Ladili saba walisa k’i ka kalan kɛcogo fisaya

1. Mun na an ka kan k’a ɲini k’an ka kalan kɛcogo fisaya?

¹ Kerecɛn cidenw bɛɛ ye karamɔgɔw ye. A ka kɛ ɲɔgɔnyeko fɔlɔ ye wo, viziti kura, wala bibulukalan ye, an be mɔgɔw kalanna hakilinata dɔ lo la. O hakilinata tɛ koo gwansan ye. An be mɔgɔw dɛmɛ u ka “Kitabu senumaw” faamu o minw be se ka ‘hakilitigiya di u ma, walisa u ka kisi.’ (2 Tim. 3:15). Nin ye nɛɛmaba ye an fɛ dɛ! Ladili saba dɔw filɛ minw be se k’an dɛmɛ k’an ka kalan kɛcogo fisaya.

2. An be se ka mɔgɔw kalan cogo nɔgɔman na cogo di?

² Kalan kɛ cogo nɔgɔman na: N’an be koo dɔ lɔn ka ɲɛ, an ka teli ka ɲinɛ ko mɔgɔ min t’o koo lɔn, a faamuli be se ka gwɛlɛya ale ma. O kama, n’i be bibulukalan kɛra, kana kunnafoni misɛnman caaman fara kalan kan gwansan. Nka, i ka hakilinata jɔnjɔnw yira ka gwɛ. Kuma caaman fɔli tɛ kalan kɛcogo ɲuman ye (Ntal. 10:19). Tuma caaman na, a ka fisa i ka vɛrise jɔnjɔnw dɔrɔn kalan n’a tigi ye. N’i ye vɛrise dɔ kalan ka ban, a yɔrɔ min ɲɛsinna kalan ma, i ka sinsin o dɔrɔn kan. Yesu ye kalan min di kulu kan ani o sɛbɛra Matiyu sapitiri 5-7 kɔnɔ, tiɲɛn kuma dɔw be sɔrɔ o kɔnɔ minw kɔrɔ ka dun kosɔbɛ. Nka, Yesu ye u fɔ cogo nɔgɔman na ani a ma kuma caya.

3. Nafa juman be jaaw ni ntalen kumaw na, ani tuma caaman na u sifa jumanw lo ka fisa?

³ Ntalen kumaw ni jaaw: U be mɔgɔ lasun a ka miiri, u be dusukunnataw lawuli ani u be mɔgɔ dɛmɛ ka kalan mara i kɔnɔ. Kana a miiri ko i tɛ se ka ntalen kuma ɲumanw fɔ n’i tɛ maana caaman lɔn. Yesu ye ntalen kuma minw fɔ, u man jan, ani u faamuli ka nɔgɔ (Mat. 7:3-5; 18:2-4). Hali jaa gwansan minw be sɛbɛ kan, olu fana nafa ka bon kosɔbɛ. N’i be kɔn k’i yɛrɛ labɛn, i be se ka ntalen kuma ɲumanw sɔrɔ.

4. An be se ka baara kɛ bɛrɛbɛrɛ ni ɲiningaliw ye cogo di?

⁴ Ɲiningaliw: U be kalanden lasun a ka miiri. O kama, n’i ye ɲiningali dɔ kɛ kalanden ye, i ka muɲu. N’i kɔrɔtɔra ka jaabili di a nɔɔ na, i tɛna a lɔn a be min faamu tiɲɛn na. N’a m’a jaabi ka ɲɛ, sanni i k’a ka jaabili latilen, a ka fisa i ka ɲiningali wɛrɛw kɛ k’a dɛmɛ a yɛrɛ ka jaabili ɲuman sɔrɔ (Mat. 17:24-27). Tiɲɛn na, an si tɛ karamɔgɔ dafanin ye. O lo kama Bibulu b’an jija ko an k’an janto an ka kalan kɛcogo la tuma bɛɛ. N’an y’o kɛ, an n’an lamɛnbagaw bena duga banbaliw sɔrɔ o la.—1 Tim. 4:16.