:21; Rom. 13:1).—A filɛ La Tour de Garde ɲɛɛ 28-29nan kɔnɔ (saan 2001, feburukalo tile 15nan ta).

¹¹ Ɔridinatɛri dɔw ka baarakɛcogo sigira u kɔnɔ. Iziniba dɔw be sariya sɛbɛ fara u kan ka feere. Nka magazɛn dɔw t’o sariya sɛbɛ di, sabu u ye baarakɛcogo wɛrɛ bisigi ta ka don o ɔridinatɛri kɔnɔ, ani o ma daga. Mɔgɔ minw b’o fɛɛn ɲɔgɔn san, u be sariya tigɛ. Ka taga o koo fan fɛ, kerecɛnw man kan ka kunnafoni dɔw ta ka don wala k’u ta ka bɔ ɔridinatɛri tɔnkulu dɔ kɔnɔ n’u tanganen be (i n’a fɔ Sosiyete ka gafew). Sariya ɲɛɛ kɔrɔ, a ma daga k’u bisigi ta n’u tigi ma sira di k’o kɛ.—Heb. 13:18.

¹² Fɛɛrɛ o fɛɛrɛ ka nafa ka kan ka suman n’a baarakɛcogo faratiw ye. Ɲɛyirali fɛ, telewisɔn be se ka mɔgɔ nafa. Nka, a ka nɔɔ gwoman kosɔn hadamadenw kan, mɔgɔw (minw yɛrɛ tɛ Seerew ye) be jɔrɔ a koo la. Ɔridinatɛri tɔnkuluw bonya be sera duniɲa bɛɛ kɔnɔ. U be se ka kunnafoni nafaman caamanba lase mɔgɔ ma a ka soo wala baarakɛyɔrɔ la. U be baaradaw wala hadamadenw mako ɲɛ. Olu mako b’a la k’u ka koɲɛw wala jago koow kɔrɔsi sabu bi duniɲa ka koow be yɛlɛma joona joona. O wagati kelen kɔnɔ, o ɔridinatɛri tɔnkuluw falen be kakalaya la, ani kɔniya miiriya minw be mɔgɔw bila ɲɔgɔn na. U fana falen be kunnafoni misɛnw na, minw be mɔgɔ dɛmɛ ka koo kolon jugumanw kɛ.

¹³ O kama, kuun sɔbɛ caaman b’a la minw kama kerecɛn ka kan ka ɔridinatɛri koo filɛ k’a dama kɛɲɛ. Sosiyete ka CD-ROM Watchtower Library be mɔgɔ caaman nafa. A be mɔgɔ dɛmɛ ka sɛgɛsɛgɛri caaman kɛ. Mɔgɔ min sɔnna fɛɛrɛ kuraw ka nafa la, n’a tigi be baara nafaman kɛ n’u ye, a fana ka kan ka kɔrɔsili kɛ k’a yɛrɛ tanga ani ka mɔgɔ wɛrɛw fana tanga o fɛɛrɛ faan juguman ma. An ka wagati dira Ala ma. An ka kan ka koow kɛ k’a dama kɛɲɛ. O cogo la, hali fɛɛrɛ kuraw faan ɲumanw tɛna o wagati fanba ta. U fana tɛna an hakili bɔ an ka baara n’an ka laɲinita fɔlɔw la.—Mat. 6:22; 28:19, 20.