Karamɔgɔ ɲuman ka jogo kɔrɔtaninba
1. Karamɔgɔ ɲuman ka jogo kɔrɔtaninba ye juman lo ye?
1 Mun lo be mɔgɔ kɛ Bibulu karamɔgɔ ɲuman ye? Lakɔli kalan wa? Koo caaman lɔnni wa? An yɛrɛ ka setigiya wa? Tiɲɛn na, sariya bɛɛ be dafa o jogo kelen lo fɛ. Yesu ka kalandenw be faranfasi o jogo lo fɛ fana ani Ala ka jogo cɛɲumanba lo min kɔrɔtanin be ka tɛmɛ a ka jogo kabakomanw bɛɛ kan (Yuh. 13:35; Gal. 5:14; 1 Yuh. 4:8). O jogo ye kanuya lo ye. Karamɔgɔ ɲumanw be kanuya lo yira.
2. Mun na a kɔrɔtanin lo an ka mɔgɔw kanu?
2 An ka mɔgɔw kanu: Karamɔgɔba Yesu tun be mɔgɔw kanu ani o lo tun be mɔgɔw lasun ka mɛnni kɛ a fɛ (Luka 5:12, 13; Yuh. 13:1; 15:13). N’an b’an janto mɔgɔw la, an bena se ka seereya kɛ u ye sababuw bɛɛ la. Baliw tɛna an fari faga, i n’a fɔ kɔrɔbɔli wala ni mɔgɔ t’u mako don an ka kuma na. An be mɔgɔ minw waaju an bena an mako don kosɔbɛ olu la, ani an bena an ka yiracogow makɛɲɛ u ka makoya ma. A ka di an ye ka wagati kɛ ni Bibulu kalanden kelen kelen bɛɛ ye. Nka an tɛ dan o ma, an be wagati ta fana k’an yɛrɛ labɛn ka sɔrɔ ka taga kalan kɛ n’u kelen kelen bɛɛ ye.
3. N’an be Bibulu ka tiɲɛn kalanw kanu, o bena an dɛmɛ cogo di waajuli la?
3 An ka Bibulu ka tiɲɛn kalanw kanu: Yesu fana tun be Bibulu ka tiɲɛn kalanw kanu ani a tun b’u jati nafolo ye (Mat. 13:52). N’an be tiɲɛn kanu an bena kuma ni dusudiya ye ani o be se ka tiɲɛn koo diya an lamɛnbagaw ye. O kanuya ɲɔgɔn bena an dɛmɛ an k’an ɲɛɛ jɔlen to kibaro nafaman kan an be min lasera mɔgɔw ma. An tɛ se min na, an tɛna an ɲɛɛ jɔlen to o kan ani an tɛna an ɲɛɛ sisi waajuli la.
4. An be se k’an yɛrɛ degi kanuya la cogo di?
4 An k’an yɛrɛ degi kanuya la: An be se k’an yɛrɛ degi ka mɔgɔw kanu cogo di? Jehova n’a dencɛ ye kanuya min yira ani an ka kiinmɔgɔw be dibi la cogo min na Alako ta fan fɛ, n’an be miiri o la an bena mɔgɔw kanu (Marka 6:34; 1 Yuh. 4:10, 11). An ka kanuya bena bonya Bibulu ka tiɲɛn kalanw koo la n’an be kelenna kalan kɛ tuma o tuma ani n’an be miiri koo kalanniw kan. Kanuya ye hakili senu deen fan dɔ ye (Gal. 5:22). O kama an be se ka hakili senu deli Jehova fɛ ani k’a ɲini a fɛ a k’an dɛmɛ an ka kanuya ka bonya (Luka 11:13; 1 Yuh. 5:14). An ka lakɔli kalan, an ka tiɲɛnkow lɔnni ani an yɛrɛ ka setigiya mana kɛ min o min ye, an be se ka kɛ Bibulu karamɔgɔ fisamanw ye n’an be mɔgɔw kanu.