Ɲɛyirali, bɛɛ fɛ: denmisɛnw fara mɔgɔkɔrɔbaw kan

A ye jɛnɲɔgɔnya teriman kɛ ni Ala ye. A y’a ka ɲɛnamaya bɛɛ kɛ Jehova sago kɛli la. A “taamana Ala fɛ”, ani a ye baraji sɔrɔ o la. O ye Nuhun ye, min ka ɲɛyirali ka kan ni ladegeli ye denmisɛnw fɛ ani mɔgɔkɔrɔbaw fana fɛ (Jen. 6:9). Videwo Noé : il marchait avec Dieu bena i dɛmɛ ka Nuhun ka ɲɛnamaya kɛcogo bisigi i hakili la, mun na a ye baraji sɔrɔ Jehova fɛ, ani ile be se k’a jogo ɲumanw ladegi cogo min na.

Videwo Noé be sɔrɔ DVD kan. Ɲiningali ninw b’a kɔnɔ. I k’a filɛ, ani o kɔ, i ka tɛmɛ ɲiningali ninw fɛ k’i ka lɔnniya sɛgɛsɛgɛ k’a filɛ: (1) Mɛlɛkɛ dɔw ye koo jugu juman kɛ, ani Nefilim tun ye jɔnw ye (Jen. 6:1, 2, 4)? (2) Mun na mɔgɔw tun juguyara ten, ani Ala y’o koo jati cogo di (Jen. 6:4-6)? (3) Cogo juman na Nuhun tun be daan na ni mɔgɔ tɔɔw ye (Jen. 6:22)? (4) Mɔgɔ juguw halakira cogo di (Jen. 6:17)? (5) Kurun bonya tun be cogo di (Jen. 6: 15)? (6) Nuhun ye baara wɛrɛ juman kɛ, ani mɔgɔw y’a jaabi cogo di (Mat. 24:38, 39; 2 Piɛre 2:5)? (7) Bɛgɛn sifaw bɛɛ la, joli-joli tun be kurun kɔnɔ (Jen. 72, 3, 8, 9)? (8) Sanji benna fɔɔ tile joli, ani jii ye dugukolo kuru bɛɛ datugu fɔɔ wagati juman (Jen. 7: 11, 12; 8: 3, 4)? (9) Mun na Nuhun n’a denbaya kisira (Jen. 6: 18, 22; 7:5)? (10) Kurun tara lɔ yɔrɔ juman na (Jen. 8:4)? (11) Cogo juman na Nuhun y’a lɔn ko farati t’a la ka bɔ kurun kɔnɔ (Jen. 8: 6-12)? (12) Nuhun bɔlen kɔ kurun kɔnɔ, a ye mun kɛ (Jen. 8:20-22)? (13) Sanmuru ye mun tagamasiɲɛ ye (Jen.9:8-16)? (14) Ka tagama ni Ala ye, o kɔrɔ ko di (Jen. 6:9, 22; 7:5)? (15) N’an b’a fɛ ka Nuhun ye alijɛnɛ kɔnɔ, an ka kan ka mun kɛ (Mat. 28:19, 20; 1 Piɛre 2:21)?

Bibulu b’a yira ko Nuhun tun ye mɔgɔ kantigiman ye min be kanminɛli kɛ. O lakalita ye kalan juman di i ma k’a yira cogo min na ile fana be se ka tagama ni Ala ye ani k’i jigi la a kan ko see be Jehova ye k’a ka mɔgɔw kisi bi tilew la?—Jen. 7:1; Nal. 10:16; Heb. 11:7; 2 Piɛre 2:9.