A’ ye majigilenya kɛ aw yɛrɛw la
1 Cɛden dɔ, min ye bɛgɛn dɛndɛbaga ye, a b’a jigi la Jehova kan, ani a be see sɔrɔ kɛlɛkɛla barikaman dɔ kan (1 Sam. 17:45-47). Cɛɛ nafolotigi dɔ be bɔnɛ muɲu ni sabali ye (Job 1:20-22; 2:9, 10). Ala Dencɛ be tandoli minw sɔrɔ a ka kalan kosɔn, a b’u ɲɛsin a Faa ma (Yuh. 7:15-18; 8:28). O ɲɛyirali kelen kelen bɛɛ kɔnɔ, majigilenya lɔyɔrɔ tun ka bon. O cogo kelen na bi, an makoyaba be majigilenya la walisa ka koo dɔw kunbɛn.—Kolos. 3:12.
2 Waajuli kɛtɔ: An ye kerecɛn cidenw ye. O la, an be kibaro duman lase mɔgɔ sifaw bɛɛ ma ni majigilenya ye. An tɛ sigasiga u la u ka siya kosɔn, u ka lɔnniya wala u ka bɔyɔrɔ kosɔn (1 Kɔr. 9:22, 23). Ni dɔw be malobaliya wala kuncɛbaya kɛ, ani u be ban Masaya cira la, an t’u jaabi o cogo kelen na. Nka, an be timinandiya ka mɔgɔ sɔbɛw ɲini ni sabali ye (Mat. 10:11, 14). Sanni an k’a ɲini ka mɔgɔw kabakoya ko lɔnniya b’an fɛ, wala ko an kalannen be, an b’u ɲɛsin Ala ka Kuma ma. An b’a lɔn ko a barika ka bon ka tɛmɛ an ka fɔtaw bɛɛ kan (1 Kɔr. 2:1-5; Heb. 4:12). I n’a fɔ Yesu, an be tandoli bɛɛ lase Jehova ma.—Marka 10:17, 18.
3 Kafo kɔnɔ: Kerecɛnw fana ka kan ka “ɲɔgɔn mago ɲɛ ni yɛrɛmajiginlenya ye.” (1 Piɛre 5:5). N’an b’a jati ko an balimaw ka boon n’an ye, an bena cogoya ɲini ka baara kɛ u ye, sanni an ka kɔnɔni kɛ k’olu lo bena baara kɛ an ye (Yuh. 13:12-17; Filip. 2:3, 4). An tɛna a miiri ko an ka boon baara dɔw kɛli ma, i n’a fɔ Masaya boon saniyali.
4 Majigilenya b’an dɛmɛ ka “ɲɔgɔn ka koow muɲu ni kanuya ye.” O la, hɛɛrɛ ni bɛɛn be kɛ kafo kɔnɔ (Efes. 4:1-3). A fana b’an dɛmɛ ka kolo mɔgɔw ye, cii dira minw ma ka kafo ɲɛminɛ (Heb. 13:17). A b’an lasun ka sɔn ladili wala kololi sifa bɛɛ la, n’u dira an ma (Zab. 141:5). Kafo ka nɛɛma baara dɔ mana kalifa an ma, majigilenya b’an lasun k’an bolo la Jehova kan n’an b’o baara kɛra (1 Piɛre 4:11). I n’a fɔ Dawuda, an b’a lɔn ko see sɔrɔli tɛ bɔ hadamaden ka hakilidiya la, fɔɔ Ala ka dɛmɛ na.—1 Sam. 17:37.
5 An ka Ala ɲɛ kɔrɔ: Ka tɛmɛ o bɛɛ kan, an ka kan ka ‘an yɛrɛw majigin Ala bolo barikaman kɔrɔ.’ (1 Piɛre 5:6). N’an ka kan ka gwɛlɛya dɔw kɛlɛ, n’a sɔrɔ a negeba b’an na ko Masaya ka na o koow ɲɛnabɔ. Nka an be muɲuli kɛ ni majigilenya ye: an be Jehova kɔnɔ, a k’a ka lahidu dafa a ka wagati latigɛnen na (Yaku. 5:7-11). I ko Job ka kantigiya marali y’a yira cogo min na, an ka ɲɛnako fɔlɔ ye ko “Jehova tɔgɔ ka tanu.”—Job 1:21, A.B.U. 1961.
6 Cira Daniɛl ‘y’a yɛrɛ majigi a ka Ala ɲɛ kɔrɔ’, ani a ye Jehova diyanye sɔrɔ. Nɛɛma baara caaman dira a ma (Dan. 10:11, 12). O cogo kelen na, an ka majigilenya kɛ an yɛrɛw la. Sabu, an b’a lɔn ko “yɛrɛ majiginli ni Matigi ɲɛsiran, o tɔnɔ ye fɛntigiya ni nɔɔrɔ ni ɲɛnamaya de ye.”—Ntal. 22:4.