N’an be Jehova kanu ani k’a waleɲuman lɔn, o bena an lasun ka batize

1-2. Ka kɛɲɛ ni Kɛwaliw 8:27-31, 35-38 ka fɔta ye, mun lo ye Etiyopika dɔ lasun ka batize?

I B’A fɛ ka batize ka kɛ Yezu ka kalanden ye wa? Kanuya ni waleɲumanlɔn ye mɔgɔ caaman lasun k’o kɛ. An ka Etiyopika dɔ ka ɲɛyirali lajɛ. Etiyopi jamana masamuso ka baaraɲamɔgɔ dɔ tun lo.

² Tuma min na o Etiyopika y’a faamu Ala ka Kuma kɔnɔ ko a ka ɲi ka batize, a sinna k’o kɛ (Kɛwaliw 8:27-31, 35, 36, 38 kalan).b Mun lo y’a lasun k’o kɛ do? Ala ka Kuma tun ka di a ye kosɔbɛ. A yɛrɛ tun siginin be a ka wotoro kɔnɔ ka to ka kira Ezayi ka kitabu yɔrɔ dɔ lo kalan. Tuma min na Filipu ye Etiyopika dɛmɛ k’a faamu Yezu ye min kɛ a ye, a ye Yezu waleɲuman lɔn kosɔbɛ o kosɔn. Mun na o cɛɛ tun tagara Zeruzalɛmu? A tun tagara yen sabu a tun be Jehova kanu. An be se k’o fɔ sabu a tun tagara Jehova lo bato Zeruzalɛmu. A be komi o cɛɛ tun y’a wolobagaw ka diinan to yen ani ka tuubi ka don Yahutuw ka diinan na, olu minw tun y’u yɛrɛkun di tiɲɛn Ala ma. Komi a tun be Jehova kanu, a y’a latigɛ ka koo wɛrɛ kɛ min kɔrɔtanin lo: A batizera ani a kɛra Yezu ka kalanden dɔ ye.—Mat. 28:19.

3. Mun lo be se ka mɔgɔ bali ka batize? (Koorilen nin lajɛ: “I dusukun bɔnin be mun lo ma?”)

³ Jehova kanuya be se k’i lasun ka batize. Nka mɔgɔ wala fɛɛn dɔ kanuya fana be se k’i bali k’o kɛ. Cogo di do? An ka ɲɛyirali damanin dɔrɔn lajɛ. I somɔgɔw n’i teri minw tɛ Jehova batobagaw ye, olu koo be se ka diya i ye ani i be jɔrɔ ko n’i batizera, u bena i kɔniya (Mat. 10:37). Wala a be se ka kɛ ko delinanko dɔw ka di i ye ani a man nɔgɔ i ma k’u dabila, i do b’a lɔn k’u man di Jehova ye (Zab. 97:10). Wala kabi i denmisɛn tuma, i be deli ka ngalon diinan ka fɛti dɔw kɛ. I tun be koo minw kɛ o fɛtiw tuma na, n’a sɔrɔ u ka di i ye. O kama, o fɛti minw man di Jehova ye, a be se ka gwɛlɛya i ma k’u dabila (1 Kor. 10:20, 21). O la, i ka ɲi k’i yɛrɛ ɲininga ko: “Mun wala jɔn lo koo ka di ne ye ka tɛmɛ?”

AN KA ƝI KA TIGI MIN KANU KA TƐMƐ BƐƐ KAN

4. Koo jɔnjɔn juman lo ka ɲi ka mɔgɔ lasun ka batize?

⁴ Koo ɲuman caaman be yen minw ka d’an ye ani an be se ka Jehova Ala waleɲuman lɔn u kosɔn. Ɲɛyirali fɛ, sanni i yɛrɛ k’a daminɛ ka bibulukalan kɛ ni Jehova Seerew ye, n’a sɔrɔ i tun be bonya la Bibulu kan kosɔbɛ. N’a sɔrɔ i tun y’a daminɛ ka Yezu kanu fana. Sisan, i be Jehova Seerew lɔn ani a ka d’i ye ka jɛn n’u ye. Nka, n’a sɔrɔ o koow tɛna i lasun i k’i yɛrɛkun di Jehova ma ani ka batize. Koo jɔnjɔn min bena i lasun ka batize, o ye ka Jehova Ala yɛrɛ kanu. N’i be Jehova kanu ka tɛmɛ fɛɛn bɛɛ kan, i tɛna a to foyi wala mɔgɔ si k’i bali k’a sago kɛ. Jehova kanuya bena i lasun ka batize ani ka to k’a bato kantigiya la.

5. An bena mun lo lajɛ barokun nin na?

⁵ Yezu ko an ka ɲi ka Jehova kanu n’an dusu, an niin, an hakili n’an barika bɛɛ ye (Mariki 12:30). An be se k’a ɲini cogo di ka Jehova kanu ani ka bonya la a kan kosɔbɛ o cogo la? Jehova b’an kanu kosɔbɛ cogo min na, n’an be miiri o la, o bena an dɛmɛ k’a kanu fana (1 Zan 4:19). Barokun nin na, an bena ladili caaman lajɛ minw bena an dɛmɛ k’o kɛ. N’an be Jehova kanu kosɔbɛ, o bena an lasun ka mun lo kɛ ani an bena kɛ ni dusukunnako jumanw lo ye?c An bena o fana lajɛ.

6. Ka kɛɲɛ ni Ɔrɔmukaw 1:20 ye, an be se ka Jehova lɔn fɛɛrɛ minw fɛ, u la dɔ ye juman ye?

⁶ A ɲini ka Jehova lɔn a ka danfɛnw sababu fɛ (Ɔrɔmukaw 1:20 kalan; Yir. 4:11). Jehova ye yiri ani bɛgɛn minw dan, miiri u la ani a filɛ u b’a yira cogo min na ko a ka hakilitigiya ka bon. A y’i farisogo dan cogo kabakoman min na, a ɲini ka dɔ lɔn o koo la (Zab. 139:14). Miiri k’a filɛ a ye fanga kabakoman min don tile la. Lolo miliyari caaman be yen fana fanga kabakoman be minw nad (Ezayi 40:26). N’i miirila Jehova ka danfɛnw koo la, o bena i lasun ka bonya la a kan kosɔbɛ. A kɔrɔtanin lo i k’a lɔn ko Jehova ye hakilitigi ye ani ko fanga b’a la kosɔbɛ. Nka walisa i k’a kanu ani ka kɛ a teri sɔbɛ ye, i ka ɲi ka koo wɛrɛw lɔn a koo la.

7. Walisa ka Jehova kanu kosɔbɛ, i ka ɲi ka la mun lo la?

⁷ I ka ɲi ka la a la ko Jehova b’i kanu sɔbɛ la. Yala a ka gwɛlɛ i ma ka la a la ko sankolo ni dugukolo Danbaga b’a kala ma ko i be yen ani ko a b’a janto i la wa? N’o lo, a to i hakili la ko Jehova “yɔrɔ man jan an si la.” (Kɛw. 17:26-28). A be “adamadenw bɛɛ kɔnɔnako sɛgɛsɛgɛ.” I ko Dawuda y’a fɔ Solomani ye cogo min na, Ala ye layidu ta ko “n’i y’a ɲini, a ben’a yɛrɛ yira i la.” (1 Til. Kib. 28:9). Komi i be bibulukalan kɛra, o b’a yira ko Jehova b’a ‘janto i la.’ (Zer. 31:3). Jehova ye koo minw bɛɛ kɛ i ye, n’i b’a waleɲuman lɔn kosɔbɛ o kosɔn, i ka kanuya barika bena bonya a koo la yɛrɛ le!

8. I be se k’a yira Jehova la cogo di ko i b’a waleɲuman lɔn a ka kanuya kosɔn?

⁸ Cogo minw na i be se k’a yira Jehova la ko i b’a waleɲuman lɔn a ka kanuya kosɔn, u la dɔ ye ka to k’a deli. Ala ye koo minw bɛɛ kɛ i ye, n’i b’a fo o kosɔn ani k’i ka haminankow fɔ a ye, dɔ bena to ka fara i ka kanuya barika kan a koo la. N’i y’a ye Jehova b’i ka deliliw jaabi cogo min na, aw ka teriya bena sabati (Zab. 116:1). I bena la a la ko a b’i faamu. Nka walisa k’i magwɛrɛ Jehova la kosɔbɛ, i ka ɲi k’a lɔn a be koow jati cogo min na. I ka ɲi k’a lɔn fana a be min ɲini i fɛ. I be se k’o lɔn fɛɛrɛ kelenpe min fɛ, o ye ka bibulukalan kɛ.

9. I be se k’a yira cogo di ko i be bonya la Bibulu kan?

⁹ Bonya la Bibulu kan, o min ye Ala ka Kuma ye. Bibulu kelenpe lo be tiɲɛn fɔ Jehova koo la ani a b’a yira a sagonata ye min ye i koo la. I b’a yira ko i be bonya la Bibulu kan i kɛtɔ k’a kalan loon o loon, k’i yɛrɛ labɛn i ka bibulukalan kama ani i ye min faamu, o sira tagama (Zab. 119:97, 99; Zan 17:17). Yala i be Bibulu kalan loon o loon wa?

10. Fɛɛn minw b’a to Bibulu ɲɔgɔn tɛ yen, u la dɔ ye juman ye?

¹⁰ Fɛɛn minw b’a to Bibulu ɲɔgɔn tɛ yen, u la dɔ ye ko minw ye Yezu ka maana lakali a kɔnɔ, olu yɛrɛ ɲɛɛ lara Yezu kan. Yezu ye min kɛ i ye, Bibulu kelenpe lo b’o lakali ka gwɛ. Yezu ye min kɛ ani a ye min fɔ, n’i b’o kalan, o be se k’i lasun ka teriya kɛ n’a ye.

11. Mun lo bena i dɛmɛ ka Jehova kanu?

¹¹ A ɲini ka Yezu kanu. O la, i ka kanuya barika bena bonya Jehova koo la. Mun na do? Sabu Yezu y’a Faa jogow ladegi cogo dafanin na (Zan 14:9). O la, a ɲini ka koo caaman lɔn Yezu koo la. N’i y’o kɛ, i bena Jehova ka kokɛcogow faamu ka ɲɛ ani a koo bena diya i ye kosɔbɛ. Miiri k’a filɛ Yezu makarila mɔgɔ sugu nunu na cogo min na k’a sɔrɔ tɔɔw tun b’u mafiɲɛya: fantanw, banabagatɔw ani dɛmɛbaga tɛ minw na. Yezu ye ladili nafamanw di i ma. Miiri o ladiliw la ani i kɛtɔ k’u sira tagama, a filɛ o b’i ka ɲɛnamaya kɛcogo fisaya cogo min na.—Mat. 5:1-11; 7:24-27.

12. N’i b’a ɲini ka dɔ lɔn Yezu koo la, o bena i lasun ka mun lo kɛ?

¹² Yezu y’a yɛrɛ saraka walisa i ka jurumuw ka se ka yafa. N’i be miiri o la kosɔbɛ, o bena dɔ fara i ka kanuya barika kan Yezu koo la (Mat. 20:28). N’i y’a faamu ko Yezu sɔnna ka sa e kosɔn, o bena i lasun ka nimisa ani k’a ɲini Jehova ka yafa i ma (Kɛw. 3:19, 20; 1 Zan 1:9). N’i be Yezu ni Jehova kanu, minw fana b’u kanu, i ben’a ɲini k’i magwɛrɛ olu la.

13. Jehova ye mun lo di i ma?

¹³ Jehova koo ka di minw ye, olu kanu. I somɔgɔw n’i teri minw tɛ Jehova sagokɛlaw ye, n’a sɔrɔ olu tɛna a faamu fɛɛn min kama i b’a fɛ k’i yɛrɛkun di Jehova ma. N’a sɔrɔ u yɛrɛ ben’a ɲini k’i kɛlɛ o kosɔn. Nka, Jehova bena i dɛmɛ. A bena a to kafodenw be kɛ i n’a fɔ i somɔgɔw. N’i tora ka jɛnɲɔgɔnya kɛ n’u ye, i mako be kanuya ni dɛmɛ min na, i bena o sɔrɔ (Mariki 10:29, 30; Eburuw 10:24, 25). N’a sɔrɔ loon dɔ, i somɔgɔw bena fara i kan ka Jehova bato ani ka tagama ka kɛɲɛ n’a ka sariyaw ye.—1 Piyɛri 2:12.

14. Ka kɛɲɛ ni 1 Zan 5:3 ye, i ye mun lo kɔrɔsi Jehova ka sariyaw koo la?

¹⁴ A to Jehova ka sariyaw koo ka diya i ye ani u sira tagama. Sanni i ka Jehova lɔn, n’a sɔrɔ i tun ye sariya dɔw sigi i yɛrɛ ye. Nka sisan, i y’a kɔrɔsi ko Jehova ka sariyaw ɲɔgɔn tɛ yen (Zab. 1:1-3; 1 Zan 5:3 kalan). Miiri k’a filɛ Bibulu ka sariya minw ɲɛsinna furucɛw, furumusow, bangebagaw ani denmisɛnw ma (Efɛz. 5:22–6:4). I kɛtɔ k’o sariyaw sira tagama, yala i ka denbaya ka koow ma fisaya wa? Jehova b’an ladi ko an k’an teriw sugandi ni hakilitigiya ye. I kɛtɔ k’o ladiliw sira tagama, yala i sɔɔn ma fisaya wa? Yala o m’a to i ye ninsɔndiya sɔrɔ wa? (Talenw 13:20; 1 Kor. 15:33). Siga t’a la, i bena o ɲiningaliw jaabi ko ɔnhɔn!

15. Mun lo be se k’i dɛmɛ ka Bibulu ka sariyakolow sira tagama?

¹⁵ I ye Bibulu ka sariyakolo minw faamu, tuma dɔw la, a be se ka gwɛlɛya i ma k’a lɔn i be se k’u sira tagama cogo min na. O lo kama Jehova be tɛmɛ a ka ɔriganisasiyɔn fɛ ka sɛbɛw d’i ma. O sɛbɛw b’i dɛmɛ ka Bibulu faamu ani ka ɲuman ni juguman lɔn ka bɔ ɲɔgɔn na (Eburuw 5:13, 14). N’i b’o sɛbɛw kalan ani k’u sɛgɛsɛgɛ, i ben’a ye k’u nafa ka bon ani k’u b’i dɛmɛ cogo tigitigi dɔw la. O ka teli k’i lasun k’a ɲini ka kɛ Jehova ka ɔriganisasiyɔn mɔgɔ dɔ ye.

16. Jehova y’a ka mɔgɔw labɛn cogo di a ka ɔriganisasiyɔn kɔnɔ?

¹⁶ A to Jehova ka ɔriganisasiyɔn koo ka diya i ye ani dɛmɛ don a ka koow la. Jehova ye labɛn kɛ walisa a sagokɛlaw ka kɛ kafow kɔnɔ. A Dencɛ Yezu lo ye kafow kuntigi ye (Efɛz. 1:22; 5:23). Yezu b’a fɛ baara min ka kɛ an ka tile la, a ye kerecɛn mɔlenw jɛnkulu dennin dɔ sigi walisa u k’o baara ɲɛminɛ. A y’o jɛnkulu weele ko “jɔncɛ kantigiman hakiliman.” O jɛnkulu mɔgɔw ka kunkanbaara ye k’i latanga ani k’i balo Alako ta fan fɛ. U b’u sɔbɛ don o baara la (Mat. 24:45-47, NW ). O jɔncɛ b’a ka baara dafa cogo minw na, u dɔ ye ka diinan mɔgɔkɔrɔ kolɔnbagaw sigi walisa u k’i ɲɛminɛ (Ezayi 32:1, 2; Eburuw 13:17; 1 Piyɛri 5:2, 3). Diinan mɔgɔkɔrɔw b’u seko bɛɛ kɛ walisa k’i dusu saalo ani k’i dɛmɛ i k’i ka jɛnɲɔgɔnya sabati ni Jehova ye. U be koo kɔrɔtanin minw kɛ, u la dɔ ye k’i dɛmɛ i ka mɔgɔ wɛrɛw kalan Jehova koo la.—Efɛz. 4:11-13.

17. Ka kɛɲɛ ni Ɔrɔmukaw 10:10, 13, 14 ye, mun na an ka ɲi ka Jehova kofɔ mɔgɔ wɛrɛw ye?

¹⁷ Mɔgɔ wɛrɛw dɛmɛ u ka Jehova kanu. Yezu ye cii di a ka kalandenw ma ko u ka mɔgɔ wɛrɛw kalan Jehova koo la (Mat. 28:19, 20). I be se k’o cikan labato dɔrɔn sabu o ɲinina i fɛ. Nka n’i ka kanuya be barika sɔrɔla Jehova koo la, i bena kɛ ni ciden Piyɛri ani Zan ka miiriya ɲɔgɔn ye. Olu ko: “Anw ye min ye, ka min mɛn, anw te se ka to o fɔbali ye.” (Kɛw. 4:20). Ka mɔgɔ wɛrɛ dɛmɛ a ka Jehova kanu, fɛɛn bɛrɛ tɛ mɔgɔ ninsɔn diya ka se o ma. Miiri k’a filɛ waajulikɛla Filipu ninsɔn diyara cogo min na tuma min na a ye Etiyopika dɛmɛ ka Ala ka tiɲɛn kumaw faamu ani ka batize! Yezu ye cii min di ko an ka waajuli kɛ, n’i b’o labato i ko Filipu, i b’a yira ko i b’a fɛ ka kɛ Jehova Seere dɔ ye (Ɔrɔmukaw 10:10, 13, 14 kalan). O la, i ko Etiyopika, siga t’a la i bena i yɛrɛ ɲininga ko: “Mun le bɛ ne bari ka batize?”—Kɛw. 8:36, Biblu Ala ta Kuma.

18. An bena mun lo lajɛ barokun nata la?

¹⁸ N’i y’a latigɛ ka batize, o bena kɛ desizɔnba ye i ka ɲɛnamaya kɔnɔ. O kama, batɛmu kɔrɔ ye min ye, i ka ɲi ka miiri o la koɲuman. I ka ɲi ka mun lo lɔn batɛmu koo la? I ka ɲi ka mun lo kɛ ka kɔn i ka batɛmu ɲɛ ani i ka ɲi ka mun lo kɛ o kɔ? An bena o ɲiningaliw jaabi barokun nata la.