An ka mɔgɔw hakili jagabɔ cogo degi koɲuman
1 Kɛwale 13:16-41 b’a fɔ ko ciden Pol ye kalan dɔ kɛ Antiose ka batoso dɔ kɔnɔ, Pisidi mara la. O kalan ye ɲɛyirali ɲuman ye: a be mɔgɔw hakili jagabɔ cogo yira. Pol y’a janto a lamɛnbagaw bɔyɔrɔ n’u miiricogo la. Ani, a ye kibaro duman fɔcogo yɛlɛma ka kɛɲɛ n’o ye. An kɛtɔ k’o lakalita lajɛ, an k’a filɛ cogo min na an fana be se k’o ɲɔgɔn kɛ waajuli kɛtɔ.
2 An k’a ɲini ka bɛn kelen kan n’an lamɛnbagaw ye: Pol tun y’a ka cira basigi Yesu ka lɔyɔrɔ kan k’a yira ko Ala sagonata tɛ se ka dafa o kɔ. Nka a m’a ka kalan daminɛ n’o miiriya ye. A lamɛnbaga caamanba tun ye Yahutuw ye. A kumana u fɛ koo dɔ kan, u sɔnna min ma: Yahutuw ka tariki koow. (Kɛw. 13:16-22). O cogo kelen na, an bena se ka mɔgɔw ɲɛɛ sama bɛrɛbɛrɛ k’u dusu sɔrɔ n’an b’a ɲini ka bɛn kelen kan n’u ye. O kama, n’a sɔrɔ an ka kan ka tɛmɛ ɲiningali nɛmɛnɛmɛw fɛ k’u lasun u ka kuma, ani an ka kan ka lamɛnni kɛ u fɛ koɲuman walisa k’a faamu min kɔrɔtalen be u ɲɛ na tigitigi.
3 Baro kɛtɔ Yahutuw ka tariki koow kan, Pol y’a lamɛnbagaw hakili jigi ko Ala tun ye layidu ta ka Dawuda bɔnsɔn dɔ lawuli ka kɛ Kisibaga ye. Nka Yahutu caaman tun be sɔrɔdasi jagwɛlen dɔ kɔnɔna, min tun bena u hɔɔrɔnya ka bɔ Romɛkaw bolo, ani ka Yahutuw ka siya kɔrɔta ka kɛ siyaw tɔɔw bɛɛ san fɛ. Siga t’a la, u tun b’a kala ma ko Jerusalɛm ka Yahutuw diinan kuntigiw banna Yesu la k’a don Romɛkaw faamanw bolo u k’a faga. Cogo juman na Pol tun bena a don u kuun na k’o cɛɛ nin ye Masiya ye, layidu tara min koo la?
4 An ka kibaro duman fɔcogo makɛɲɛ: Komi Pol tun b’a lamɛnbagaw miiricogo lɔn ka ban, a tɛmɛna Sɛbɛninw fɛ k’u hakili jagabɔ koo dɔw kan, u tun sɔnna minw ma ka ban. Ɲɛyirali fɛ, a y’a daminɛ ka kuma Yesu koo la i ko Dawuda bɔnsɔn, Yuhana batiselikɛla ye min kofɔ k’a faranfasi. Yahutu caaman tun b’o Yuhana jati Ala cira dɔ ye (Kɛw. 13:23-25). Pol y’a yira ka gwɛ ko diinan kuntigiw kɛtɔ ka ban Yesu la, ani k’a jalaki saya kama, u ye ‘Kiraw ka kuma dafa.’ (Kɛw. 13:26-28). Ka fara o kan, a y’a ɲɛfɔ ko seerew be yen, minw y’a ye ko Yesu kununa ka bɔ suuw cɛ ma. Ani, a y’a lamɛnbagaw hakili sama Bibulusen dɔw kan, u tun be minw lɔn ka ban. Yesu kununni tun b’o vɛrisew dafa.—Kɛw. 13:29-37.
5 Faan wɛrɛ fɛ, a tɛmɛna fɛɛrɛ wɛrɛ fɛ tuma min na a kumana ka ɲɛsin Grɛkiw ma Atɛnɛ ka kititigɛ yɔrɔ la (kɛw. 17:22-31). Nka a ye cira jɔnjɔn kelen lo fɔ. O kɛcogo fila la, tɔnɔ ɲuman sɔrɔla a ka jijali kɛli la (Kɛw. 13:42, 43; 17:34). O cogo kelen na, bi an bena sanga sɔrɔ bɛrɛbɛrɛ an ka cidenya baara la n’an b’a ɲini ka bɛn kelen kan n’an lamɛnbagaw ye, ani n’an b’an janto u bɔyɔrɔ n’u miiricogo la ka kibaro duman fɔcogo makɛɲɛ.
[Study Questions]
1. An bena lakalita juman lajɛ Bibulu kɔnɔ, ani mun na?
2. An be kalan juman sɔrɔ Pol ka kalan daminɛcogo la?
3. Mun na a tun bena gwɛlɛya Pol lamɛnbagaw fɛ u ka sɔn a la ko Yesu ye Masiya ye, layidu tara min koo la?
4. Cogo juman na Pol y’a lamɛnbagaw Yahutuw hakili jagabɔ ni hakilidiya ye?
5. (a) Pol kumatɔ Grɛkiw fɛ, cogo juman na a ye kibaro duman fɔcogo makɛɲɛ? (b) Seereya kɛtɔ mɔgɔw ye kafo ka kiinw kɔnɔ, cogo juman na an be se ka Pol ladegi?