An ka bibulukalanw kɛ minw be ɲɛtaga sɔrɔ

Yɔrɔ 6nan: Kalanden mana ɲiningali dɔ lawili

¹ Tuma caaman na, bibulu-kalan juu mana sigi ka ɲɛ, a ka fisa an ka Bibulu kalansiraw lajɛ ni kalanden ye cogo tilen na, sanni an ka to ka panpan kalansenw kan. O be kalanden dɛmɛ a ka lɔnniya tigitigi juu sigi, ani a ka ɲɛtaga sɔrɔ Alako ta fan fɛ (Kolos. 1:9, 10). O bɛɛ n’a ta, tuma caaman na, kalandenw be ɲiningali dɔw lawili koo caaman kan kalan kɛtɔ. An be se k’o ɲɛnabɔ cogo di?

² An ka hakili sɔrɔ: Tuma caaman na, ni ɲiningaliw ɲɛsinna kalansen kɔnɔnakow ma, an be se k’u jaabi o nɔɔ nin na. Ni ɲiningali dɔ ka jaabili be sɔrɔ kalan nataw kɔnɔ, an k’a fɔ dɔrɔn ko baro bena kɛ o kan kɔfɛ. Nka ni ɲiningali dɔ ma ɲɛsin kalan kɔnɔnakow ma, wala n’o ɲiningali b’an waajibiya an ka sɛgɛsɛgɛri dɔw kɛ ka sɔrɔ ka jaabili tilennen di, n’a sɔrɔ a bena fisaya an k’o ɲiningali lajɛ kalan banni kɔ, wala wagati wɛrɛ la. Weleweledala dɔw y’a kɔrɔsi ko n’an b’o ɲiningali sɛbɛ ka mara, o be kalanden hakili sigi ko an b’ale ka ɲiningali jati sɔbɛ la. O fana b’a to an t’an mabɔ kalan yɛrɛ la.

³ An be kalan kɛ ni mɔgɔw ye gafe minw kɔnɔ, o gafew be Bibulu ka kalansira caaman lajɛ ka surunya dɔrɔn. O la, n’a ka gwɛlɛ kalanden dɔ fɛ ka sɔn kalansira dɔ la, wala n’a lanen be ngalon kalan dɔ la n’a sɔbɛ bɛɛ ye, an ka kan ka mun lo kɛ? A be se ka fisaya an ka hakilinata wɛrɛw lajɛ n’a tigi ye: hakilinata minw be Bibulu ka fɛta ɲɛfɔ ka dunya o koo kan. Ni kalanden ma la a la halibi, an k’o sɔsɔli bila gɛrɛ fɛ ani an ka taga ɲɛ ni kalan ye ( Yuh. 16:12). Ni kalanden ka lɔnniya nana bonya Bibulu koo la, ani n’a nana ɲɛtaga sɔrɔ Alako ta fan fɛ, n’a sɔrɔ a bena se k’o kalansira faamuya o tuma na.

⁴ An ka an daan lɔn: Ni ɲiningali dɔ bilara an ye ani an ma la a jaabili la, an k’an yɛrɛ minɛ, an kana an yɛrɛ ka miiriya fɔ o ko kan (2 Tim. 2:15; 1 Piɛre 4:11). An k’a ɲɛfɔ ko an bena taga sɛgɛsɛgɛri kɛ o koo kan, ani an bena segi ka na jaabili di a ma. O yɛrɛ be se ka kɛ sababu ye an fɛ an be kalanden dege sɛgɛsɛgɛri kɛcogo la. An k’a yira a la dɔɔni dɔɔni cogo min na a be se ka tɛmɛ gafew ni minan wɛrɛw fɛ, Jehova ka ɔriganisasiyɔn be minw di an ma, ka sɛgɛsɛgɛriw kɛ. O cogo la, ale yɛrɛ laban bena se k’a yɛrɛ ka ɲiningaliw jaabi.—Kew. 17:11.