Masaya Boonw: Labɛn min kɛra boonw lɔli kama, a be taga ɲɛ
1 1983 saan na, tile saba lajɛnba la “kelenya, Masaya sababu fɛ”, Eta Zini, a fɔra ko kɔnti dɔ bena dayɛlɛ daan na walisa ka Masaya Boonw lɔ wala k’u ladinɛ Eta Zini ani Kanada jamanaw na. O daminɛni fitininman kɔ, an tun m’a lɔn duga juman tun bena sɔrɔ o la. An y’a daminɛ ka Zaburu 92:5 ka fɔta faamu koɲuman: “E Matigi, i ye ne nisɔndiya ni i ka kɛwalew ye. Ne na ɲagali i bolo baara nɔ la.”
2 Min be kɛra sisan, o b’an ɲagali kosɔbɛ. Bi, labɛn dɔ sigira sen kan duniɲa bɛɛ kɔnɔ walisa ka Masaya Boon lɔ teliya la, ani o labɛn be tagara ɲɛ. Nɛɛma dira an bɛɛ ma k’an sen don o baara la cogo dɔ la. An b’o kɛ n’an be nili kɛ, caaman wala fitinin, walisa ka musakaw sara. O cogo la, boon caaman wɛrɛw be lɔ duniɲa kɔnɔ. Balima caaman b’u ka minanw, n’u ka wagati, ni setigiya ni hakilidiya di o baaraw kama. O labɛn kuturu bɛɛ dafara ka ɲɛ sabu an jɛnna ka jijaliw kɛ, ani Jehova y’an ɲɛminɛ, k’an dɛmɛ, ani k’an duga caaman.—Zaburu 127:1.
3 Tɔnbolo caaman ye Eta Zini ka kafow ɲɛyirali sira tagama. Yɔrɔ caaman na, buwati dɔ be yen Masaya Boonw kɔnɔ. Weleweledalaw b’u ka bolomafara don o buwatiw kɔnɔ Masaya Boon lɔli kama. Eta Zini jamana na, An ka Masaya Cidenyabaara (saan 1997, marisikalo ta) y’a fɔ ko yɛlɛmani bena don o labɛn na walisa k’a makɛɲɛ. A y’a fɔ ko: “Kabini Sosiyete ye kɔnti dayɛlɛ Masaya Boonw kama saan 1983, balimaw ye nili kɛ caaman. O sababu fɛ wari tun be se ka singa Masaya Boon lɔli kama. O jamana kɔnɔ, kafo 2 700 ɲɔgɔn ye nafa sɔrɔ ka ban o labɛn na. N’o labɛn sababu tun tɛ, kafo caaman tun tɛ se ka Masaya Boon kura lɔ, wala k’u ka Masaya Boon ladinɛ. Sisan, mako gɛlɛn b’a la k’o kɔnti wari dɔ singa jamana dɛsɛbagatɔw ka kafo dɔw ma. N’i be timinandiya nili kɛli la walisa k’o labɛn kɔrɔta, Sosiyete b’i waleɲuman lɔn kosɔbɛ. I ka niliw be kafo minw nafa, olu fana b’i waleɲuman lɔn kosɔbɛ.”
4 Kunnafoni nin kuun tun ye k’i weele i k’i sen don labɛn na: labɛn min kɛra walisa ka Masaya Boon lɔ teliya la. Masaya Boon kɔnti bena to ka wari singa Masaya Boon lɔli kama an ka jamana kɔnɔ. O kɔnti fana bena labila walisa k’an balimaw mako wasa jamana wɛrɛw la. Saan 1997, utikalo ka An ka Masaya Cidenyabaara barokun wɛrɛ y’a fɔ ko: “Duniɲa bɛɛ kɔnɔ, an makoba b’a la ka Masaya Boonw lɔ. Waajulibaara saan tɛmɛnen dɔrɔn na, kafo kura 3 288 juu sigira. O kafo caaman be sɔrɔ farafinna, Azi, Ameriki cɛmancɛ n’a worodugu, ani tubabu jamana koron fan fɛ.”
5 Mun lo sɔrɔla kabini o wagati la? 2001 Sanyɛlɛma gafe y’a lakali ko: “O labɛn sababu fɛ, jamana 30 kɔnɔ, Masaya Boon 453 lɔra ka ban, ani 727 wɛrɛw be lɔra. U sinsinna a kan k’a yira ko jamana kelen kelen bɛɛ ka kan ka Masaya Boon mɔdɛli bisigi kɛ ka kɛɲɛ n’o jamana ka minanw ni boon lɔcogo ye. Keniya, kabakuruw lo be lɛsɛ ka boonw lɔ. Togo delila ka boonw lɔ ni birikiw ye. Kameruni, mɔgɔw delila ka lɔli kɛ ni bɔgɔ birikiw ye. O cogo la, o jamana balimaw be se ka hakilidiya sɔrɔ joona walisa ka lɔyɔrɔba ta boon lɔli baara la.”
6 A gwɛnen be ko Jehova be o labɛn dugara farafinna. O Masaya Boon dɔw jaaw filɛ sɛbɛ nin kan. U filɛtɔ, i miiri k’a filɛ, o boonw lɔli ye nɔɔ min to Jehova Seerew ka baara kan! O ye nɔɔ to cogoya saba la: nɔɔ tora an ka balimaya kelenya kan duniɲa kuru bɛɛ kɔnɔ, nɔɔ tora an sigiɲɔgɔnw kan, ani kafodenw hakɛ cayara lajɛnw na. Masaya Boon minw lɔra Afiriki, An ka Masaya Cidenyabaara lankana nin be olu dɔw yira. Kalo nataw la, an bena a yira cogo min na Masaya Boonw lɔli be ɲɛtaga sɔrɔla yɔrɔ wɛrɛw la duniɲa kɔnɔ.
[Picture on page 3]
Bimbo, Bangi
[Picture on page 3]
SANTARAFIRIKI
[Picture on page 3]
Beguwa, Bangi
[Picture on page 4]
Ukonga, Tanzani
[Picture on page 4]
Akara, Gana
[Picture on page 4]
Salala, Liberiya
[Picture on page 4]
Alada, Benɛn—Masaya Boon kɔrɔ
[Picture on page 4]
Alada, Benɛn—Masaya Boon kura
[Picture on page 4]
Kɛrowɛ, Zimbabuwe
[Picture on page 5]
Peme, Togo
[Picture on page 5]
Sokode, Togo
[Picture on page 5]
Fijɔrɔs, Benɛn
[Picture on page 6]
Lyenga, Zanbi—Masaya Boon kɔrɔ
[Picture on page 6]
Lyenga, Zanbi—Masaya Boon kura
[Picture on page 6]
Kinsasa, Kɔngo
[Picture on page 6]
Musanbira, Ruwanda