Kololi b’a yira ko Jehova b’an kanu

Kololi kɔrɔ ko ka mɔgɔ dɔ ladi, k’a kalan, k’a ka miiriya latilen wala k’a ɲangi yɛrɛ. Jehova b’an kolo walisa an k’a bato i ko a b’a fɛ cogo min na (Ɔrɔm. 12:1; Eburuw 12:10, 11). Tuma dɔw la, kololi be se ka digi an na. Nka o b’a to an be koo tilennin kɛ ani o be duga caaman lase an ma (Talenw 10:7). N’u b’an kolo wala n’an ka ɲi ka mɔgɔ dɔ kolo, an ka ɲi ka mun lo to an hakili la?

N’an ka ɲi ka mɔgɔ dɔ kolo: Diinan mɔgɔkɔrɔw, bangebagaw ani mɔgɔ wɛrɛw b’u jija ka tɔɔw kolo ni ɲumanya ani kanuya ye i ko Jehova b’a kɛ cogo min na (Zer. 46:28). Hali n’u ka ɲi ka mɔgɔ dɔ kolo bɛrɛbɛrɛ, u b’u janto ko a tigi mako b’o lo la ani u b’a kolo ni kanuya ye.—Titi 1:13.

N’u b’an kolo: Kololi mana kɛ min o min ye, an man kan ka ban o la. Nka an ka ɲi ka ladiliw sira tagama joona joona (Talenw 3:11, 12). An ka dafabaliya kosɔn, an bɛɛ mako be kololi la ani an be se k’o sɔrɔ cogo caaman na. An be min kalan Bibulu kɔnɔ, wala an be min lamɛn lajɛnw na, an be se ka kololi sɔrɔ o la. Tuma dɔw la, dɔw mako be kololi la sabu u ye jurumuba kɛ ani diinan mɔgɔkɔrɔw ka ɲi ka kiti tigɛ o koo la. N’an be sɔn kololi la, an ka ɲɛnamaya kɛcogo be fisaya ani an be ɲɛnamaya banbali sɔrɔ.—Talenw 10:17.

VIDEWO NIN FILƐ: JEHOVA BE MƆGƆ MIN KANU, A B’O TIGI KOLO. O KƆ, ƝININGALI NUNU JAABI:

• 

  A daminɛ na, Canon ka ɲɛnamaya tun be cogo di? A ka ɲɛnamaya yɛlɛmana cogo di?

• 

  Jehova y’a kolo ni kanuya ye cogo di?

• 

  A ka koo be mun lo yira an na?