An be se ka bibulukalanw kɛ bɛrɛbɛrɛ cogo min na
1. An be ni kunkanbaara juman lo ye?
1 Mɔgɔ si tɛ se ka Ala bato ni Jehova yɛrɛ “sababu tɛ” (Zan 6:44). O bɛɛ n’a ta, weleweledala minw be bibulukalanw kɛ, olu fana ka kan k’u seko kɛ ka kalandenw dɛmɛ u k’u magwɛrɛ u sankolola Faa la (Zaki 4:8). O kama, a kɔrɔtanin lo an k’an yɛrɛ labɛn. N’i be dakun kelen kelen bɛɛ kalan ani ka ɲiningali kɛ dɔrɔn, o dama tɛ se ka kalanden dɛmɛ a ka faamuyali kɛ ani ka ɲɛtaga sɔrɔ.
2. Ni bibulukalan kɛcogo ka ɲi, a bena kalanden dɛmɛ ka mun lo kɛ?
2 Walisa ka bibulukalanw kɛ bɛrɛbɛrɛ, weleweledalaw ka kan k’u ka kalandenw dɛmɛ: 1) ka Bibulu ka kalanw faamu, 2) ka sɔn Bibulu ka kalanw na, 3) ani ka Bibulu ka kalanw sira tagama (Zan 3:16; 17:3; Zaki 2:26). Ka se ka mɔgɔ dɛmɛ ka o koo nunu dafa, a be se ka kalo damanin ta. O koo kelen kelen bɛɛ ye ɲɛtaga dɔ ye a tigi ka kan ka min kɛ walisa k’a ka jɛnɲɔgɔnya sabati ni Jehova ye ani k’a yɛrɛkun di a ma.
3. Mun na kalanfa ɲumanw ka ɲi ka kalanden ɲininga a ka fɛtaw la?
3 Mun lo be kalanden kɔnɔ?: N’an b’a fɛ k’a lɔn ni kalanden be kalanw faamu ani n’a sɔnnin be u la, an kana kuma kɛ an kelen ta ye. Nka, an k’a lasun a k’a kɔnɔnakow fɔ (Zaki 1:19). Aw be barokun min lajɛra, yala a b’a faamu Bibulu be min fɔ o koo la wa? Yala a be se k’o ɲɛfɔ a yɛrɛ kumacogo la wa? A ye min kalan, a be mun lo miiri o la? Yala Bibulu ka fɔta bɛnnin lo a ɲɛɛ kɔrɔ wa? (1 Tes. 2:13). Yala a b’a faamu ko a be min kalanna, o ka ɲi k’a lasun a k’a ka ɲɛnamaya kɛcogo yɛlɛma wa? (Kɔlɔs. 3:10). N’an b’a fɛ ko koow lɔn, an ka kan ka ɲiningaliw kɛ nɛmɛnɛmɛ ani ka lamɛnni kɛ walisa k’a tigi kɔnɔnakow lɔn.—Mat. 16:13-16.
4. Ni kalanden tɛ sera ka kalan dɔ faamu wala k’a sira tagama, an ka kan ka mun lo kɛ do?
4 Mɔgɔ ka delinankow n’a ka miiricogo ka teli ka basigi kosɔbɛ a kɔnɔ. A ka gwɛlɛ o tigi fɛ k’o dabila joona (2 Kor. 10:5). Kalanden be min kalanna, n’a tɛ sɔn o la wala n’a t’o sira tagamana do? O la, fɔɔ an ka muɲu kalanden kɔrɔ wagati bɛnnin dɔ kɔnɔ walisa Ala ka Kuma ani hakili senu ka se ka baara kɛ a dusukun na (1 Kor. 3:6, 7; Eburuw 4:12). Ni kalanden tɛ sera ka kalan dɔ faamu wala k’a sira tagama, sanni an k’a waajibiya, tuma caaman na, a ka fisa an ka barokun wɛrɛ lajɛ n’a ye. N’an be muɲu a kɔrɔ ani n’an tora k’a kalan Bibulu la ni kanuya ye, n’a sɔrɔ kɔfɛ, o bena a lasun ka yɛlɛmani bɛnninw kɛ.