“Ne mako t’a la”
1 Mɔgɔw ka teli k’an jaabi o cogo la yɔrɔ dɔw la. Mun lo bena an dɛmɛ an kana an farifaga ni kiin mɔgɔw t’u mako don an ka kibaro la? An be se ka kibaro duman diya don u la cogo di?
2 An ka to ninsɔndiya la: An bena to ninsɔndiya la n’an b’an hakili to mun kama mɔgɔ caaman t’u mako don an ka kibaro la. Mɔgɔ minw kalanna ko duniɲa yɛlɛmana ka na a yɛrɛ ma, wala minw balola yɔrɔ min na u b’a jati ko Ala tɛ yen, n’a sɔrɔ u tɛ sɔn ko nafa be Bibulu la. N’a sɔrɔ dɔw jigi tigɛra diinanw ka filankafoya kosɔn. Dɔw fana t’u mako don, sabu jigi t’u la (Efɛs. 2:12). Dɔ wɛrɛw tɛ sɔn ka mɛnni kɛ sabu u sɛgɛnnen be haminankow bolo.—Mat. 24:37-39.
3 Mɔgɔw mana ban an ka kibaro la cogo o cogo, an be se ka ninsɔndiya sɔrɔ cidenya baara la sabu an b’a lɔn ko an ka jijaliw be nɔɔrɔ la Jehova kan (1 Piɛrɛ 4:11). Ka fara o kan, an kɛtɔ ka tiɲɛn kofɔ mɔgɔw ye, hali a man di minw ye, an ka limaniya be barika sɔrɔ. An k’an jija ka kiin mɔgɔw jati i ko Jehova be u filɛ cogo min na. A makarila Ninivɛkaw la, minw tun tɛ “u kinin ni u numan dɔn” (Jonasi 4:11). An ka kiin mɔgɔw mako be kibaro duman na! O kama, an kana sɛgɛn, nka an ka cogoya ɲini ka Bibulu ka cira diya don u la.
4 An ka baro kɛ kiin kɔnɔ koow kan: Baro daminɛtɔ, n’a sɔrɔ i be se ka kiin kɔnɔ kibaro dɔ fɔ ani k’i lamɛnbaga ɲininga a be min miiri o kan. N’a be kuma, i ka mɛnni kɛ a fɛ. O kɔ, i ka Bibulu ka jigitugu kuma ta k’a jaabi. Balawo dɔ kɛnen kɔ, Seere dɔ tagara soo ni soo ka jigitugu kumaw fɔ mɔgɔw ye. A y’a fɔ ko: “Mɔgɔw y’a daminɛ ka baro kɛ yɔrɔnin kelen. O loon na, ne ye baro diiman kɛ n’u caaman ye sabu ne ye n’ mako don u la.”
5 Ala ka Masaya bena hadama-denya ka kunko kelen-kelen bɛɛ ɲɛnabɔ. I k’a ɲini k’a filɛ kunko min diginen be ka tɛmɛ i lamɛnbaga kan. N’a sɔrɔ a be se k’a to i ka Bibulu ka jigiya kuma ɲɛfɔ a ye. N’o tɛ, n’a sɔrɔ a labɛnnen “na i lamɛn don wɛrɛ tun.”—Kɛw. 17:32.