Kanuya yira i ka denbaya kɔnɔ

Kanuya be i n’a fɔ kɔli sabu a be denbaya mɔgɔw nɔrɔ ɲɔgɔn na. Ni kanuya tɛ yen, denbaya mɔgɔw kaan bɛnnin tɛna se ka to ani u tɛna se ka koow kɛ ɲɔgɔn fɛ. Furucɛw, furumusow ani bangebagaw be se ka kanuya yira denbaya kɔnɔ cogo di?

Furucɛ min b’a muso kanu, a b’a janto a muso makoyakow, a ka miiriya ani a dusukunnakow la (Efɛz. 5:28, 29). A b’a ka denbaya mɔgɔw mako wasa ani a b’a janto u la Alako ta fan fɛ. A be gwa kɔnɔ batoli kɛ tuma o tuma (1 Tim. 5:8). Muso min b’a cɛɛ kanu, ale b’a majigi a ye ani a b’a yira ko a b’a “boɲa” kosɔbɛ (Efɛz. 5:22, 33; 1 Piyɛri 3:1-6). Cɛɛ n’a muso ka ɲi ka sɔn ka yafa ɲɔgɔn ma (Efɛz. 4:32). Bangebaga minw b’u deenw kanu, u b’u mako don u deenw kelen kelen bɛɛ la ani u b’u kalan u ka Jehova kanu (Deter. 6:6, 7; Efɛz. 6:4). U deenw be gwɛlɛya jumanw lo sɔrɔ lakɔliso la? U deenw be mun lo kɛ n’u filankuruw b’u lasun ka koo jugu dɔ kɛ? Ni kanuya be denbaya mɔgɔw ni ɲɔgɔn cɛ, u bɛɛ hakili siginin lo ani u b’a ye k’u latanganin lo.

VIDEWO NIN FILƐ: KANUYA KANTIGIMAN YIRA I KA DENBAYA KƆNƆ. O KƆ, ƝININGALI NUNU JAABI:

• 

  Furucɛ b’a yira cogo di ko a b’a janto a muso la ani ko a b’a kanu?

• 

  Furumuso b’a yira cogo di ko a b’a cɛɛ bonya kosɔbɛ?

• 

  Bangebaga minw b’u deenw kanu, olu be Ala ka Kuma don u deenw dusukun na cogo di?