An ka baarakɛminanw
1. Cogo juman na waajulikɛlaw be i n’a fɔ bololabaarakɛlaw?
1 Bololabaarakɛla ŋana be baara kɛ ni minan sifa caaman ye. A mako be u dɔw la tuma kelen kelen dɔrɔn walisa ka baara tigitigi dɔw kɛ. Nka, a be baara kɛ ni minan jɔnjɔn dɔw ye tuma o tuma. Olu tɛ fɔn a ka sakɔsi kɔnɔ ani a be se baarakɛcogo la koɲuman n’u ye. Bibulu be an kelen kelen bɛɛ jija an k’an timinandiya waajuli la ani an ka kɛ baarakɛla sɔbɛ ye maloya sababu tɛ min ka baara la (2 Tim. 2:15). An be tɛmɛ baarakɛminan minw fɛ ka mɔgɔw ‘kɛ Krista ka kalandenw ye,’ juman lo ye u bɛɛ la fɔlɔ ye? Bibulu lo (Mat. 28:19, 20). O kama, an ka ɲi k’an jija ka se baarakɛcogo la koɲuman ni Ala ka Kuma ye. Nka, minan wɛrɛw be yen an ka sakɔsi kɔnɔ, an ka teli ka baara kɛ ni minw ye. An bɛɛ ka ɲi k’an yɛrɛ degi baarakɛcogo la n’u ye koɲuman walisa ka mɔgɔw kalan tiɲɛn koo la.—Talenw 22:29.
2. Baarakɛminan jɔnjɔn jumanw lo b’an fɛ?
2 An ka baarakɛminan jɔnjɔnw: Ka Bibulu niin bɔ a la, baarakɛminan jumanw lo b’an fɛ? U la fɔlɔ ye nin ye: Kalan tigitigi juman be Bibulu kɔnɔ? An be tɛmɛ ale lo fɛ ka mɔgɔw kalan tiɲɛn koo la. N’an ye o gafe kalan ka ban ni kalanden ye do? An be gafe nin lajɛ ni kalanden ye walisa k’a dɛmɛ a ka Bibulu ka sariyakolow sira tagama: “A’ ye to Ala ka kanuya la”. O kama, fɔɔ an ka se mɔgɔw kalancogo la koɲuman n’o gafe fila ye. An be tɛmɛ kitabunin minw fɛ ka bibulukalan daminɛ ni mɔgɔw ye, nin ye olu dɔ ye: “Kibaro diiman min bɔra Ala yɔrɔ.” N’an ka kiinmɔgɔw tɛ se kalan na ka ɲɛ do? U be kaan min fɔ, n’an ka gafe si wala caaman tɛ sɔrɔ o kaan na do? N’o lo, an be se ka baara kɛ ni kitabunin nunu dɔ ye: Mɛnni kɛ Ala fɛ wala Mɛnni kɛ Ala fɛ ani to niin na fɔɔ abada. An be tɛmɛ nin kitabunin lo fɛ ka kalandenw dɛmɛ u ka na Jehova ka ɔriganisasiyɔn kɔnɔ: Jɔn lo be Jehova sago kɛra bi? Videwo nunu fana be se k’an dɛmɛ ka mɔgɔw kɛ Krista ka kalandenw ye: “Mun na i ka ɲi ka bibulukalan kɛ?”, “Mun lo be kɛ an ka Masaya boonw kɔnɔ?” ani “Dieu a-t-il un nom ?” An ka ɲi k’an yɛrɛ degi baarakɛcogo la koɲuman n’olu fana ye.
3. An ka Masaya Cidenyabaara nataw bena an dɛmɛ mun lo la?
3 Gafe jɔnjɔn minw tɛ fɔn an ka sakɔsi kɔnɔ, An ka Masaya Cidenyabaara nataw bena an dɛmɛ an ka se mɔgɔw kalancogo la koɲuman n’u ye. N’an b’an jija ka baara kɛ n’u ye koɲuman, an be Ala ka ladilikan nin lo sira tagamana: “I yɛrɛ minɛ ani k’i ka mɔgɔ kalancogo kɔlɔsi fana. E k’i jija o la, n’o kɛra, i bena i yɛrɛ kisi ani k’i lamɛnbagaw fana kisi.”—1 Tim. 4:16.