Waajuli kɛtɔ, an ka baara kɛ ni zurunaliw ye
1 “U kalan ka di, u be kuma bi koow kan, ani u be mɔgɔw jagwɛlɛya.” “Ne ma zurunali wɛrɛw kalan ka ye minw be mɔgɔw jagwɛlɛya nin cogo la.” Nin ye lakalitaw ye minw be La Tour de Garde ni Réveillez-vous ! kalanbagaw ka fɛtaw yira ka ɲɛ. Tiɲɛn na, an ka zurunaliw sɔrɔla ka kɛ fɛɛn nafamanbaw ye, minw sababu fɛ kibaro duman be mɔgɔ sifaw bɛɛ sɔrɔ.—1 Tim. 2:4.
2 Cɛɛ dɔ ka ɲɛnako tun ye a ka baara dɔrɔn lo ye. Loon dɔ, Réveillez-vous ! ka barokun dɔ diyara a ye ani a sɔnna k’a ta. A sɔnna La Tour de Garde fana la. O cɛɛ lanen tun be Ala sabaya kalan na kabini wagati jan. Nka, a ye La Tour de Garde kalan minkɛ, barokun dɔ y’a lasun k’a ka lannako sɛgɛsɛgɛ koɲuman. O kalan y’a lasun k’a mako don tiɲɛn koo la. Kalo wɔɔrɔ o kɔ, a batisera. Cɛɛ dɔ wɛrɛ tun delila k’an ka zurunaliw sɔrɔ, nka a tun m’u kalan ka ye. A muso kɔni tun be boli Jehova Seerew ɲɛ. Nka a cɛɛ tun be na ni zurunali minw ye, a tun b’u kalan. Bibulu ye layidu min ta ko dugukolo bena kɛ alijɛnɛ ye ani a bena fa mɔgɔ tilennenw na, o layidu y’a dusukun sɔrɔ. Kɔfɛ, ale n’a dencɛ, n’a dɔgɔmuso kɛra Jehova ka baarakɛlaw ye.
3 An k’u fila bɛɛ jɛn ka di: I n’a fɔ ɲɛyirali ninw b’a yira cogo min na, an tɛ se k’a lɔn jɔnw lo bena an ka zurunaliw kalan, ani mun lo bena u lasun u k’u mako don tiɲɛnko la (Waaj. 11:6). O kama, a ka ɲi an ka La Tour de Garde ni Réveillez-vous ! fara ɲɔgɔn kan k’u di mɔgɔw ma hali n’an bena zurunali kelen dɔrɔn lo kofɔ u ye. Tuma dɔw la, viziti kura dɔ kɛtɔ, a ka ɲi an ka zurunaliw nimɔrɔ damanin di a tigi ma.
4 Nafa b’a la n’an be loon kelen latigɛ zurunaliw jɛnsɛnni kama lɔgɔkun o lɔgɔkun. Calendrier des Témoins de Jéhovah 2005 kan, samedi kelen kelen bɛɛ sugandira ka kɛ “zurunaliw dilon” ye. Tiɲɛn lo, koow be dan na yɔrɔ ni yɔrɔ, ani bɛɛ ta tɛ kelen ye. O kama, dɔw be se ka loon wɛrɛ latigɛ zurunaliw jɛnsɛnni kama. Yala i ye labɛn kɛ walisa ka se k’i sendon o baara la lɔgɔkun o lɔgɔkun wa?
5 I k’i tɔgɔla laɲinita latigɛ: N’an b’a latigɛ ka zurunali hakɛ dɔ to mɔgɔw bolo kalo o kalo, o be se k’an dɛmɛ ka zurunaliw jɛnsɛnni koo to an hakili la tuma o tuma. Yala zurunaliw disira dɔ b’i fɛ wa? I be mɔgɔ minw kunbɛn waajuli kɛtɔ, yala i be zurunaliw kofɔ u ye wa? Yala i be se ka zurunaliw kofɔ mɔgɔw ye n’i be waajuli kɛ sirada la, jagokɛyɔrɔw la, ani forobayɔrɔw la wa? N’i be tagama la, n’i be sanni kɛra, wala n’i be tara ɲɔgɔnye dɔ la, yala i be zurunali dɔw ta i bolo wa? Sababu mana sɔrɔ i bolo tuma o tuma, i ka mɔgɔw dɛmɛ u ka nafa sɔrɔ La Tour de Garde ni Réveillez-vous ! kalan na.
6 Zurunali kɔrɔman minw b’an bolo, an fana ka kan k’a laɲini k’u kofɔ mɔgɔw ye. Zurunaliw mana bɔ kalo dɔ la, hali n’an ma se k’u tilan mɔgɔw ye o kalo kɔnɔ wala kalo nɔfɛta kɔnɔ, nafa be u kɔnɔnakow la halibi. An k’u don makodon mɔgɔw bolo. Mɔgɔ miliyɔn caaman fɛ, La Tour de Garde ni Réveillez-vous ! be i ko “kuma bɛnnen . . . a waati la.” (Ntal. 25:11). An ka baara kɛ n’u ye walisa ka mɔgɔ miliyɔn caaman wɛrɛw dɛmɛ u ka se ka Jehova lɔn ani ka baara kɛ a ye.
[Kalan ka ɲiningaliw]
1, 2. La Tour de Garde ni Réveillez-vous ! kalan ye nɔɔ juman tɔ mɔgɔw kan?
3. Nafa juman b’a la n’an be zurunali fila bɛɛ fara ɲɔgɔn kan k’u di an lamɛnbaga ma?
4. An be se k’a latigɛ ka zurunaliw jɛnsɛn tuma juman na?
5. An ka kan ka sababu jumanw ɲini ka zurunaliw kofɔ mɔgɔw ye? Ani mun lo be se k’an dɛmɛ k’o kɛ?
6. Cogo juman na an be se ka baara ɲuman kɛ ni zurunali kɔrɔmanw ye?