Lajɛnbaw: Ɲagali wagati lo!
1 Jehova Seerew ka lajɛnbaw ye ɲagaliba wagatiw ye. A saan kɛmɛ ni kɔ ye nin ye, an ka ɔriganisasiyɔn yiriwala o lajɛnbaw sababu fɛ. A daminɛ na, an ka duniɲa bɛɛ baara tun ka dɔgɔ. O kɔ, an y’a ye ko Jehova y’o baara duga kosɔbɛ. An ka lajɛnba fɔlɔ min kɛra bi tile la saan 1893, Sikago (chigago), kafodenw tun ye mɔgɔ 360. U cɛ, mɔgɔ 70 batisera walisa k’a yira k’u ye u yɛrɛkun di Jehova ma. Salon, “Ala ka Kuma sira tagamabagaw” lajɛnba minw tugutugura ɲɔgɔnw kɔ duniɲa bɛɛ kɔnɔ, kafodenw mumɛ tun ye mɔgɔ 9 454 055 ye, ani mɔgɔ 129 367 batisera. Nin ye ɲagali sababu ɲuman ye dɛ!
2 Kabini Bibulu sɛbɛ wagati la, lajɛnbaw kɛra fɛɛrɛ barikaman ye walisa ka Jehova ka kalan lase a ka baarakɛlaw ma. Esdrasi ni Nehemi ka wagati la, jama ye Sariya kalan lamɛn “k’a daminɛ sɔgɔma fɔ ka taga tile gwan.” (Neh. 8:2, 3). Komi jama ye faamuyali fisaman sɔrɔ Sariya koo la o sen fɛ, “u ɲagalila kosɔbɛ” (Neh. 8:8, 12). An fana be ɲagali k’a ye ko lajɛnbaw ka sababu ɲuman fɛ, an be kalan ɲuman ni hakilimaya domuni sɔrɔ “wagati latigɛlen na” ka bɔ Jehova yɔrɔ, “jɔncɛ kantigiman hakiliman” bolo fɛ (Mat. 24:45). An mako be lajɛnbaw la kosɔbɛ walisa an ka ɲɛ hakilimaya ta fan fɛ, sabu Yesu y’a fɔ ko mɔgɔ be balo kumaw la “minw be bɔ Ala daa la.” —Mat. 4:4.
3 Kuun b’a la ka jijaliw bɛɛ kɛ walisa ka kɛ yen: Ɲinan, an kelen kelen bɛɛ ka kan k’a laɲini ka kɛ tile saba kuru bɛɛ ka lajɛnba la, “Ala ka Kuma karamɔgɔw”. Loon o loon, an k’a ɲini ka na joona, ani an ka to yen fɔɔ ka taga a fɔ “Amina” kuncɛli delili tuma. O kama, i be taga a sɔrɔ an mako b’a la ka yɛlɛmani don an ka labɛn na. A be se ka gwɛlɛya an ma ka sira sɔrɔ an ka baarakɛyɔrɔ la walisa ka taga lajɛnba la. An mako b’a la k’an cɛsiri o koo kama. An kana koow to u yɛrɛ ma. N’an mako be siyɔrɔ la walima bolifɛn na, an ka kɔn ka labɛn kɛ o kama. An mako mana kɛ jijali o jijali min na, kuun b’a la k’o kɛ.
4 Dugaw minw be sɔrɔ lajɛnba la, Jehova Seerew t’u suman ni wariko ye. Saan 1958, Jehova Seerew ka lajɛnba, “Ala sagoya”, kɛra Niyɔriki, duniɲa kuru bɛɛ kama. Mɔgɔ minw tun y’u cɛsiri walisa ka na o lajɛnba la, olu dɔw ka ɲɛyirali filɛ nin ye. Balimacɛ dɔ y’a masɔnya baarada datugu lɔgɔkun fila walisa k’a yɛrɛ di lajɛnba ka baara kama ani ka taga yen. Guun dɔ kan (îles vierges), balimacɛ dɔ y’a ka foro ɛkitari caaman feere walisa a ka denbaya mɔgɔ wɔɔrɔ ka se ka taga lajɛnba la. Kamalen dɔ n’a muso y’u ka bato feere walisa ka se ka taga lajɛnba la n’u ka deen saba ye: O deenw tun be kalo fila ni saan wolonfila cɛ. Kalifɔrini (Californie), a fɔra baden saba dɔw ye ko n’u ye u ka baara to ka taga lajɛnba la, u segitɔ, u bolo bena bɔ baara la. O bɛɛ n’a ta, o ma u bali ka taga lajɛnba la. U tɛ se ka ɲinɛ o lajɛn kɔ ka ye.
5 Jehova b’an ka jijali sɔbɛw duga: Jehova ɲɛ b’a ka sagokɛlaw jijaliw la, ani a b’u duga (Heb. 6:10). Ɲɛyirali dɔ filɛ: Saan 1950, “tewokarasi yiriwali” ka lajɛnba la, kafodenw ye kalan barikaman dɔ lamɛn min kuun ko “Koow sigicoya kura”. Balimacɛ Frederick Franz ye u bɛɛ ɲɛnatigɛ ɲiningali nin fɛ: “Yala a bena diya nin lajɛnba ka kafodenw ye k’a lɔn ko dugukolo kura ka masaden nata dɔw be yan an cɛma bi wula fɛ wa?” Ɲɛfɔli min dira Zaburuw 45:16 kan, o be an ɲagali hali bi saan bi looru ni kɔ o lajɛnba tɛmɛnen kɔ.
6 Salon, tile saba ka lajɛnba bannen kɔ, gwatigi dɔ y’a ka waleɲumanlɔn kofɔ k’a sɛbɛ nin cogo la ko: “Balimaw, aw tɛ se k’a lɔn cogo min nin lajɛnba ye an bɔ koo la. Ne ka denbaya tagara sigi duguba la ne ka baarako kosɔn. Nka o ye an ka hakilimaya nagasi. An ma an ka kerecɛnya kunkanbaara ta sɔbɛ la tugun. An yɛrɛ y’a dabila pewu ka taga lajɛnw la ani ka waajuli kɛ. Nin lajɛnba ye barika kura don an na. An be laɲinita kuraw kɛra, ani an be labɛn kɛra k’u dafa.”
7 An mako be hakilimaya domuni min na, Jehova b’u di an ma. An ka lajɛnbaw wagati la, a be tabali fa ka bila an ɲɛ. Kɔrnɛye ye min fɔ tuma min na ciden Piɛre tagara bɔ a ye, an ka waleɲumanlɔn b’an lasu k’o kelen lo fɔ: “Sisan Ala ye fɛɛn minw bɛɛ di i ma k’a fɔ an ye, an bɛɛ lajɛlen filɛ Matigi ɲɛ kɔrɔ yan ka olu lamɛn.” (Kew. 10:33). An k’a laɲini ka ‘lajɛn Ala ɲɛ’ loon o loon ka kalan kama, tile saba lajɛnba la, ani an ka ɲagali!