An ka kiraw ladegi: Abakuki
1. Mun na a be se k’a fɔ ko an ka koow be i n’a fɔ kira Abakuki ta?
1 Juguya be cayara ka taga yɔrɔ bɛɛ duniɲa kɔnɔ. O kama, Abakuki ka miiriya ɲɔgɔn be se ka kɛ an kɔnɔ. Ale ye Jehova ɲininga ko: “Mun na i b’a to ne ɲaa be la tilenbaliyakow kan? Mun na i be sɔn kojugu ka kɛ i ɲana?” (Abak. 1:3; 2 Tim. 3:1, 13). N’an be miiri Abakuki ka kantigiya ani a ka kiraya kuma koo la, o be se k’an dɛmɛ ka Jehova ka kitilon makɔnɔ.—2 Piyɛri 3:7.
2. An be se k’a yira cogo di ko an limaniyanin lo?
2 Kɛ ni limaniya ye: Sanni Abakuki ka hami kojugu ani k’a fari faga, a tora ɲɛɛ na Alako ta fan fɛ ani a kisɛyara a ka baara la (Abak. 2:1). Jehova y’a jigi sigi ko ale ka kuma bena dafa a wagati la ani ko “mɔgɔtilennin bena kisi a ka lanaya barika la.” (Abak. 2:2-4). Laban wagati surunyana kosɔbɛ. An be kalan juman sɔrɔ Abakuki ka koo la? Min kɔrɔtanin lo, o ye ka limaniya ko laban bena se sanni k’a ɲini k’a se tuma lɔn. Limaniya b’an lasun ka to ɲɛɛ na ani ka waajuli baara kɛ an ɲɛnako fɔlɔ ye.—Eburuw 10:38, 39.
3. Mun na an ka ɲi ka Jehova ka baara kɛ ninsɔndiya la?
3 Ninsɔndiya Jehova kosɔn: Tuma min na Magog jamana Gog bena wuli Jehova sagokɛlaw kama, an ka limaniya bena kɔrɔbɔ (Ezek. 38:2, 10-12). Kɛlɛ be na ni gwɛlɛyaw ye bɛɛ fɛ, hali minw yɛrɛ ye see sɔrɔ. Dumuni be se ka dɛsɛ. An be se ka bɔnɛ an bololafɛnw na ani an ka ɲɛnamaya kɛcogo be se ka nagasi. An bena o koo ta cogo di? Abakuki tun b’a lɔn ko gwɛlɛyaw bena ale sɔrɔ. O lo kama, a y’a cɛsiri ka Jehova ka baara kɛ ninsɔndiya la (Abak. 3:16-19). “Nisɔndiya min be bɔ Masaba fɛ,” o bena an fana dɛmɛ ka gwɛlɛya nataw muɲu.—Neemi 8:10; Eburuw 12:2.
4. An be se ka ninsɔndiya juman sɔrɔ bi ani sinima?
4 Jehova bena minw kisi a ka kitilon nata la, a bena to k’olu kalan a ka siraw la (Abak. 2:14). Suu minw bena kunu, olu fana bena kalan sɔrɔ Jehova koo la. Kabini sisan, an ka tɛmɛ sababu bɛɛ fɛ ka Jehova n’a ka kɛwale kabakomanw kofɔ mɔgɔw ye!—Zab. 34:1; 71:17.