Yala i b’i yɛrɛ labɛnna Hakilijigi lajɛn kama wa?

Yezu ye Tɛmɛnkan seli laban min kɛ, o ɲɔgɔn tun tɛ yen. Komi a salon tun surunyana, a ye labɛn kɛ walisa ka Tɛmɛnkan seli kɛ n’a ka cidenw ye ani ka labɛn kura sigi walisa u ka Matigi ka surafana kɛ saan o saan. O kama, a ye Piyɛri ni Zan ci k’u ka boon dɔ labɛn (Luka 22:7-13; jaa lajɛ ɲɛɛ fɔlɔ kan). O b’a yira ko an ka ɲi k’an yɛrɛ labɛn Hakilijigi lajɛn kama. Ɲinan ta bena kɛ marisikalo tile 27. N’a sɔrɔ kalankɛla sugandira ka ban, buru ni diwɛn koo bɛɛ ɲɛnabɔra ani labɛn wɛrɛw kɛra fana. Nka, an kelen kelen bɛɛ be se ka mun lo kɛ k’an yɛrɛ labɛn?

I dusukun labɛn: Bibulusen minw sugandira Hakilijigi lajɛn kama, u kalan ani miiri u kan. O vɛrisew be sɔrɔ gafe nin kɔnɔ: Ala ka Kuma sɛgɛsɛgɛ loon o loon. Kunnafoni caaman wɛrɛw be sɔrɔ gafe nin sapitiri 16nan kɔnɔ: Guide d’étude de la parole de Dieu. (Saan 2020, awirilikalo ka Lajɛnsɛbɛ fana lajɛ.) Barokun minw b’a yira ko kunmabɔsara kɔrɔtanin lo, denbayaw be se k’u lajɛ gwa kɔnɔ batoli tuma na. O barokun dɔw be sɔrɔ gafe nunu kɔnɔ: Index des publications des Témoins de Jéhovah wala Guide de recherche pour les Témoins de Jéhovah.

Mɔgɔw weele u ka na Hakilijigi lajɛn na: I seen don bɛrɛbɛrɛ Hakilijigi lajɛn kanpaɲi na. Miiri k’a filɛ i be se ka mɔgɔ minw weele, i n’a fɔ i ka viziti kuraw, Bibulu kalanden kɔrɔw, i lɔnbagaw ani i somɔgɔw. Mɔgɔ minw sumanin lo Alako ta fan fɛ, diinan mɔgɔkɔrɔw ka ɲi k’u janto k’olu weele. A to i hakili la ko mɔgɔ minw t’i ka mara la, Hakilijigi lajɛn bena kɛ yɔrɔ min na ani wagati min na u sigida la, i be se k’o sɔrɔ jw.org kan, sanfɛyɔrɔ nin na: AN YE JƆN LO YE? O kɔ, yɔrɔ nin sugandi: “Hakilijigi lajɛn.”

I be se ka fɛɛn wɛrɛ juman lo kɛ walisa k’i yɛrɛ labɛn?