Yala i be se ka dɔ fara i ka waajuli baara kan wa?
1. Makoya juman lo ye kɔrɔtɔko ye waajuli baara koo la, ani mun na do?
1 Yesu y’a ye ko mɔgɔ caamanba b’u mako don Masaya kibaro duman na minkɛ, a y’a fɔ a ka kalandenw ye ko u ka “Sumantigi deli ko a ka baarakɛlaw ci ka taa a ka suman tigɛ.” (Mat. 9:37, 38). Komi an be sumantigɛ wagati laban lo la, an ka baara ye kɔrɔtɔko ye bi ka tɛmɛ fɔlɔ kan. O kɔrɔ ko an ka kan ka delili kɛ ani ka miiri k’a filɛ cogo min na an be se ka dɔ fara an ka waajuli baara kan tugun.—Yuh. 14:13, 14.
2. Weeleli kan min ko baarakɛla caaman ka taga suma tigɛ, dɔw ye o jaabi cogo di?
2 Dɔ be fara waajuli baara kan cogo minw na: Jehova ka ɲɛminɛli ni a ka dɛmɛ sababu fɛ, dɔw y’a ye ko u be se ka piyɔniye baara daminɛ (Zab. 26:2, 3; Filip. 4:6). Dɔw be jijaliba kɛ walisa ka piyɔniye kɔrɔsigi baara kɛ kalo kelen wala kalo caaman saan kɔnɔ. O kɛra sababu ɲuman ye u fɛ ka dɔ fara u ka waajuli baara kan. U ye ninsɔndiya min sɔrɔ piyɔniye kɔrɔsigi baara la, o ye sababu di u caaman ma k’a ɲini ka kɛ kudayi piyɔniye ye.—Kɛw. 20:35.
3. N’i ye piyɔniye baara kɛ ka tɛmɛ, i be se ka miiri mun lo la sisan?
3 Yala i be se ka piyɔniye baara kɛ tugun wa?: N’i ye piyɔniye baara kɛ ka tɛmɛ, n’a sɔrɔ i hakili bele be o wagati ka koo diimanw na. Yala i ye delili kɛ ka miiri k’a filɛ n’i be se ka piyɔniye baara kɛ tugun wa? Koo minw tun kɛra sababu ye i y’o baara lalɔ, n’a sɔrɔ u tɛ bali ye tugun i seen kɔrɔ. N’a sɔrɔ o nɛɛma kɛrɛnkɛrɛnnin sɔrɔ wagati sera i fɛ tugun.—1 Yuh. 5:14, 15.
4. Sababu juman lo dira an bɛɛ ma min ɲɔgɔn tɛ yen?
4 Sumantigɛ baara be seen kan kosɔbɛ ani a bena ban yanni dɔɔni ( Yuh. 4:35, 36). A ka ɲi an bɛɛ ka an ka koow sɛgɛsɛgɛ k’a filɛ n’an be se ka labɛn dɔ kɛ walisa ka dɔ fara an ka waajuli baara kan. Nka, n’an y’a ye ko an tɛ se ka dɔ fara an ka waajuli baara kan, yala an be se k’a ɲini k’o baara kɛcogo fisaya wa? (Marka 12:41-44). Jehova ye baara min kalifa an ma, o ɲɔgɔn tɛ yen. Minw bɛɛ ka koow be sira di u ma sisan k’u seen don o baara la o ye nɛɛma ye u fɛ dɛ!—Zab. 110:3.