Mɔgɔw mako b’i la i k’u dɛmɛ
1 “I ni ce i ka baara la, i be min bɛɛ kɛ an ye. I b’an mako ɲɛ kosɔbɛ.” O foliw b’a yira ka ɲɛ ko an b’an ka diinan mɔgɔ kɔrɔw ni kɔrɔsigi cidenw waleɲuman lɔn. Komi Ala ka ɔriganisasiyɔn be yiriwala ka taga, an mako be cɛɛ kɔgɔnenw na walisa u ka baara kɛ kafo 100 000 ɲɔgɔnw na duniɲa bɛɛ kɔnɔ. N’i ye balimacɛ batiselen ye, kafo mako b’i ka dɛmɛ la.
2 A’ ye “kɔlɔsibaaya ɲini”: Cogo juman na i be se k’a ɲini u ka nɛɛma baara di i ma? (1 Tim. 3:1). I ka ɲi ka koo jɔnjɔn min kɛ, o ye ka kɛ ɲɛyirali ɲuman ye i ka ɲɛnamaya faan bɛɛ la (1 Tim. 4:12; Tite 2:6-8; 1 Piɛre 5:3). I k’i sen don a ɲɛɛ ma waajuli baara la, ani i ka mɔgɔ wɛrɛw dɛmɛ olu fana k’a kɛ ten (2 Tim. 4:5). I k’i mako don ni kɔnɔgwɛ ye balimaw la (Rom. 12:13). I ka kɛ Ala ka Kuma kalanden sɔbɛ ye, ani i k’i ka kalan kɛcogo fisaya (Tite 1:9; 1 Tim. 4:13). Diinan mɔgɔkɔrɔw ye baara minw kalifa i ma, i k’u dafa ni sɔbɛ ye (1 Tim. 3:10). N’i ye gwatigi ye, i k’i “yɛrɛ ka so mara koɲuman.”—1 Tim. 3:4, 5, 12.
3 Walisa i ka nɛɛma baara sɔrɔ ka kɛ, fɔɔ i ka baara kɛ ni sɔbɛ ye ani yɛrɛ saraka hakili ye (1 Tim. 5:17). O kama, i kɛtɔ ka nɛɛma baara ɲini, i k’i jija ka mɔgɔw mako ɲɛ ni majigilenya ye (Mat. 20:25-28; Yuh. 13:3-5, 12-17). Miiriya min tun be Timote la, i ka miiri o kan, ani i k’i jija k’a ladegi (Filip. 2:20-22). I ko Timote, a to i tɔgɔ ɲuman ka fɔ i jogo ɲuman kosɔn (Kew. 16:1, 2). N’i be hakilimaya jogow dege walisa ka se ka nɛɛma baara dafa, n’i be mɔgɔw ka ladiliw mɛn ani i b’u sira tagama walisa k’i jogo fisaya, “mɔgɔw bɛɛ [bena] a ye ko i bɛ taa ɲɛ.”—1 Tim. 4:15.
4 Bangebagaw, a’ ye aw ka denmisɛnw dege mɔgɔ dɛmɛni na: Denmisɛnw be se k’a dege ka mɔgɔw dɛmɛ kabini u fitininman. A’ y’u dege u ka jantoli kɛ lajɛnw na, u ka waajuli kɛ, ani u ka kɛ deen ɲumanw ye Masaya Boon na ani lakɔliso la. A’ y’u kalan mɔgɔw mako ɲɛ cogo la, koow kɛcogo la: i n’a fɔ ka mɔgɔw dɛmɛ ka Masaya Boon saniya, ka mɔgɔ kɔrɔw dɛmɛ, ani o ɲɔgɔnna baaraw. A’ y’a to u k’a ye ko baraji be nili la (Kew. 20:35). O kololi ɲɔgɔn be se k’u dɛmɛ u ka kɛ sini ka piyɔniyew, kɔrɔsigi cidenw ni diinan mɔgɔkɔrɔw ye.