Mun lo b’an lasun ka waajuli kɛ?

1. Kanuya b’an lasun ka mun lo kɛ?

¹ Bi, baara si nafa man bon ka se Ala ka Masaya kibaro diiman waajuli baara ma. O baara sababu fɛ, an b’a yira ko cikan fila minw ka bon tɔɔw bɛɛ ye, an be olu labato: o ye ka Jehova kanu ani k’an mɔgɔɲɔgɔn kanu (Marka 12:29-31). O kanuya lo b’an lasun ka waajuli kɛ ni kisɛya ye.—1 Yuh. 5:3.

2. An ka waajuli baara b’a yira cogo di ko an be Jehova kanu?

² Kanuya, Jehova koo la: Jehova y’an teri sɔbɛ ye. Kanuya lo b’an lasun ka kuma a koo la. A saan 6 000 ɲɔgɔn ye nin ye, Sitanɛ ye ngalonfin la a kan (2 Kɔr. 4:3, 4). O lo kama, mɔgɔw b’a miiri ko Ala be jurumukɛlaw jɛni jahanama kɔnɔ, ko a ye Ala tigiya saba ye mɔgɔ tɛ se ka min faamu ani ko a t’a janto adamadenw na. Mɔgɔ caaman yɛrɛ b’a fɔ ko Ala tɛ yen. O lo kosɔn, an b’a fɛ sɔbɛ la mɔgɔw ka tiɲɛn lɔn an sankolola Faa koo la. N’an b’an jija sɔbɛ la ka seereya kɛ Ala koo la, o b’a ninsɔndiya kosɔbɛ ani o be Sitanɛ dusu gwan.—Ntal. 27:11; Heb. 13:15, 16.

3. An ka waajuli baara b’a yira cogo di ko an be an mɔgɔɲɔgɔn kanu?

³ Kanuya, an mɔgɔɲɔgɔn koo la: An mana waajuli kɛ mɔgɔw ye, an b’a yira o sen fɛ ko an b’u kanu. Bi wagati gwɛlɛ nin na, mɔgɔw jigi tigɛnin mako b’a la ka kibaro diiman mɛn. U caaman be i n’a fɔ Ninivɛkaw Jonasi ka wagati la. U tɛ u “kinin ni u numan dɔn.” (Jonasi 4:11). An ka waajuli baara be mɔgɔw dɛmɛ ka ɲɛnamaya kɛ cogo ɲuman na ani hɛɛrɛ la (Es. 48:17-19). A be jigiya di u ma (Rom. 15:4). An b’u kalan min na, n’u sɔnna k’o lamɛn ani k’o sira tagama, u “na kisi.”—Rom. 10:13, 14.

4. Jehova tɛna ɲinɛ mun lo kɔ abada?

⁴ Deen ɲumanw t’a yira k’u b’u bangebagaw kanu wagati tigitigi dɔw la dɔrɔn. Nka, u b’u jija k’u kanu tuma bɛɛ. O cogo kelen na, n’an be Jehova n’an mɔgɔɲɔgɔn kanu kosɔbɛ, o lo bena an lasun ka sababuw ɲini ka seereya kɛ tuma bɛɛ. An tɛna dan wagati tigitigi dɔw dɔrɔn ma. An tɛna waajuli kɛli dabila (Kɛw. 5:42). Jehova tɛ ɲinɛ o kanuya ɲɔgɔn kɔ abada!—Heb. 6:10.