‘ A’ ye aw ka kanuya bonya’
1 Kerecɛn balimaya jɛkulu kɔnɔ, an bɛɛ kunkanbaara ye ka dusudiya yiriwa kafo kɔnɔ (1 Piɛre 1:22; 2:17). O dusudiya ɲɔgɔn be sɔrɔ n’an b’an ka “kanuya bonya” an ni ɲɔgɔnw cɛ (2 Kɔr. 6:12, 13). Mun na a kɔrɔtalen be an k’a ɲini k’an balimaw lɔn ka ɲɛ?
2 Teriyaw be barika sɔrɔ: N’an be deli an kerecɛn tagamaɲɔgɔnw la, o b’an dɛmɛ an k’u ka lanaya, n’u ka muɲuli n’u jogo ɲuman wɛrɛw jati cogo fisaman na. U ka filiw tɛ kɛ bɛrɛ ye an ɲɛ kɔrɔ, ani an ka teriya jɛnɲɔgɔnya be barika sɔrɔ. An kɛtɔ ka ɲɔgɔn lɔn koɲuman, an bena labɛn cogo fisaman na ka ɲɔgɔnw sabati ani ka ɲɔgɔnw dusu saalo (1 Tes. 5:11). An be se ka kɛ ɲɔgɔnw “jigi tugulaw” ye walisa k’an yɛrɛw lafasa Sitanɛ ka duniɲa nɔɔ jugu ma (Kolos. 4:11). Nin laban loon ninw na, waleɲumanlɔn lo an fɛ ka teriw ɲumanw sɔrɔ Jehova ka mɔgɔw cɛ dɛ!—Ntal. 18:24.
3 Ni gwɛlɛya sɔbɛw b’an kun, teri sɔbɛw be se ka kɛ barika dili ni dusu saalo sababu ye, sababu min ɲɔgɔn tɛ yen (Ntal. 17:17). Balimamuso dɔ tun be nafantanya miiriya kɛlɛla. A hakili b’a la ko: “Teriw tun be ne jogo ɲumanw kofɔ n’ ye walisa ka ne dɛmɛ n’ ka see sɔrɔ n’ ka miiriya juguw kan.” O teri sifaw ye Jehova ka duba ye.—Ntal. 27:9.
4 I mako don mɔgɔ wɛrɛw la: Cogo juman na an be se k’an ka kanuya dunba labonya an balima dannabagaw ye? Ka fara balimaw foli kan lajɛnw na, an k’an jija k’u daa don baro nafamanw na. An k’an mako don u la n’an t’an sen don u ka halala koow la (Filip. 2:4; 1 Piɛre 4:15). An ka kanuya labonya cogo dɔ ye ka mɔgɔ wɛrɛw weele domuni na (Luka 14:12-14). Wala, an be se ka labɛn kɛ walisa ka waajuli kɛ n’u ye (Luka 10:1). N’an b’a bɔ an yɛrɛ la k’a ɲini k’an balimaw lɔn ka ɲɛ, an b’a to kelenya ka yiriwa kafo kɔnɔ.—Kolos. 3:14.
5 Yala an ka teli k’an teri sɔbɛw sugandi an filankuruw dɔrɔn lo cɛma, wala anw ni minw nafako ye kelen ye wa? An man kan k’a to o koow ka daan sigi an ka teriyaw la kafo kɔnɔ. Dawuda ni Jonatan, ani Ruti ni Naomi ye jɛnɲɔgɔnya teriman sɔbɛ sigi u ni ɲɔgɔnw cɛ hali n’u sandaw n’u bɔyɔrɔw tun tɛ kelen ye (Ruti 4:15; 1 Sam. 18:1). Yala an be se ka dɔ fara an teriw hakɛ kan wa? N’an y’o kɛ, o be se ka duga dɔw lase an ma, an hakili tun tɛ minw na.
6 N’an b’an ka kanuya dunba labonya mɔgɔ wɛrɛw ta fan fɛ, o la an be ɲɔgɔnw barikaya ani an b’a to hɛɛrɛ be kɛ kafo kɔnɔ. Ka fara o kan, Jehova b’an duga sabu an be kanuya yira an balimaw ta fan fɛ (Zab. 41:2, 3; Heb. 6:10). Mun na an t’an seko bɛɛ kɛ k’a laɲini ka balima caamanba lɔn cogo fisaman na?
[Study Questions]
1. Kunkanbaara juman lo be an kelen kelen bɛɛ kan?
2. Mun na a kɔrɔtalen be an ka teriya yiriwa an kerecɛn balimaw ni ɲɔgɔnw cɛ?
3. Cogo juman na an be se ka kɛ barika dili sababu ye mɔgɔ wɛrɛw fɛ?
4. Cogo juman na an be se ka mɔgɔ wɛrɛw lɔn cogo fisaman na kafo kɔnɔ?
5. Cogo kelen juman na an be se ka dɔ fara an teriw hakɛ kan?
6. Nafa jumanw b’a la n’an b’an ka kanuya dunba labonya an balimaw ta fan fɛ?