Denbaya ka wagati labɛnsira: Kafo ka lajɛnw

¹ N’i ye kerecɛn bangebaga ye, i b’a fɛ i deenw ka bonya, ka Jehova kanu, ka baara kɛ a ye. Ani a laban, u ka ɲɛnamaya banbali sɔrɔ duniɲa kura kɔnɔ, Ala ye min layidu ta. Cogo juman na i be se k’u dɛmɛ ka Jehova batoli bila yɔrɔ fɔlɔ la u ka ɲɛnamaya kɔnɔ? E yɛrɛ ka ɲɛyirali kɔrɔtalen be kosɔbɛ o fan fɛ (Ntal. 20:7). Balimamuso dɔ hakili b’a bamuso ka ɲɛyirali la. A y’a fɔ ko: “Kuma tun t’a la k’an yɛrɛw ɲininga n’an bena taga lajɛn na.” O tora a hakili la fɔɔ wagati jan.

² Yala i ka denbaya mɔgɔw be kafo ka lajɛnw kuun faamu wa? An be kalan min sɔrɔ o lajɛnw na, o be barika don an na walisa an ka timinandiya Ala sago kɛli la. Ka fara o kan, an be jɛnɲɔgɔnya min kɛ n’an balimaw ye, o b’an jagwɛlɛya kosɔbɛ (Esayi 54:13; Rom. 1:11, 12). Nka, o lajɛnw kuun fɔlɔ ye ka Jehova “tanu jama cɛma.” (Zab. 26:12). Kafo ka lajɛnw be cogoya di an ma an ka Jehova bato ani an k’a yira ko an b’a kanu.

³ “A’ ye aw kɔrɔsi”: N’an be an ka lajɛnw kuun senuman faamu, o bena an dɛmɛ an k’an yɛrɛw kɔrɔsi an kana deli a la dɔɔni dɔɔni ka fɔn lajɛnw na koo gwansanw kosɔn (Efes. 5:15, 16; Heb. 10:24, 25). An kɛtɔ ka denbaya ka wagati labɛnsira kɛ, an ka ɲi k’a daminɛ ka kafo ka lajɛnw lɛri sɛbɛ fɔlɔ. O kɔ, an kana a to koo wɛrɛw ka na o labɛn fereke. An k’an janto ka lajɛnw tagali kɛ an ka denbaya ɲɛnako fɔlɔ ye.

⁴ An mana a kalan gafew kɔnɔ ko baliw bɛɛ n’a ta, balimaw be taga lajɛnw ni lajɛnbaw la, yala o tɛ dusu don an na wa? Hali n’i ka koow cogoya man gwɛlɛ ka se o ma, n’a sɔrɔ ile fana be gwɛlɛya dɔw kunbɛnna. Sitanɛ be koow gwɛlɛyara ka taga Ala sagokɛlaw bolo walisa u kana Jehova bato. O bɛɛ n’a ta, i ka la a la ko n’i ka denbaya cɛsirinen be ka taga lajɛnw na, i deenw ɲɛɛ bena kɛ a la. O cogo la, i bena hakilimaya delinanko di u ma, u tɛna ɲinɛ min kɔ abada.