Cogo juman na i be se k’i ka laɲinitaw dafa Alako ta fan fɛ?
1 Ile min ye kerecɛn kamalen wala sunguru ye, fɛɛn min b’i dɛmɛ ka laɲinitaw latigɛ, siga t’a la, o ye Jehova kanu ye ani Yesu ka kumaw minw ɲɛsinna kerecɛnw bɛɛ ma. O kumaw ko “a’ ye Ala ka masaya ... ɲini fɔlɔ” (Mat. 6:33). N’a sɔrɔ i ka laɲinita ye ka dɔ fara i ka waajuli baara kan: ka kɛ piyɔniye ye, wala ka baara kɛ yɔrɔ min na u mako sɔbɛ be waajulikɛlaw la. N’a sɔrɔ dɔw be miirila k’u yɛrɛ di Masaya Boonw lɔli kama, ka baara kɛ Betɛli la, ka kɛ dan na piyɔniye ye, walima ka kɛ misɔnden wala boonw lɔbaga ye jamana wɛrɛw la n’a be se ka kɛ. Tiɲɛn na, nin ye laɲinitaw ye minw be mɔgɔ wasa ani u ka kan ni tandoli ye dɛ!
2 Fɛɛn min be se k’i dɛmɛ k’i ka laɲinitaw dafa Alako ta fan fɛ, o ye k’u sɛbɛ papiye kan. Saan 2004, zuwekalo tile 15nan ka La Tour de Garde tun b’a fɔ ko: “Ni miiriya dɔ gwɛnen tɛ an hakili la, an mana kumadenw sɔrɔ k’o sɛbɛ, a be gwɛ kelen. O kama, i k’i ka laɲinitaw sɛbɛ papiye dɔ kan. I bena tɛmɛ fɛɛrɛ minw fɛ k’u dafa, i k’o fana sɛbɛ.” Ka fara o kan, laɲinita dama kɛɲɛnenw be se k’i dɛmɛ k’a filɛ n’i be taga ɲɛ. O la, i tɛna ɲinɛ i ka laɲinita kuntagajan kɔ.
3 Laɲinita minw kuntaga man jan: N’i ma batise fɔlɔ, i k’a filɛ i ka kan ka min kɛ walisa k’o laɲinita dafa. N’a sɔrɔ i mako b’a la ka Bibulu ka kalansira jɔnjɔnw faamu. N’o lo, i k’a laɲini ka gafe Qu’enseigne la Bible ? kalan koɲuman, i kɛtɔ k’a kɔnɔna vɛrisew bɛɛ lajɛ (1 Tim. 4:15). I k’a latigɛ ka Bibulu kuturu bɛɛ kalan k’a ta Jenɛse ma ka taga se Jirali ma i n’a fɔ a ɲininen be Betɛli mɔgɔw ni Gilead kalandenw fɛ cogo min na. O kɔ, i k’i timinandiya Bibulu kalangwɛ la loon o loon (Zab. 1:2, 3). I ka miiri k’a filɛ cogo min na o bena i dɛmɛ ka yiriwa Alako ta fan fɛ! I ka delili kɛ n’i dusukun bɛɛ ye Bibulu kalangwɛ n’a sɛgɛsɛgɛri daminɛ na ani a laban na. Ani, i k’a ɲini tuma bɛɛ k’o kalan sira tagama.—Yak. 1:25.
4 N’i batisera ka ban, i be se ka laɲinita wɛrɛ jumanw magwɛn? Yala i mako b’a la k’i ka waajuli kɛcogo fisaya wa? Ɲɛyirali fɛ, mun na i t’a laɲini ka baara kɛcogo lɔn kosɔbɛ ni Ala ka Kuma ye waajuli la? (2 Tim. 2:15)? Cogo juman na i be se ka dɔ fara i ka waajuli baara kan? Ka kɛɲɛ n’i sanda n’i cogoya ye, i ka laɲinita tigitigi dɔw latigɛ minw kuntaga man jan, ani minw bena i dɛmɛ ka laɲinita kuntagajanw dafa.
5 A sera k’a ka laɲinita dafa: A saan 19nan na, Tony, tagara Betɛli dɔ filɛ. A nege donna a la ka kɛ Betɛliden. Nka a tulo tun ka gwɛlɛ, ani a yɛrɛ tun m’a yɛrɛkun di Ala ma fɔlɔ. Tony y’a latigɛ k’a ka ɲɛnamaya kɛcogo yɛlɛma ka bɛn ni Jehova sira ye. Ani, a y’a laɲini ka batɛmu ka saratiw dafa. O sarati dafanen kɔ, a y’a laɲini ka kɛ piyɔniye kɔrɔsigi ni kudayi piyɔniye ye. A y’a sɛbɛ a ka kalandiriye kan tuma min na a b’a fɛ k’a daminɛ. Piyɔniye baara kɛnen kɔ wagati dɔ kɔnɔ, u y’a weele ka na baara kɛ Betɛli la. I ka miiri k’a filɛ a dusu diyara cogo min na!
6 Ile fana be se k’i ka laɲinitaw dafa i kɛtɔ ka Masayakow bila yɔrɔ fɔlɔ la. I k’i ka “koɲɛw” kofɔ Jehova ye delili kɔnɔ, ani i k’i seko bɛɛ kɛ k’u dafa.—Ntal. 16:3; 21:5.
[Study Questions]
1. Kerecɛn kamalenw ni sunguru caaman ka laɲinitaw ye mun ye Alako ta fan fɛ?
2. Mun lo be se k’i dɛmɛ k’i ka laɲinitaw dafa Alako ta fan fɛ?
3. I ka laɲinita dɔw kofɔ minw kuntaga man jan, ani u be se ka mɔgɔ dɔ dɛmɛ ka batɛmu saratiw dafa.
4. Ni kerecɛn dɔ b’a fɛ ka kɛ Betɛli mɔgɔ wala misɔnden ye loon dɔ, a tigi be se ka laɲinita jumanw latigɛ minw kuntaga man jan?
5. Balimacɛ dɔ tun be Betɛli baara fɛ. Cogo juman na laɲinita kuntaga surunw latigɛli y’a dɛmɛ k’o sɔrɔ?
6. Mun lo be se k’i dɛmɛ k’i ka laɲinitaw dafa Alako ta fan fɛ?