An k’an yɛrɛw labɛn ka Esayi ka ciraya kuma kalan!
1 “A batobaga kantigimanw be se ka la a la ko tilennenya kama, Jehova ... tɛna a to tile kelen ka fara Sitanɛ ka duniɲa laban loon kan.” Nin ye darakan ye min be mɔgɔ jagwɛlɛya dɛ! O sɛbɛnen be sɔrɔ min? La prophétie d’Isaïe, lumière pour tous les humains I gafe kɔnɔ. Yala Esayi ka ciraya kuma be joo di an ma ka jateminɛ kuncɛ o cogo la wa ? Ɔnhɔn! O Bibulu kitabu kɔnɔ, kisili barokun kofɔra ka gwɛ ani ka sinsin a kan (Esayi 29:9). O de kama, a bena kɛ jagwɛlɛyaba ye an fɛ k’o Bibulu kitabu kalan kɔngeregasiyɔn ka kitabukalan na. Yala lɔgɔkun o lɔgɔkun, an bena kɛ yen k’o kalan nafa sɔrɔ wa? Mun na an ka kan ka kɛ yen?
2 Esayi 30:20 la, Jehova weelela ko an “Karamɔgɔba.” Kerecɛn kelen kelen bɛɛ ka kan ka lamɛnni kɛ koɲuman tuma min na Jehova be kumana an fɛ a ka Kuma kɔnɔ, ani gafew kɔnɔ minw bɔra “jɔncɛ kantigiman hakiliman” fɛ. O gafew basiginen be Bibulu kan (Mat. 24:45; Esayi 48:17, 18). Siga t’a la, gafe Prophétie d’Isaïe I ye o gafe dɔ ye tiɲɛn na. I be se ka tɔnɔn fisaman sɔrɔ cogo juman na a kalan na?
3 I labɛn walisa k’i sendon a la: Lɔgɔkun o lɔgɔkun, wagati caaman labila i yɛrɛ ye k’i yɛrɛ labɛn kitabu kalan kama. Dakun minw dantigɛra kalan kama, o bɛɛ kalan kelen kelen ka tugu ɲɔgɔnw na. Ɲiningali minw sɛbɛra, miiri u kelen kelen bɛɛ kan. Nɔɔ bila jaabiliw la i ka kitabu kɔnɔ. Esayi kitabu vɛrisew sɛbɛra ka bonya. U kalan ka kɔrɔsili kɛ. Vɛrise wɛrɛ minw kofɔra, olu yɔrɔ ɲini walisa k’a filɛ jɛnɲɔgɔnya min be olu ni kalan cɛ. I be min kalanna, i ka miiriya la o kan. O kɔ, i ye min sɔrɔ i labɛntɔ, o tilan n’i ka jɛkulu mɔgɔw ye.
4 Balimacɛ min be kalan ɲɛminɛna, a ka kan ka kafodenw bɛɛ dɛmɛ u ka baara ɲuman kɛ ni Bibulu ye. A ka kan k’u dɛmɛ u k’a lɔn ko nafa b’a la ka baara kɛ n’o kalan ye. Ni ile fɔlɔ lo weelela ka jaabili di, tilen ka jaabili nɔgɔman di. Ni mɔgɔ wɛrɛ kɔnna k’o jaabili di, i be se ka ɲɛfɔli kɛ hakilinata misɛnman dɔ kan. I be se k’a yira cogo min na vɛrise kunbaba dɔ be kalankun kɔrɔta. A ɲini ka lakalitaw kɛ i yɛrɛ ka kumacogo la. I sendon sɔsɔli la ni diyanye ye.
5 Cira nafamanba min be yen Esayi ka kitabu kɔnɔ, an k’a lajɛ ɲɔgɔn fɛ ni dusu diya ye. A bena an jagwɛlɛya ka ɲɛnamaya kɛ loon o loon, an kɛtɔ ka Jehova ka kisili makɔnɔ ni dusu diya ye! —Esayi 30:18.