Yɔrɔ 5nan: An ka bibulukalanw kɛ minw be ɲɛtaga sɔrɔ
An k’a filɛ an be se ka dakun hakɛ min lajɛ ni kalanden ye?
1 A ka kalandenw kalantɔ, Yesu tun b’a janto u ka faamuyali danyɔrɔ la. U tun be se ka min faamu, a tun b’u kalan “ka kɛɲɛ ni o ye” (Marka 4:33; Yuh. 16:12). O cogo kelen na bi, Ala ka Kuma karamɔgɔw ka kan k’a filɛ u be se ka hakilinata hakɛ min lajɛ ni kalandenw ye wagati dɔ kɔnɔ. O hakɛ be bɔ karamɔgɔ ni kalanden fila bɛɛ ka hakilidiya n’u ka koow cogoya la.
2 An k’a dɛmɛ ka lanaya barikaman sɔrɔ: I be taga a sɔrɔ kalanden dɔw be se ka kalansen dɔ faamu siɲɛ kelen na k’a masɔrɔ kalanden dɔ wɛrɛw mako b’a la an k’o kalansen kelen lajɛ n’u ye dɔɔni dɔɔni fɔɔ siɲɛ fila wala siɲɛ saba kɔnɔ. An t’a fɛ ka kalanden bali a ka faamuyali kɛ, ka sababu kɛ an b’a fɛ ka teliya. Kalanden kelen kelen bɛɛ mako b’a la k’a ka lanaya kura juu sabati bɛrɛbɛrɛ Ala ka Kuma kan.—Ntal. 4:7; Rom. 12:2.
3 Kalan kɛtɔ ni kalanden ye lɔgɔkun o lɔgɔkun, i kana kɔrɔtɔ, nka i ka wagati ta k’a dɛmɛ walisa a be koo minw kalanna Ala ka Kuma kɔnɔ, a k’u faamu ani a ka sɔn u la. I kana kalan teliya fɔɔ kalanden be dɛsɛ ka tiɲɛn nafa bɛɛ sɔrɔ. I kana kɔrɔtɔ, nka i ka wagati ta ka sinsin hakilinata jɔnjɔnw kan ani ka vɛrise jɔnjɔnw lajɛ, kalan basiginen be Bibulusen minw ka miiriya kan.—2 Tim. 3:16, 17.
4 An kana an mabɔ kalankun na: Hali n’an t’a fɛ ka kalan teliya kojugu, an fana t’a fɛ k’an mabɔ kalan ka miiriyaw la. Ni kalanden dɔ b’a fɛ ka baro kɛ ka janya a tɔgɔla koo dɔw kan, an be se ka labɛn kɛ walisa ka segi o koow kan kalan banni kɔ.—Waaj. 3:1.
5 Fan wɛrɛ fɛ, a be se ka gwɛlɛya an yɛrɛ fɛ an ka kuma k’a dama kɛɲɛ kalan kɛtɔ sabu an dusu diyalen be tiɲɛn kosɔn (Zab. 145:6, 7). Tuma kelen kelen na, an be se ka kunnafoni walima wale dɔ lakali walisa ka dɔ fara kalan nafa kan. Nka an t’a fɛ k’o kɛ ka caya wala ka janya fɔɔ o be kalanden bali ka lɔnniya tigitigi sɔrɔ Bibulu kalansira jɔnjɔnw koo la.
6 Kalan kelen kelen kɛtɔ ni kalandenw ye, n’an be hakilinata kɛɲɛnen lajɛ n’u ye, an b’u dɛmɛ ka “taama Matigi ka kɛnɛyeelen na.”—Esayi 2:5.