Kelenna kalan ani gwakalan kɔrɔtalen lo kosɔbɛ!
1 I ko saan kɛmɛkulu fɔlɔ la, Koow Ɲɛnabɔla Jɛnkulu b’a janto sɔbɛ la Jehova sagokɛlaw ka hɛɛrɛ koo la (Kɛw. 15:6, 28). Komi tɔɔrɔba be surunyana, a kɔrɔtalen lo kosɔbɛ Masaya weleweledalaw bɛɛ kelen-kelen ka jɛnɲɔgɔnya barikaman sigi u ni Jehova cɛ. Wagati min tun latigɛra kafo ka kitabu kalan kama, i bena mun kɛ o wagati la sisan? An be bɛɛ jija u ka batoli kɛ gwa kɔnɔ o wagati la. N’an be hakili sɔrɔ ka baara ɲuman kɛ n’o wagati ye, o ben’a to an ka Ala ka kuma sɛgɛsɛgɛ ka dunya walisa ka ɲɛnamaya jii sama ka bɔ a kɔnɔ.—Zab. 1:1-3; Rom. 11:33, 34.
2 Gwa kɔnɔ batoli suu fɛ: An be gwatigiw jija u k’u ka kunkanbaara dafa Jehova ɲɛɛ kɔrɔ walisa u ka se ka bibulukalan sɔbɛ kɛ gwa kɔnɔ tuma o tuma (Dut. 6:6, 7). Denbaya kunkanbaara tɛ balima cɛɛ ni muso gwana minw kan, u bena se k’o wagati ta ka kelenna kalan ni sɛgɛsɛgɛri kɛ Bibulu kɔnɔ. A kɔrɔtalen lo an bɛɛ fɛ ‘ka waati bɛnnen kunmabɔ’ ka Bibulu kalan ani ka miiri a kan walisa an ka to ka fanga sɔrɔ Alako ta fan fɛ sabu an be ‘don juguw lo la.’—Efɛs. 5:15, 16.
3 Fɛɛn minw be se ka kalan: Index des publications de la Société Watch Tower wala Watchtower Library CD-ROM be se ka aw dɛmɛ ka kunnafoniw sɔrɔ minw ben’a to gwakalan ka diya denbaya bɛɛ ye. Denbaya mɔgɔw be se ka La Tour de Garde ka barokunw dɔw lajɛ, minw be to ka bɔ tuma o tuma, i n’a fɔ: “Clés du bonheur familial”, “Enseignez vos enfants”, ani “Pour nos jeunes lecteurs”. Réveillez-vous ! fana be ni barokun nin ye: “Les jeunes s’interrogent.” Barokun diiman wɛrɛw be sɔrɔ a kɔnɔ ka ɲɛsin Ala ka fɛɛn dannen kabakomanw ma.
4 Ni denbaya mɔgɔw b’u dusu suma ka Bibulu kalangwɛ kɛ, u be se ka Bibulu ka sariyakolow ni a ka kalanw don bɛɛ kuun na ani u dusukun na (Heb. 4:12). Loon wɛrɛw la, aw be se ka ɔriganisasiyɔn ka kasɛti videwo dɔw filɛ ani ka baro kɛ u kan. Aw yɛrɛw be se ka ceguya ka kalankun dɔw ɲini aw yɛrɛw ye. Mun na aw tɛ aw ka gwamɔgɔw ɲininga min bena diya u ye?
5 Mun na a kɔrɔtalen lo bi le: An kɛtɔ k’an ka hakilimaya sabati, o bena an dɛmɛ k’an yɛrɛ labɛn “ka to kelen kan ka Jehova ka kisili kɛcogo filɛ” (Ekis. 14:13, NW). Bange-bagaw mako be Ala ka ɲɛminɛli la walisa k’u deenw lamɔ “mɔgɔ tulo gɛlɛnw cɛma” (Fil. 2:15). Bi, deenw mako be dɛmɛ na walisa k’u yɛrɛw tanga sɔnkolonya ma lakɔlisow la (Ntal. 22:3, 6). A ka ɲi furuɲɔgɔnmaw k’u ka “jurukisɛ saba melekelen” barika bonya u ni Jehova cɛ (Waaj. 4:12). O kama, an ka baara ɲuman kɛ ni wagati tɔɔ ye walisa k’an ka “dannaya senuma” sabati.—Jude 20.
[Study Questions]
1. Koow Ɲɛnabɔla Jɛnkulu b’a janto mun de la sɔbɛ la? Ani mun na a b’o kɛ?
2. Gwamɔgɔw be batoli min kɛ suu fɛ, o be se ka labɛn cogo di?
3, 4. An be se ka kalan kɛ ni minan jumanw ye, ani an ka laɲinita ye mun lo ye?
5. Bi-bi nin na, mun na a kɔrɔtalen lo kosɔbɛ ka kelenna kalan ni gwakalan kɛ Bibulu kɔnɔ?