I ɲɛɛ jɔlen to koo kelen kan

¹ A ka waajuli kɔnɔ, a ye min kɛ kulu kan, Yesu y’a yira ko an ɲɛden tagamasiɲɛlama be se ka nɔɔba bila an ka ɲɛnamaya kuru bɛɛ kan. A y’a fɔ ko: “Ni i ɲɛkisɛw ka kɛnɛ, i farikolo bɛɛ bɛ yeelen na. Nka ni i ɲɛw man ɲi, i farikolo bɛɛ bɛ dibi la.” (Mat. 6:22, 23). Ɲɛden “kɛnɛ” ye ɲɛden ye, min jɔlen be koo kelen kan: Ala ka sago kɛli. A t’a to hami gwansan bololafɛnw koo la b’a bila ɲɛmalɔbaliya la (Mat. 6:19-21, 24-33). Mun lo be se k’an dɛmɛ an k’an ɲɛɛ jɔlen to koo kelen kan?

² I wasa: Bibulu b’a waajibiya an ma an k’an janto an somɔgɔw la k’u wasa u makonataw la (1 Tim. 5:8). Nka o kɔrɔ tɛ ko an ka to ka boli boli ka fɛɛn kuraman fisamanw ɲini u ye tuma bɛɛ (Ntal. 27:20; 30:8, 9). Bibulu b’an jagwɛlɛya ko an k’a to “dumuni ni fini” k’an wasa. An mako b’o lo la walisa ka balo (1 Tim. 6:8; Heb. 13:5, 6). N’an b’o ladili sira tagama, o be se k’an dɛmɛ k’an ɲɛɛ jɔlen to koo kelen kan.

³ An ka hakili sɔrɔ k’an yɛrɛ tanga juru gwansanw doni ma ani bololafɛnw ni laɲinitaw ma minw be wagati caaman ta (1 Tim. 6:9, 10). An be se k’o kɛ cogo juman na? N’an b’a fɛ ka koo dɔ kɛ ani an be miirila o kan, an k’o koo jate minɛ delili kɔnɔ ani an k’an kɔnɔ gwɛ k’a filɛ n’o koo tɛna an ka laɲinitaw nagasi Alakow ta fan fɛ. An k’an cɛsiri ka Alakow to yɔrɔ fɔlɔ la an ka ɲɛnamaya kɔnɔ.—Filip. 1:10; 4:6, 7.

⁴ An k’an ka ɲɛnamaya kɛcogo nɔgɔya: N’an b’an ka ɲɛnamaya kɛcogo nɔgɔya, o fana be se k’an dɛmɛ an ka ban bololafɛnw kanuya nege la. Balimacɛ dɔ y’a ye ko a ka denbaya be se ka balo koɲuman hali ni bololafɛn caaman t’a fɛ. A y’a fɔ ko: “Sisan kɔni, ne be se ka baara caaman kɛ kafo kɔnɔ walisa k’an balimaw mako ɲɛ. Ne lanen b’a la ko Jehova sagokɛlaw minw bɛɛ be tiɲɛn batoli koow bila u ka ɲɛnakow ɲɛ, Jehova b’u duga.” Yala i tɛ se k’i ka ɲɛnamaya kɛcogo nɔgɔya walisa ka duga caaman diya bɔ wa?

⁵ Walisa an ka se ka ban Sitanɛ n’a ka duniɲa nataba nɔɔ la, ani an ka dafabaliya nɔɔ la, fɔɔ an ka timinandiya ka jijali kɛ. Sanni an k’an ɲɛɛw to u ka yaala yaala, an k’u jɔlen to Ala ka sago kɛli kan ani an ka ɲɛnamaya banbali jigiya kan. —Ntal. 4:25; 2 Kɔr. 4:18.

[Study Questions]

1. Ka an ɲɛɛ jɔlen to koo kelen kan, o kɔrɔ ye mun ye, ani mun na a kɔrɔtalen be?

2. Ala ka Kuma b’an jagwɛlɛya an ka bololafɛnw jate cogo juman na?

3. Mun lo be se k’an dɛmɛ k’an tanga doni gwansanw ma?

4. Mun na an ka kan ka fɛɛrɛw ɲini k’an ka ɲɛnamaya kɛcogo nɔgɔya?

5. Mun na an mako b’a la ka timinandiya ka jijali kɛ walisa k’an ɲɛɛ jɔlen to koo kelen kan?