A ɲini k’i ka waajuli kɛcogo fisaya: Kalandenw dɛmɛ koɲuman walisa kalan ka kɛ u delinanko ye

Mun na a kɔrɔtanin lo: Walisa ka se ka taga ɲɛ ani ka kɔgɔ Alako ta fan fɛ, Bibulu kalandenw man kan ka dan Bibulu ka kalan jɔnjɔnw dɔrɔn ma (Eburuw 5:12–6:1). U tun ye min kalan ka kɔrɔ ani u be min kalanna sisan, u ka kan k’o suma ɲɔgɔn na ani k’a filɛ o be se k’u nafa cogo min na (Talenw 2:1-6). N’an be kalanden dɛmɛ sɛgɛsɛgɛri kɛcogo la, a bena se ka baara kɛ n’an ka gafew ye walisa ka ɲiningaliw ka jaabiliw sɔrɔ Bibulu kɔnɔ. U ye kalan min sɔrɔ, n’u be u jija sɔbɛ la k’o sira tagama, u bena se ka kɔrɔbɔliw muɲu.—Luka 6:47, 48.

A kɛcogo:

A fɔ ka gwɛlɛya kalanden ye ko n’a b’a fɛ ka bibulukalan daminɛ tuma o tuma, a kɔrɔtanin lo a ka dɛmɛ ɲini Jehova fɛ delili la.—Zan 14:26; 1 Kor. 2:10.
Kabi a daminɛ na, kalanden jija a ka kɔn k’a yɛrɛ labɛn kalan kelen kelen bɛɛ kama. I tɔgɔla gafe yira a la ani a yira a be se ka kumadenw wala hakilinata jɔnjɔnw kɔrɔ ci wala k’u yira ka gwɛ cogo min na.
Kalanden jija a ka ɲiningaliw jaabi a yɛrɛ kumacogo la. Kana kalan yɛlɛma ka kɛ ɲiningaliw ni jaabiliw dama ye. Kalanden jija fana ko a kana dan ka jaabiliw kalan dɔrɔn a ka gafe kɔnɔ.
Kalanden jija a ka Bibulu yɔrɔ dɔ kalan loon o loon. O kɛcogo ɲɛfɔra porogramu dɔ kɔnɔ min be sɔrɔ jw.org kan. O porogramu yira a la. Ka se ka Bibulu kalan loon o loon, fɔɔ kalanden ka jijali kɛ le. Nka a ka jijali tɛna kɛ fuu ye.—Zab. 1:2, 3.
A yira kalanden na a be se ka baara kɛ ni fɛɛn nunu ye cogo min na walisa k’a ka ɲiningaliw jaabili sɔrɔ Bibulu kɔnɔ: Watchtower Library wala gafe Index. An be to ka baara kɛ ni gafe dɔw ye lajɛnw na. Tagamasiɲɛ minw b’an dɛmɛ k’o gafew faranfasi k’u lɔn, u yira kalanden na.

Nin kɛ ka filɛ kalo nin na:

N’aw ye cɛtigɛ wala sapitiri dɔ lajɛ ka ban, a fɔ kalanden ye ko a ye min kalan, a k’o fɔ ka surunya. Ni kalanden t’i fɛ, i ye min kalan Bibulu kɔnɔ wala La Tour de Garde ka dakun dɔ kɔnɔ, a ɲini k’o fɔ ka surunya walisa k’a filɛ i sera ka min faamu.