An ka baara kɛ bɛrɛbɛrɛ ni Gafe Bibulu ka kalan kɔnɔfɛnw ye

Kalan tigitigi min be Bibulu kɔnɔ, ni kalanden tora k’o lɔn ani n’a b’o sira tagama, a bena ɲɛtaga kɛ Alako ta fan fɛ. A bena kɛ i n’a fɔ yiri min be den caaman (Zab. 1:1-3). An be se ka baara kɛ bɛrɛbɛrɛ ni gafe Bibulu ka kalan kɔnɔfɛn dɔw ye walisa ka kalanden dɛmɛ a ka ɲɛtaga kɛ.

Ɲiningali minw be kalanw daminɛ na: Sapitiri kelen kelen bɛɛ be daminɛ ni ɲiningaliw ye. U jaabiliw be sɔrɔ kalansen kɔnɔ. I be se k’o ɲiningaliw kɛ dɔrɔn walisa ka kalan diya don kalanden na. Wala, i k’a ɲini a fɛ a ka ɲiningali kelen kelen bɛɛ jaabi ka surunya. N’a ma jaabili ɲuman di, kuun t’a la k’a ka jaabili latilen. Kalanden ka jaabili bena i dɛmɛ i k’a lɔn i ka ɲi k’i janto kalan yɔrɔ minw na walisa ka sinsin u kan.—Talenw 16:23; 18:13.

Gafe ka kunnafoni wɛrɛw: Ni kalanden be sapitiri kɔnɔkow faamu ani n’a be sɔn u la, i be se k’a jija dɔrɔn a ka kunnafoni wɛrɛw lajɛ gafe kɔnɔ o barokun koo la. Kalan nata la, i be se ka miniti damanin ta k’a filɛ ni kalanden ye kalan faamu. Nka, n’a bena kalanden nafa, i be se ka wagati ta kalan tuma na k’o kunnafoni wɛrɛw lajɛ n’a ye gafe kɔnɔ. Wala aw be se ka dakun damanin lajɛ aw kɛtɔ k’o dakunw kalan. I kɔnna ka ɲiningali minw labɛn, i k’o ɲiningaliw kɛ.

Koorilenw, sapitiriw laban na: Kuma dɔw be sɔrɔ o koorilenw kɔnɔ. U be ɲiningali dɔw jaabi minw be sɔrɔ sapitiri daminɛ na. I be se ka baara kɛ n’o koorilenw ye k’a filɛ ni kalanden ye hakilinata jɔnjɔnw faamu ani n’a be se k’u ɲɛfɔ. A’ ye kumasen kelen kelen bɛɛ kalan ni kaanba ye ani vɛrise minw bɛɛ kofɔra yen. O kɔ, a ɲini kalanden fɛ a ka basigi vɛrise kelen wala damanin kan k’a ɲɛfɔ fɛɛn min kama o kumaw ye tiɲɛn ye.—Kɛw. 17:2, 3.