An ka Jehova ka tilennenya ladegi
1 “Matigi tilennen don, tilennenya ko ka di a ye.” (Zab. 11:7). O le y’a to, hali n’a y’a latigɛ ka duniɲa tilenbali nin halaki, a ye labɛn kɛ walisa lasɔmini ka di fɔlɔ (Marka 13:10). O be cogoya di mɔgɔw ma u ka nimisa ani u ka kisi (2 Piɛre 3:9). Yala an b’an jija sɔbɛ la ka Jehova ka tilennenya ladegi wa? Yala hadamadenya ka ɲani n’a ka tɔɔrɔ b’an lasun ka Masaya jigiya lase mɔgɔ wɛrɛw ma wa (Ntal. 3:27)? Ni tilennenya koo ka di an ye, o bena an lasun an k’an seen don bɛrɛbɛrɛ waajulibaara la.
2 An ka waajuli kɛ n’an tɛ mɔgɔ bɔ mɔgɔ la: N’an be Ala sagonata kofɔ bɛɛ ye n’an tɛ mɔgɔ bɔ mɔgɔ la, an be “tilennenya [ . . . ] kow kɛ” o cogo la (Mise 6:8). Hadamaden dafabaliw ka teli ka basigi kɔkana koow kan ka sigasiga tɔɔw la. An ka kan ka see sɔrɔ o kɛcogo kan ( Yaku. 2:1-4, 9). Jehova “b’a fɛ mɔgɔw bɛɛ ka kisi ka se ka tiɲɛ dɔn.” (1 Tim. 2:4). Ala ka tiɲɛn kuma be se ka yɛlɛmani kabakomanw kɛ mɔgɔw ka ɲɛnamaya kɔnɔ (Heb. 4:12). N’an b’o faamu, o be se k’an lasun an k’an magwɛrɛ ni jigiya ye mɔgɔw la, hali u minw tun banna k’an lamɛn fɔlɔ la.
3 Balimamuso dɔ tun be baara kɛ magazɛn dɔ kɔnɔ, yɔrɔ min na cɛɛ dɔ tun delila ka na sanni kɛ. Balimamuso tun be siran dɔɔni a ɲɛ a ka sawura kosɔn. Nka, loon min na sababu ɲuman sɔrɔla, a y’a ɲini ka seereya di o cɛɛ ma Ala ka alijɛnɛ layidu koo la. Cɛɛ barila k’a jaabi ko ale tɛ la siirinw la, ko ale ye mɔgɔ ye min b’a yɛrɛ labila i ko rastamɔgɔ, ani a be dɔrɔgi ta. Nka o ma balimamuso fari faga. Loon dɔ o cɛɛ y’a ɲininga ko a be mun miiri ale ka kunsigi janw koo la. Bibulu be min fɔ o koo la, balimamuso y’o ɲɛfɔ a ye nɛmɛnɛmɛ (1 Kɔr. 11:14). O dugusagwɛ, a kabakoyara k’a ye k’o cɛɛ y’a bonbosi li koɲuman, ani a y’a kunsigi tigɛ! A y’a ɲini ka Bibulu kalan. A diyara balimacɛ dɔ ye k’o kalan kɛ n’a ye. A ye ɲɛtaga sɔrɔ kalan na fɔɔ k’a yɛrɛkun di ani ka batise. Bi, i n’a fɔ o cɛɛ, Jehova sagokɛla caaman be weleweledalaw waleɲumanlɔn sabu u timinandiyara ka Masaya kibaru lase u ma n’u ma mɔgɔ bɔ mɔgɔ la.
4 Sɔɔni, Jehova bena tilenbaliya bɔ yen pewu dugukolo bɛɛ kan (2 Piɛre 3:10, 13). Wagati dɔɔni min tora, an ka Jehova ka tilennenya ladegi an kɛtɔ ka cogoya di bɛɛ ma u ka kisi tuma min na Sitanɛ ka duniɲa tilenbali bena halaki.—1 Yuh. 2:17.