I k’i niin di kalandenw kosɔn
1. An ka kan ka mun lo kɛ walisa ka Bibulu kalanden dɛmɛ?
1 Walisa ka kalanden dɛmɛ fɔɔ a k’a yɛrɛkun di Jehova ma, o tɛ dan ka Bibulu kalan kɛ n’a ye tuma o tuma dɔrɔn. Denbatigi b’a deenw minɛ ni kanuya ye cogo min na, Pol y’a yira ko ale tun be a ka kalandenw minɛ ten. A ɲininen be an fana fɛ an ka “an niw yɛrɛ” di kalandenw kosɔn walisa k’u dɛmɛ ka ɲɛtaga kɛ Alako ta fan fɛ.—1 Tes. 2:7-9.
2. Mun na an ka kan k’an mako don kalanden na ani an be se k’o kɛ cogo di?
2 I k’i mako don u la: Bibulu kalanden kɛtɔ ka kalan sira tagama, a dusukun bena a lasun k’a mabɔ mɔgɔw la minw tɛ Bibulu ka sariyaw bato (1 Piɛrɛ 4:4). A somɔgɔw be se ka ban a la (Mat. 10:34-36). N’an b’an mako don a la ni kanuya ye, a be se k’a teri kɔrɔw n’a somɔgɔw ka kanuya ɲɔgɔn sɔrɔ an fɛ. Misɔnden kolɔnbaga dɔ b’an jija ko: “Kalan bannen kɔ, aw kana kɔrɔtɔ ka sira deli. N’a bɛnnen lo, a’ ye to yen ka baro kɛ dɔɔni.” A’ y’a bɔ aw yɛrɛ la ka kalanden dɛmɛ cogo nafaman na. Ɲɛyirali fɛ, n’a man kɛnɛ aw be se k’a weele telefɔni fɛ wala ka taga bɔ a ye. N’a bɛnnen lo, aw be se ka sigi n’a ye lajɛnw na ani k’a dɛmɛ k’a deenw kɔrɔsi.
3. An be se ka mun lo kɛ walisa an ka kalanden ka jijali sɔrɔ kafodenw fɛ?
3 Kafodenw ka dɛmɛ: N’aw be waajuli kɛra i ka kalanden ka soo gɛrɛ fɛ, i be se ka taga bɔ a fɛ dɔɔni k’i ka waajulikɛɲɔgɔnw yira a la. N’a bɛnnen lo, i k’a to balima dɔw, hali diinan mɔgɔkɔrɔw, k’i bila sira ka taga a ka kalan kɛ tuma dɔw la. I mana kalan basigi ni kalanden ye, dɔɔni o kɔ, i k’a jija a ka na lajɛnw na Masaya Boon na. O bena a to a be jɛnɲɔgɔnya diiman kɛ ni kafodenw ye. Olu lo be se ka na kɛ a balimaw ye Alako ta fan fɛ.—Marka 10:29, 30; Heb. 10:24, 25.
4. N’an b’an sɔbɛ don ka mɔgɔw kalan Bibulu la, nafa juman be se ka sɔrɔ o la?
4 Bangebaga min tɛ sɛgɛn k’a deenw dɛmɛ Alako ta fan fɛ, a be ninsɔndiya kosɔbɛ tuma min na u be sɔn Jehova ma ani u be tiɲɛn sira tagama (3 Yuh. 4). An fana be se k’o ninsɔndiya ɲɔgɔn sɔrɔ n’an b’an niin di walisa k’an ka kalandenw dɛmɛ.