An ka Jehova tando loon o loon
1. Ala sagokɛlaw cɛsirinen lo ka mun lo kɛ ani mun na?
1 Masacɛ Dawuda y’a fɔ ko ale cɛsirinen lo ka Jehova tando “don o don” fɔɔ abada (Zab. 145:2, 7, 21). An fana be ni sababu ɲuman ye ka Jehova tando loon o loon.—Zab. 37:10; 145:14, 18; 2 Piɛrɛ 3:13.
2. Denbayaw be se ka Jehova tando loon o loon cogo di?
2 An ka soow kɔnɔ: Gafe nafamanw b’an fɛ minw b’an dɛmɛ ka baro diiman kɛ Ala ni Bibulu koo la an ka tilera kalan wagati la, an ka gwa kɔnɔ batoli ani kafo ka lajɛnw labɛn wagati la. Denbaya caaman y’a kɛ u delinanko ye ka jɛn ka domuni kɛ ɲɔgɔn fɛ siɲɛ kelen ɲɔgɔn tile kɔnɔ. O b’a to gwamɔgɔw ka baro kɛ u sago la ni dusudiya ye ani ka sababu sɔrɔ ka Jehova tando. Ni bangebagaw b’o baro sifaw ɲɔgɔn kɛ, o be se k’u dɛmɛ k’u deenw lamɔ “ni Matigi ka kololi ni a ka laadili ye.”—Efɛs. 6:4; Dut. 6:5-7.
3. N’an b’an balimaw cɛma, sababu jumanw lo b’an fɛ ka Jehova tando?
3 An n’an balimaw: An be sababu ɲuman sɔrɔ ka Jehova tando n’an kerecɛnɲɔgɔnw ye waajuli kɛyɔrɔw la wala kafo ka lajɛnw na (Ntal. 15:30; Fil. 4:8; Heb. 13:15). Komi an bɛɛ be Jehova kanu, a ka kan ka kɛ koo nɔgɔman ye an fɛ, baro kɛtɔ, an k’a yira ko an be Jehova waleɲuman lɔn a ka ɲumanya kosɔn.—Zab. 106:1.
4. Koo jumanw sen fɛ an be se ka Jehova tando?
4 N’an be kumana ni dannabaliw ye: Ni cogoyaw tɛ an fɛ ka waajuli kɛ loon o loon, hali n’an be baro kɛ dɔɔni n’an baarakɛɲɔgɔnw ye, lakɔli filankuruw ani an sigiɲɔgɔnw ye Jehova n’a ka sagonataw koo la, o be se ka jigiya di mɔgɔ kɔnɔgwɛw ma (Zab. 27:14; 1 Piɛrɛ 3:15). Balimamuso dɔ ye seereya di a musoɲɔgɔn dɔ ma awiyɔn kɔnɔ. O muso ye min mɛn, o ye barika don a la ani k’a dusu saalo hali fɔɔ a y’a ka ladɛrɛsi n’a ka telefɔni nimɔrɔ di balimamuso ma walisa u ka to ka kibaro di ɲɔgɔn ma. Hali k’a to duniɲa ka koow be gwɛlɛyara ka taga, mɔgɔ minw be sɔn ka lamɛnni kɛ, Jehova Seerew be to ka “fɛn ɲuman kibaru duman fɔ” olu ye. O be jigiya di mɔgɔ wɛrɛw ma ani k’u lasun ka Jehova tando.—Es. 52:7; Rom. 15:11.
5. Mun na an b’a fɛ ka Jehova tando ani an be se k’o kɛ cogo di?
5 Jehova sagokɛlaw kɛtɔ k’a tando loon o loon, o ka kan ka kɛ ninsɔndiya koo ye a fɛ dɛ! I ko Jehova ka danfɛn minw b’an lamini, an fana be se k’a tando loon o loon an ka soow kɔnɔ, kafo kɔnɔ ani n’an be kumana ni mɔgɔ wɛrɛw ye minw tɛ Jehova tando n’an ye fɔlɔ.—Zab. 19:2-5.