“Cɛɛ dilenw, minw be Ala ka sagakulu kɔrɔsi ni kisɛya ye”

¹ “Cɛɛ dilenw”: Nin ye Jehova ka kanuya labɛn ye dɛ! A y’o ta a dencɛ sababu fɛ (Efes. 4:8, 11, 12). O cɛɛw ka kunkanbaaraw ka ca i n’a fɔ: ka Ala ka sagakulu kɔrɔsi ni kisɛya ni dusu diya ye (1 Piɛre 5:2, 3). An kelen kelen bɛɛ mako gwɛlɛn be o labɛn na, min b’an bɛɛ nafa. O cɛɛw b’u mako don an kelen kelen bɛɛ ka hakilimaya koo la ni kisɛya ye: n’an be gwɛlɛyaw kunbɛnna, n’an ye mɔgɔ kura ye, n’an barika dɔgɔyara, wala n’an ye sira bila. —Filip. 2:4; 1 Tes. 5:12-14.

² Ni duniɲa ka koow b’an kɔnɔgwanna, o Saga gwɛnna ka kɔrɔsigiw be i ko ‘dogo yɔrɔ fiɲɛba ɲɛ, i ko sanjiba ladon yɔrɔ.’ N’an sɛgɛnna wala n’an ka doni y’an laben ani an mako be dusu saalo la, u be barika don an na. O wagatiw la, u be “i ko kɔɔw be woyo dugukolo jalen na” wala “i ko farakurunba min bɛ suma da jamana jalen kan.” —Esayi 32:2.

³ U be sumalenw jagwɛlɛya: Minw basiginen tɛ waajuli baara la, wala minw sumana, diinan mɔgɔkɔrɔw be jijali sɔbɛ kɛra ɲinan walisa k’u jagwɛlɛya, ani k’u dɛmɛ k’u sendon kokura kafo ka baaraw la tuma o tuma. Kanuya fɛ, saga gwɛnnaw b’u sɛgɛrɛ. O sɛgɛrɛli ye caaman dɛmɛ ka timinandiya lajɛn tagali la, ani ka sabati hakilimaya ta faan fɛ. O sababu fɛ, u ye waajuli baara daminɛ tugun. Diinan mɔgɔkɔrɔw ka jijaliw bɛɛ be Jehova ka kanuya yira. U fana b’a yira ko Yesu baarakɛtɔ be kafo ɲɛminɛ. Ale ye ɲɛyirali di, a kɛtɔ k’a janto sagaw la: minw y’u mabɔ tɔɔw la wala u tununa. —Mat. 18:12-14; Yuh. 10:16, 27-29.

⁴ Saga gwɛnna ka kɔrɔsigiw be kɔrɔsili kɛ ni tagamasiɲɛ dɔw b’a yira k’u balimaw ka hakilimaya barika dɔgɔyara. Mɔgɔ o mɔgɔ be farifaga kɛ, n’a tɛ tilen lajɛn tagali la, wala a be sumaya waajuli baara la, siga t’a la, o tigi mako be dɛmɛ na Alako ta faan fɛ. Min mana a daminɛ ka duniɲa ka fani doncogo wala kuun masiricogo ladege, wala n’a be kafo kɔrɔfɔ, diinan mɔgɔkɔrɔw labɛnnen be k’o tigi dɛmɛ. Diinan mɔgɔkɔrɔw b’u janto u balimaw la ni kɔnɔgwɛ ni kanuya sɔbɛ ye. U labɛnnen be ka ‘hali u niinw yɛrɛ di’ walisa k’u balimaw dɛmɛ ka barika kura don Jehova kanu la. —1 Tes. 2:8.

⁵ Saan tɛmɛnenw na, kerecɛn dɔw y’u mabɔ kafo la, ani u sumana pewu hakilimaya ta faan fɛ. Kɛnɛyako, wariko haminankow ni denbaya ka gwɛlɛyaw tun y’u niin degun. Diinan mɔgɔkɔrɔw t’u kɔrɔfɔ. Nka, u b’u hakili jigi ko Jehova b’a janto a ka sagaw bɛɛ la, ani a bena kɛ sinsin yɔrɔ ye u fɛ wagati gwɛlɛnw na (Zab. 55:23; 1 Piɛre 5:7). Saga gwɛnna minw b’u janto sagakulu la, u b’u dɛmɛ k’a faamu ko n’u ‘gɛrɛla Ala la, ale fana na gɛrɛ u la.’ Ani a bena dusu saalo ni fanga kura di u ma. —Yaku. 4:8; Zab. 23:3, 4.

⁶ U b’a yira ko nafa be dɛsɛbagatɔw la: Mɔgɔw tɛ bɔ u dɔw kalama. U ka kanuya fɛ, Saga gwɛnna kɔrɔsigiw tɛ ɲinɛ u kɔ. Kafow bɛɛ kɔnɔ dɛsɛbagatɔya be dɔw kan farikolo ta faan fɛ, wala u lanen be ani u tɛ se ka wili. An b’a faamu k’o cogoya be dansigi u ka waajuli baara la. N’a sɔrɔ fɛɛrɛ minw b’u fɛ ka seereya kɛ o be dan u sɛgɛrɛbagaw ma, banabagatɔ wɛrɛw wala u ladonbagaw ma. Nka u seko ye min ye, o be waajuli baara nafa kosɔbɛ (Mat. 25:15). Hali n’u be waajuli kɛ miniti tan ni looru dɔrɔn, o jati ka kan ka kɛ. O cogo la u bena jate i ko Masaya weleweledala basiginenw.

⁷ “Cɛɛ dilenw” b’u janto u balimaw ka hakilimayakow la, sanko Hakilijigi wagati la. Nin ye jijaliba kɛwagati ye diinan mɔgɔkɔrɔw fɛ dɛ! Minw bɛɛ y’u mabɔ, wala u sumana, u ka kan k’u dɛmɛ k’u madon ani ka jɛnɲɔgɔnya teriman kɛ ni kafo ye walisa ka ɲagali ni hakili lafiya sɔrɔ kokura. O mɔgɔ minw ye “an balima dannabagaw” ye, an mana a ye k’u be na lajɛnw na ani u b’u sendon waajuli kɛli la, an be ɲagali. O cogo la u b’a seereya kokura k’u be lanaya kɛ kunmabɔ saraka kan, min dira Saga gwɛnna ɲuman fɛ. —Gal. 6:10; Luka 15:4-7; Yuh. 10:11, 14.