“Kɔrɔbɔli bɛ kun mɔgɔ min na, o ye dubaden ye”
1 Kerecɛnw bɛɛ ka kan k’a lɔn ko kɔrɔbɔliw bena kɛ u kan (2 Tim. 3:12). O be se ka kɛ kɛnɛyako, wariko, kɔnɔsuli, nintɔrɔ, wala gwɛlɛya sifa caaman wɛrɛw ye. Sitanɛ be kɔrɔbɔliw la an kan walisa an ka sumaya kerecɛn cidenya baara la, an kana an mako don a la, wala an yɛrɛ ka Ala ka baara dabila (Job 1:9-11). Kɔrɔbɔli muɲuli be na ni hɛɛrɛ ye cogo di?—2 Piɛrɛ 2:9.
2 I k’i yɛrɛ labɛn kɔrɔbɔliw kama: Jehova y’a ka tiɲɛn Kuma di an ma, o min kɔnɔ an be Yesu ka kalan n’a ka ɲɛnamaya kɛcogo sɔrɔ. An kɛtɔ ka Yesu ka kuma lamɛn ani k’a sira tagama, o be kɛ sababu ɲuman ye an fɛ k’an yɛrɛ labɛn kɔrɔbɔli kama (Luka 6:47-49). Labɛn wɛrɛw fana be fanga di an ma: an balimaw kafo kɔnɔ, kafo ka lajɛnw, jɔncɛ kantigiman hakiliman jɛnkulu ka gafew. Delili ye Ala ka nilifɛn ye. O fana b’an dɛmɛ n’an b’a kɛ tuma o tuma.—Mat. 6:13.
3 Jehova ye jigiya di an ma fana. N’an b’an ka limaniya sabati ka la Jehova ka layiduw la, an ka jigiya bena kɛ i ko “banamini. A sigilen sinsinnen don” (Heb. 6:19). Bibulu sɛbɛwagati la, hali ni saan ɲɛɛ tun ka ɲi, u tun tɛ taga ni kurun ye baji kan ni banamini tun t’a kɔnɔ. Ni sanfɔɲɔ tun barila ka wuli, u tun be banamini fili walisa kurun kana taga gosi kabakuru dɔw la ka karikari. O cogo kelen na, n’an b’an ka limaniya sabati Ala ka layiduw la sisan, o bena an sabati tuma min na gwɛlɛyaw bena cun an kan i ko sanfɔɲɔ. Kɔrɔbɔliw be se ka bari ka cun an kan. Hali ni Lisitre mɔgɔw tun kɔnna ka sɔn Pol ni Barnabasi ka waajuli ma ni dusudiya ye, koow barila ka yɛlɛma tuma min u juguw, Yahutu dɔw, sera.—Kɛw. 14:8-19.
4 Hɛɛrɛ be sɔrɔ muɲuli fɛ: Kɔrɔbɔli bɛɛ n’a ta, n’an be timinandiya waajuli baara la, an be hakilisigi sɔrɔ. N’u be an maloya Krista kosɔn, an be ɲagali k’o jati bonyali ye (Kɛw. 5:40, 41). Kɔrɔbɔliw muɲuli b’an dɛmɛ ka jogo dɔw yiriwa bɛrɛbɛrɛ an yɛrɛ la i n’a fɔ majigilenya, kanminɛli ani muɲuli (Dut. 8:16; Heb. 5:8; Yak. 1:2, 3). O b’an kalan an k’an jigi la Jehova kan, an ka la a ka layiduw la, ani an k’an yɛrɛ kalifa a ma.—Ntal. 18:10.
5 An b’a lɔn ko kɔrɔbɔliw ye koo tɛmɛtaw ye (2 Kɔr. 4:17, 18). Kɔrɔbɔliw be sababuw di an ma k’an ka kanuya dunya yira Jehova ta fan fɛ. An kɛtɔ k’u muɲu, an be se k’a yira ko Sitanɛ ka jalakili kumaw ye ngalon ye. O kama, an tɛ sɛgɛn muɲuli kɛli la! ‘Kɔrɔbɔli bɛ kun mɔgɔ min na, o ye dubaden ye, katuguni ni a tilennen sɔrɔla kɔrɔbɔli fɛ, a na ɲɛnamaya masafugula sɔrɔ.’—Yak. 1:12.