Baara, min be mɔgɔ dusu lafiya

¹ Mɔgɔ minw bɛɛ be sɔn Bibulu ka cira la, ani u b’a sira tagama u ka ɲɛnamaya kɔnɔ, a b’u dusu lafiya (Zab. 19:7, 8). A b’u dɛmɛ u ka hɔɔrɔnya ka bɔ ngalon kalansiraw ni kɛcogo juguw la. Ani, a be jigiya bɛrɛbɛrɛ di u ma siniɲasigi koo la. Nka kibaro duman be di mɔgɔ minw ma, a t’olu dɔrɔn nafa. A dibagaw yɛrɛw dusu be lafiya fana.—Ntal. 11:25.

² U ye barika kura sɔrɔ waajuli sababu fɛ: Ka sɔn Yesu ka tɔnna yiri la, o kɔrɔ dɔ ye ka waajuli kɛ ani ka mɔgɔw kɛ kalandenw ye. Yesu y’a fɔ ko minw be sɔn o la, u “dusuw na lafiya sɔrɔ.” (Mat. 11:29). Ale yɛrɛ ye barika kura sɔrɔ a kɛtɔ ka seereya di mɔgɔw ma. A tun b’a jati i ko domuni ( Yuh. 4:34). Tuma min na a ye kalanden 70 ci ka taga waajuli kɛ, u ɲagalila, sabu u y’a ye ko Jehova be u ka jijaliw kɛli duga.—Luka 10:17.

³ Bi fana, waajuli baara kɛtɔ, kerecɛn caaman be barika kura sɔrɔ o cogo kelen na. Balimamuso dɔ y’a fɔ ko: “Waajuli baara be dusu lafiya, sabu, a be kuun di ne ka ɲɛnamaya ma. Ne mana n’ seen don waajuli baara la, dɔ be bɔ n’ ka kunkow ani loon o loon ka gwɛlɛyaw la.” Balimamuso kisɛman wɛrɛ y’a fɔ ko: “Waajuli [ . . . ] be ne hakili jigi loon o loon ko Jehova be yen tiɲɛn na. A fana be ɲɛsuma ni hɛɛrɛ di ne ma, minw tɛ se ka sɔrɔ cogoya wɛrɛ la.” Nɛɛma lo an fɛ ka kɛ ‘Ala ka baarakɛɲɔgɔnw’ ye dɛ!—1 Kɔr. 3:9.

⁴ Kirista ka tɔnna yiri man gwɛlɛ: Hali n’a be dusu don kerecɛnw na u ‘k’u jija sɔbɛ la’, Yesu t’a ɲini an fɛ an k’an seko dama tɛmɛnen kɛ (Luka 13:24, NW ). Tiɲɛn na, a b’an weele ni kanuya ye an ‘k’ale ka tɔnna yiri la an kaan na.’ (Mat. 11:29). Dɔw ka kan ka gwɛlɛyaw kɛlɛ. U be se ka la a la k’u b’u seko min bɛɛ kɛ, hali ni bɛrɛ tɛ, o ka di Ala ye kosɔbɛ.—Marka 14:6-8; Kolos. 3:23.

⁵ An be koo o koo kɛ Ala ka tɔgɔ kosɔn, a b’o waleɲuman lɔn. O b’an dusu lafiya ka baara kɛ o Ala ɲɔgɔn ye dɛ! (Heb. 6:10). An k’an jija k’an seko bɛɛ kɛ a ye tuma bɛɛ.