Kelenya sɔbɛ, kerecɛnw cɛ: O be sɔrɔ cogo di?
1 Mun lo be se ka mɔgɔ miliyɔn wɔɔrɔ ni kɔ kɛ kelen ye: mɔgɔ minw be bɔ jamana 234 la, ani u be kaan 380 ɲɔgɔn fɔ? Jehova ka batoli kelen dɔrɔn lo (Mise 2:12; 4:1-3). Jehova Seerew b’a lɔn u yɛrɛw ma ko kelenya sɔbɛ ye tiɲɛnko ye kerecɛnw cɛ bi. I ko “kulu kelen”, “saga gɛnna kelen” bolo, an cɛsirinen be ka ban duniɲa nin ka bɛnbaliya hakili la. —Yuh. 10:16; Efes. 2:2.
2 Ala ka sagonata ye ko mɛlɛkɛw bɛɛ ani hadamadenw bɛɛ ka u kaan kɛ kelen ye tiɲɛn batoli kɔnɔ (Jira. 5:13). Foyi tɛ se k’o bali a ka dafa. Komi a tun b’a lɔn k’o kɔrɔtalen be, Yesu ye delili kɛ sɔbɛ la walisa a ka kalandenw ka kɛ kelen ye (Yuh. 17:20, 21). Cogo juman na an kelen kelen bɛɛ be se ka kɛ sababu ye kerecɛnya kafo ka kɛ kelen ye?
3 Kelenya be sɔrɔ cogo min na: Ni Ala ka Kuma n’a ka hakili sababu tun tɛ, kelenya tun tɛ se ka kɛ kerecɛnw cɛ. An be min kalan Ala ka Kuma kɔnɔ, n’an b’o sira tagama, an be sira di Ala ka hakili ma a ka baara kɛ an ka ɲɛnamaya kɔnɔ. O b’an dɛmɛ an “ka Ni Senu ka kelenya mara hɛrɛ sirilan na.” (Efes. 4:3). A b’an lasun an ka ɲɔgɔnw ka koow muɲu ni kanuya ye (Kolos. 3:13, 14; 1 Piɛre 4:8). Yala i b’a to kelenya be yiriwa, i kɛtɔ ka miiri Ala ka Kuma kan loon o loon wa?
4 Cii dira an ma an ka waajuli kɛ ani an ka mɔgɔw kɛ kalandenw ye. O fana b’an kɛ kelen ye. An kɛtɔ ka baara kɛ ni mɔgɔ wɛrɛw ye kerecɛnya baara la, n’an be “ɲɔgɔn dɛmɛ kɛlɛ la Kibaru Duman dannaya kosɔn ni dusu kelen ye”, an be kɛ “u jɛɲɔgɔnw ye o tiɲɛ baara la.” (Filip. 1:27; 3 Yuh. 8). N’an b’o kɛ, kanuya sirilanw be barika sɔrɔ kafo kɔnɔ. I mɛɛnna ka waajuli kɛ ni balima min ye, mun na i t’a weele a k’i bila sira waajuli baara la lɔgɔkun nin na?
5 Balimaya jɛkulu kelen min be dugukolo kan bi, an ye o jɛkuluden dɔw ye. O ye duba ye an fɛ dɛ! (1 Piɛre 5:9). Mɔgɔ caamanba b’o kelenya nɛnɛra lajɛnbaw la: “A’ ye nɔɔrɔ di Ala ma”, lajɛnba minw be kɛra jamana caaman cɛ. An kelen kelen ka kɛ sababu ye o kelenya nafamanba ka to. O kama, an ka Ala ka Kuma kalan loon o loon, an ka bɛnbaliyaw ɲɛnabɔ kanuya sira la, ani an ka kibaro duman waaju “ni dusu kelen ni kan kelen ye.”—Rom. 15:6.