An ka kiraw ladegi: Mise
1. N’a sɔrɔ Mise delila k’a yɛrɛ ɲininga mun lo la? Nka, mun na a ka waajuli ma kɛ fuu ye?
1 ‘Duniɲa jugu nin bena ban tuma juman sa?’ N’a sɔrɔ kira Mise delila k’a yɛrɛ ɲininga o la, tuma min na a tun be Jehova ka kitikow fɔra Israɛl ni Juda ka masayaw kama. Nka a ka waajuli ma kɛ fuu ye. Jehova ye min fɔ Samari koo la, o dafara saan 740 ka kɔn Krista tile ɲɛ, ka Mise to sii la (Mise 1:6, 7). Kɔfɛ, Zeruzalɛmu halakira saan 607 ka kɔn Krista tile ɲɛ (Mise 3:12). Bi fana, Jehova bena kiti tigɛ duniɲa jugu nin kan. An kɛtɔ k’o loon makɔnɔ, an be se ka Mise ladegi cogo di?
2. An kɛtɔ ka Jehova ka loon makɔnɔ, an b’a yira cogo di ko an be muɲuli kɛ ani mun na do?
2 Muɲuli kɛ: Mise y’a sɛbɛ ko: “Ne na ne ɲɛsin Matigi ma. Ne na ne Kisibaa Ala makɔnɔ.” (Mise 7:7, Bible senuma, 1996). Mise kɔni m’a bolow kuru ka sigi ka Israɛl ni Juda laban makɔnɔ. A bolo tun degunnin lo ka kiraya kɛ Jehova tɔgɔ la. An kɛtɔ ka Jehova ka loon makɔnɔ, an ka ɲi ka “siran Ala ɲa” ani k’a to an “tagamacogo ka ɲa.” (2 Piyɛri 3:11, 12). Jehova be muɲu ka wagati to mɔgɔw fɛ u ka nimisa (2 Piyɛri 3:9). O lo kama an be tugu Bibulu ka ladili kɔ ka kiraw ka muɲuli ladegi.—Zaki 5:10.
3. Mun na an ka ɲi ka hakili senu deli Jehova fɛ?
3 Fanga ɲini Jehova fɛ: Mise ka baara tun man nɔgɔ. Nka, a ye fanga ɲini Jehova fɛ walisa ka se k’o dafa (Mise 3:8). A tɛ bari an na k’a ye ko Ala ka Kuma b’an jija ko an ka fanga ɲini Jehova fɛ. Mɔgɔ minw sɛgɛnnin lo, Jehova be fanga di olu ma caaman walisa u ka se k’u ka baara senumanw kɛ (Zab. 84:6, 8; Ezayi 40:28-31). Yala o koo ɲɔgɔn delila ka kɛ i la wa? Yala i be to ka Jehova deli walisa a k’i dɛmɛ n’a ka hakili senu barikaman ye wa?—Luka 11:13.
4. An be kalan nafaman juman sɔrɔ Mise ka koo la?
4 Mise ka ɲɛnamaya bɛɛ la, Ala sago kɛli tun ye a ɲɛnako fɔlɔ ye. A sigiɲɔgɔnw ka sɔnkolonya bɛɛ n’a ta, a tun banbanin lo ka kantigiya kɛ. Bi fana, an ka kantigiya be kɔrɔbɔ loon o loon. O kama, an ka banba ka “taama Matigi, an ka Ala tɔgɔ la don o don fo badaa.”—Mise 4:5, Bible senuma, 1996.