Koo ɲuman dɔ kɛra yɛlɛmisɛn sababu fɛ!

MUSO fila dɔw tun be tagamana ɲɔgɔn fɛ Bagiyo dugu la, Filipine jamana na. U ye an ka waajulikɛ wotoro dɔ ye, nka u ma gwɛrɛ a la. Balimamuso Helen lo tun lɔnin b’o wotoro gɛrɛfɛ. A ye yɛlɛmisɛn kɛ o musow fɛ ni dusudiya ye. O muso fila ma lɔ. Nka, Helen yɛlɛla u fɛ cogo min na teriya la, u ma ɲinɛ o kɔ.

Kɔfɛ, o musow tun be bisi kɔnɔ n’u be tagara soo ani u ye Masaya Boon dɔ ye, jw.org tun sɛbɛnin be min kan belebeleba. U hakili jigira ko u tun ye waajulikɛ wotoro min ye, o siginindenw lo tun sɛbɛnin b’a kan. U fila bɛɛ jigira ka bɔ bisi kɔnɔ ani u tagara Masaya Boon daa la. O yɔrɔ la, u ye lajɛnw porogramu lajɛ.

O muso fila tɛmɛnin kɔ Masaya Boon daa la, lajɛn minw kɛra o kɔ, u nana u dɔ la. A barila u la ka Helen ye u dontɔ Masaya Boon kɔnɔ! O yɔrɔnin bɛɛ u hakili jigira ko ale lo tun ye yɛlɛmisɛn kɛ u fɛ ni dusudiya ye. Helen ko: “Tuma min na u tun be gwɛrɛla n’ kɔrɔ, n’ tun sirannin lo dɔɔni. N’ tun b’a miiri ko n’ tun ye koo jugu dɔ lo kɛ.” Nka, o musow y’a ɲɛfɔ Helen ye ko u tun y’a ye wotoro gɛrɛfɛ ani a ye yɛlɛmisɛn kɛ u fɛ ni dusudiya ye.

O musow ye min mɛn lajɛn na ani u ye jɛnɲɔgɔnya min kɛ ni balimaw ye, o diyara u ye. Lajɛn bannin kɔ, tuma min na u y’a ye ko balimaw be Masaya Boon saniyara, u y’a ɲini k’u dɛmɛ. O muso dɔ tɛ Filipine jamana na tugun. Nka tɔɔ kelen bele be yen. A be to ka na lajɛnw na tuma o tuma ani a ye bibulukalan daminɛ. O bɛɛ sera ka kɛ yɛlɛmisɛn dɔ lo sababu fɛ!