Bangebagaw, aw k’aw deenw dɛmɛ u ka kɛ ni lɔnniya ye

An be duniɲa min na, mɔgɔw be koo ɲuman jati koo jugu ye ani ka koo jugu jati koo ɲuman ye (Ezayi 5:20). A fɔ man di, nka mɔgɔ dɔw be koo dɔw kɛ, Jehova be minw haramuya. Ɲɛyirali fɛ, u be cɛnimusoko kɛ n’u cɛɲɔgɔnw wala u musoɲɔgɔnw ye. An deenw ka lakɔli filankuruw wala mɔgɔ wɛrɛw be se k’u lasun u ka sɔn u ka miiriya ma. I be se k’i deenw labɛn cogo di u ka see sɔrɔ o kɔrɔbɔliw ɲɔgɔn kan?

I deenw dɛmɛ u ka Jehova ka sariyakolow lɔn ka ɲɛ (Lev. 18:3). Ka kɛɲɛ n’u sanda an’u ka faamuyali ye, a ɲɛfɔ u ye dɔɔni dɔɔni Bibulu be min fɔ cɛnimusoko koo la (Deter. 6:7). I yɛrɛ ɲininga ko: “Yala n’ b’a ɲɛfɔ n’ deenw ye kanuyako minw bɛnnin lo ani minw bɛnnin tɛ wa? Yala n’ b’a yira u la fɛɛn min kama a kɔrɔtanin lo u ka fani don cogo bɛnnin na wa? N’ b’a ɲɛfɔ u ye fɛɛn min kama tɔɔw ka ɲi ka bonya la u farikolo kan wa? Yala n’ deenw b’a lɔn u ka ɲi ka min kɛ ni mɔgɔ dɔ b’a ɲinina ka porno yira u la wala n’a b’a ɲini u fɛ u ka koo dɔ kɛ min man di Jehova ye wa?” N’u kɔnna k’o lɔn, o bena u tanga kunko caaman ma (Talenw 27:12; Waaj. 7:12). N’i b’i deenw kolo, i b’a yira ko Jehova ye nilifɛn nafaman minw d’i ma, u koo ka d’i ye.—Zab. 127:3.

VIDEWO NIN FILƐ: I KA GWASO LƆ WALISA A KA MƐƐN: I DEENW LATANGA “KOJUGU” MA. O KƆ, ƝININGALI NUNU JAABI:

• 

  Mun na dɔw be siga k’u deenw ladi cɛnimusoko koo la?

• 

  Mun na bangebagaw ka ɲi k’u deenw “kolo k’u ladi, ani k’u kalan ka kɛɲɛ ni [Jehova] sago ye”?—Efɛz. 6:4.

• 

  Jehova ka ɔriganisasiyɔn ye mun lo labɛn bangebagaw ye walisa k’u dɛmɛ u k’u deenw ladi cɛnimusoko koo la?—w19.05 12, koorilen.

• Mun na i ka ɲi ka baro kɛ n’i deenw ye tuma o tuma sanni kunko dɔ k’u sɔrɔ?