Kamalenw ni sunguruw: A’ ye nafolo ɲuman lajɛn sini kama
1 Mun lo kɔrɔtalen be i hakili la? I be miiri mun lo koo la? Yala i ka ɲɛnako fɔlɔw basiginen be bi koow kan, wala u basiginen be siniɲasigi koow kan wa? Ani, yala u ɲɛsinna Ala ka lahiduw ma wa? (Mat. 6:24, 31-33; Luka 8:14). I n’a fɔ Ibrahima ni Musa ka ɲɛyiraliw b’a yira cogo min na, an mako be lanaya barikaman na walisa ka koow kɛ ka kɛɲɛ ni Ala ka lahiduw ye (Heb. 11:8-10, 24-26). Cogo juman na i be se k’o lanaya ɲɔgɔn sɛnɛ, ani ka “nafolo ɲuman banbali lajɛ sini ɲɛ”?—1 Tim. 6:19.
2 I ka Jehova ɲini: N’i delinanko ye ka Alakow kɛ n’i denbaya ye, i ka kan ni tandoli ye. Nka, i kana a miiri k’o delinanko ɲɔgɔn sen fɛ, i bena lanaya barikaman sɔrɔ kelen. Walisa i ka “Ala dɔnniya” sɔrɔ, fɔɔ i yɛrɛ ka Jehova ɲini (Ntal. 2:3-5; 1 Tilew Kib. 28:9). Masacɛ Josiyasi kamalentɔ y’o lo kɛ. A ka saan 15nan na, “a y’a bɛnba Dawuda ka Ala ɲinili daminɛ”, hali n’a kɔrɔbayara mɔgɔw cɛ, minw tun tɛ hakilimaya sira kan.—2 Tilew Kib. 34:3.
3 I be se ka Jehova ɲini cogo juman na? I kɛtɔ k’i ka lannakow sɛgɛsɛgɛ koɲuman walisa k’a kɔrɔbɔ ko tiɲɛn lo sɔbɛ la (Rom. 12:2). Ɲɛyirali fɛ, Bibulu be min fɔ joli koo la, yala i be se k’o ɲɛfɔ wa? Yala i be se k’a yira daliluw fɛ ko saan 1914 la, Ala ka Masaya y’a daminɛ ka kuntigiya kɛ sankolo la wa? Ka tiɲɛn lɔnniya tigitigi sɔrɔ, o ye nafolo ɲuman lajɛn cogoyaba ye sini kama.—1 Tim. 2:3, 4.
4 Josiyasi ye tɔnɔ ɲuman sɔrɔ Ala ɲinini la. Sanni a ka saan 20 sɔrɔ, a ye jagwɛlɛya kɛ ka jamana saniya ka bɔ ngalon diinan bolo (2 Tilew Kib. 34:3-7). O cogo kelen na, i ka kɛwalew lo bena a yira k’i ye ɲɛtaga sɔrɔ Alako ta fan fɛ (1 Tim. 4:15). N’i ye weleweledala ye ani i ma batise fɔlɔ, i jija k’i ka waajuli kɛcogo fisaya. I kana dan gafew dili ma mɔgɔw ma dɔrɔn. A laɲini ka baara kɛ ni Bibulu ye, ka mɔgɔw hakili jagabɔ, ani ka mɔgɔw dɛmɛ, minw y’u mako don tiɲɛn koo la (Rom. 12:7). O lo bena i dɛmɛ ka yiriwa Alako ta fan fɛ.
5 I k’i seko fisaman di Jehova ma: I kɛtɔ ka batɛmu ta walisa k’a yira k’i y’i yɛrɛkun di Jehova ma, i be kɛ Ala ka ciden ye (2 Kɔr. 3:5, 6). O be sira di i ma ka baara kɛ Jehova ye kudayi cidenyabaara la: i n’a fɔ piyɔniye, betɛli mɔgɔ, misɔnden, ani ciden jamana wɛrɛ kɔnɔ. Ka fara o kan, cogoya wɛrɛw b’i fɛ ka dɔ fara i ka cidenyabaara kan: i be se ka kaan wɛrɛ dege, wala i be se ka taga i sigi yɔrɔ min na waajulikɛlaw man ca.
6 Tiɲɛn lo, bɛɛ labilanen tɛ k’o nɛɛma baaraw kɛ. Nka, an bɛɛ kelen kelen be se k’an seko fisaman di Jehova ma (Mat. 22:37). I ka koow cogoya mana kɛ min o min ye, a to Jehova ka baara ka kɛ i ɲɛnako fɔlɔ ye i ka ɲɛnamaya kɔnɔ (Zab. 16:5). O kɛtɔ, i bena nafolo ɲuman lajɛ sini ɲɛ.
[Study Questions]
1. Mun na kerecɛn kamalenw ni sunguruw mako b’a la ka lanaya barikaman ɲini ka sɔrɔ?
2. Masacɛ Josiyasi ka ɲɛyirali b’an kalan mun lo la?
3. Cogo juman na kerecɛn kamalenw ni sunguruw be se ka Jehova ɲini bi?
4. Weleweledala minw ma batise fɔlɔ, cogo juman na u be se k’a yira ka gwɛ k’u be ɲɛtaga sɔrɔla?
5. Kerecɛn minw batisera, cogoya jumanw b’u fɛ ka dɔ fara u ka cidenyabaara kan?
6. Cogo juman na an kelen kelen bɛɛ be se ka nafolo ɲuman lajɛ sini ɲɛ?