Min be se ka sɔn a ma, a ka sɔn a ma
1 Loon dɔ, Yesu tun be baro kɛra n’a ka kalandenw ye furu koo la. A ye furubaliya kofɔ i ko ‘nilifɛn.’ Ani, a y’a fɔ ko: “Mɔgɔ min bɛ se ka sɔn furubaliya ma, o tigi k’a sɔn” (Mat. 19:10-12, ABBF, 1999). Saan damanin o kɔ, ciden Pol ye sɛbɛri kɛ furubaliya tɔnɔw koo la. Ani, a ye mɔgɔ wɛrɛw jagwɛlɛya u k’ale sennɔ ta, u kɛtɔ ka to furubaliw ye (1 Kɔr. 7:7, 38). Bi, balima caaman ‘sɔnna’ furubaliya ma, ani u b’a tɔnɔ sɔrɔla. O tɔnɔ dɔw ye jumanw ye?
2 “Foyi kana aw hakili ɲaami” baara la: Pol tun y’a faamu ko furubaliya tun be cogoya di a ma ka baara kɛ Jehova ye ni ‘foyi m’a hakili ɲagami.’ O cogo kelen na bi, balimacɛ furubali dɔ be se k’a ɲini ka taga Cidenyabaara degeli Lakɔli la. Tuma caaman na, mɔgɔ furubali labilanen be ka tɛmɛ mɔgɔ tɔɔw kan walisa ka piyɔniye baara kɛ, ka kaan wɛrɛ dege, ka taga sigi yɔrɔ min na makoyaba be yen, ka baara kɛ Betɛli la, wala k’a yɛrɛ labila nɛɛma baara wɛrɛw kama. A be se ka wagati ni cogoya caaman sɔrɔ ka kelenna kalan kɛ ka dunya, ka miiri a kan, ani ka kumaɲɔgɔnya kɛ ni Jehova ye delili sɔbɛw kɔnɔ. Tuma caaman na, wagati be mɔgɔ furubali fɛ k’a yɛrɛ di ka mɔgɔ wɛrɛw dɛmɛ ka tɛmɛ mɔgɔ tɔɔw kan. O baara ɲɔgɔnw bɛɛ kɛra o tigi ‘yɛrɛ nafa’ kama.—1 Kɔr. 7:32-35; Kew. 20:35.
3 Saraba b’a la ka Ala ka baara kɛ ni foyi m’i hakili ɲagami. Balimamuso furubali dɔ ye saan 27 kɛ Keniya jamana na. O kɔ, a y’a sɛbɛ ko: “Teriw ani baara kɛta tun ka ca ne fɛ kosɔbɛ! An tun be koow kɛ ɲɔgɔn fɛ [ani] an tun be taga bɔ ɲɔgɔnw ye. . . . Furubaliya sababu fɛ, ne labilanen tun be ka taga yɔrɔ bɛɛ walisa ka waajuli baara kɛ. Ani, o ye hɛɛrɛba lase ne ma.” A y’a fara a kan ko: “Saanw tɛmɛtɔ, ne ye jɛnɲɔgɔnya kɛ ka dunya ni Jehova ye.”
4 A’ ye tɛmɛ furubaliya fɛ ka baara ɲuman kɛ: Yesu y’a fɔ ko minw be furubaliya jogo sɛnɛ, u ka kan k’a kɛ “sankolo masaya kosɔn.” (Mat. 19:12). I n’a fɔ jogo kelen kelen bɛɛ, baara ka kan ka kɛ ni furubaliya jogo ye cogo bɛnnen na walisa ɲagali ni tɔnɔ ka sɔrɔ a la. Cogoyaw dira furubaliw ma ka baara kɛ. U kɛtɔ ka tɛmɛ o fɛ, ani k’u bolo la Jehova kan walisa ka hakilitigiya ni fanga sɔrɔ, mɔgɔ furubali caaman sera k’a faamu ko nafa b’a la ka sɔn furubaliya ma.