An ka bibulukalanw kɛ minw be ɲɛtaga sɔrɔ Yɔrɔ 9nan: An ka kalandenw dege senfɛ waajuli kɛli la
1 Tuma min na Andre ni Filipe bɔra a kala ma ko Yesu ye Masiya ye, u dusukunw y’u lasun k’o dusudiya kibaro fɔ tɔɔw ye (Yuh. 1:40-45). O cogo kelen na bi, kalandenw be koo minw kalanna, u mana a daminɛ ka lanaya la o koow kan, o b’u lasun ka kuma o koow kan (2 Kɔr. 4:13). Cogo juman na an be se k’u jagwɛlɛya u ka senfɛ waajuli kɛ, ani u k’u labɛn k’a kɛ bɛrɛbɛrɛ?
2 An be se ka kalanden ɲininga dɔrɔn n’a y’a ka Bibulu kalan kofɔ mɔgɔ wɛrɛw ye. N’a sɔrɔ a be se k’a ka teriw n’a ka somɔgɔ dɔw weele u ka jɛn n’a ye ka kalan kɛ. An k’a ɲininga n’a ka baarakɛɲɔgɔnw, lakɔli filankuruw wala a lɔnbaga dɔw y’u mako don kibaro duman koo la. O cogo la, a be se k’a daminɛ ka seereya di olu ma. An k’a dɛmɛ a k’a faamu ko n’a be kumana Jehova Ala n’a sagonata koo la, a ka kan ka hakili sɔrɔ, a ka kan ka mɔgɔw bonya ani ka ninsɔndiya kɛ n’u ye.—Kolos. 4:6; 2 Tim. 2:24, 25.
3 An k’u dɛmɛ u ka kuma u ka lannakow koo la: A kɔrɔtalen be kosɔbɛ an ka kalandenw dege u ka baara kɛ ni Bibulu ye k’u ka lannakow kofɔ mɔgɔw ye. Kalan kɛtɔ n’u ye, an ka yɔrɔ dɔw ɲɛnatɔmɔ, ani an k’u ɲininga ko: “Cogo juman na i be se ka tɛmɛ Bibulu fɛ ka tiɲɛn kalan nin ɲɛfɔ i somɔgɔw ye?” wala “I be se ka tɛmɛ vɛrise juman fɛ k’o yira i teri dɔ la?” An k’a ka jaabili lamɛn, ani an k’a yira a la cogo min na a be se k’a ka kalan basigi Bibulu kan (2 Tim. 2:15). O cogo la, an bena to ka kalanden dege senfɛ waajuli kɛcogo la. Kɔfɛ, n’a ka koow nana dafa, a fana bena se ka jɛn ni kafo ye ka waajuli kɛ.
4 A ka ɲi an ka kalandenw dɛmɛ u k’u yɛrɛw labɛn ka bali kunbɛn (Mat. 10:36; Luka 8:13; 2 Tim. 3:12). Mɔgɔ wɛrɛw mana ɲiningali dɔ lawili, wala u mana lakalita dɔw kɛ Jehova Seerew koo la, o be se ka sira di kalandenw ma u ka seereya kɛ. Kitabunin Les Témoins de Jéhovah : Qui sont- ils ? Quelles sont leurs croyances ? be se k’u dɛmɛ u ‘labɛnnen ka sɔrɔ k’u jaabi.’ (1 Piɛre 3:15). Kunnafoni tigitigiw be sɔrɔ a kɔnɔ. Kalandenw be se ka tɛmɛ u fɛ k’u teriw n’u somɔgɔw dɛmɛ k’an ka lannakow n’an ka baara faamu n’o y’a sɔrɔ ŋaniya ɲuman b’u la.