Minw be kantigiya kɛ Jehova ye, olu ninsɔn ka di

1-2. a) Gofɛrɛnɛman dɔw be an kɛlɛla cogo di? An be o koo ta cogo di? b) An be se ka ninsɔn diya cogo di hali n’u b’an kɛlɛla? (Jaa min be ɲɛɛ fɔlɔ kan, o fana lakali.)

BI BI nin na, faamanw ye bali sigi an ka batoli wala a faan dɔw kan jamana 30 ni kɔ la duniɲa kɔnɔ. O jamana dɔw la, faamanw ye an balima dɔw yɛrɛ don kaso la. An balimaw ye koo jugu juman lo kɛ do? U ma koo jugu si kɛ Jehova ɲɛɛ kɔrɔ. U ye min kɛ, o ye ka Bibulu kalan, k’a sɛgɛsɛgɛ, ka taga lajɛnw na ani k’u ka lannakow fɔ tɔɔw ye. U banna fana k’u seen don politikikow la. O kerecɛn sɔbɛw tora ka kantigiya kɛ Jehova ye hali k’a sɔrɔ u b’u kɛlɛla kosɔbɛ.b O cogo la, u y’a yira ko u be kantigiya min kɛra Jehova ye, foyi tɛ se k’o nagasi. Ani u ninsɔn ka di o kosɔn!

² N’a sɔrɔ i ye o balima jagwɛlɛ dɔw foto ye ani i y’a kɔrɔsi ko u be yɛlɛmisɛnw kɛra. U ninsɔn ka di sabu u b’a lɔn ko Jehova dusu ka di u kɔrɔ u ka kantigiya kosɔn (1 Til. Kib. 29:17a). Yezu ko: “U be minw tɔɔrɔ u ka tilenninya kosɔn, olu dagamunin lo . . . Aw ka nisɔndiya kosɔbɛ, bari aw bena tɔnɔba sɔrɔ.”—Mat. 5:10-12.

U YE ƝƐYIRALI ƝUMAN TO AN YE

3. Ka kɛɲɛ ni Kɛwaliw 4:19, 20 ye, Yezu ka cidenw ye mun lo kɛ tuma min na u tun b’u kɛlɛla ani mun na u y’o kɛ?

³ Koo min be balima caaman kan bi, o ɲɔgɔn lo ye Yezu ka cidenw sɔrɔ saan kɛmɛkulu fɔlɔ la. Mɔgɔw ye cidenw kɛlɛ sabu u tun be waajuli kɛra Yezu koo la. Siɲɛ caaman, kititigɛla minw be Yahutuw ka kititigɛsoba la, olu ye “kangari la u ye k’u kana Yezu tɔgɔ wele abada.” (Kɛw. 4:18; 5:27, 28, 40). Cidenw ye o koo ta cogo di? (Kɛwaliw 4:19, 20 kalan). U tun b’a lɔn ko mɔgɔ min lɔyɔrɔ ka bon ni faamanw ta ye, ale tun ye cii di ko u “k’a fɔ jama ye ani k’a yira u la ko Ala ye” Yezu lo sugandi k’a kɛ Masiya ye (Kɛw. 10:42). Cidenw ka kuma lasebaga Piyɛri ni Zan y’u jaa gwɛlɛya k’a fɔ ko u bena mɛnni kɛ Ala fɛ sanni ka mɛnni kɛ o kititigɛlaw fɛ. U y’a fɔ fana ko u tɛna waajuli dabila Yezu koo la. A kɛra komi u tun be o kititigɛlaw ɲiningara le ko: “Yala aw b’a fɛ k’a fɔ ko aw ka cii kɔrɔtanin lo ka tɛmɛ Ala ta kan wa?”

4. Ka kɛɲɛ ni Kɛwaliw 5:27-29 ka fɔta ye, cidenw ye ɲɛyirali ɲuman juman lo to kerecɛn sɔbɛw bɛɛ ye? An be se k’u ladegi cogo di?

⁴ Cidenw ye ɲɛyirali ɲuman to bi kerecɛn sɔbɛw bɛɛ ye. U tun cɛsirinin lo ka “Ala sago” kɛ sanni “ka adamadenw ta kɛ.” (Kɛwaliw 5:27-29 kalan). U ye cidenw bugɔ sabu u tun be kantigiya kɛra Ala ye. O kɔ, “cidenw nisɔn diyanin bɔra kiti tigɛyɔrɔ la, bari Ala ye boɲa la u kan min kɛra u lɔgɔbɔko ye Yezu tɔgɔ kosɔn.” Ani, u tora ka waajuli kɛ!—Kɛw. 5:40-42.

5. An ka ɲi ka ɲiningali jumanw lo jaabi?

⁵ Cidenw ka ɲɛyirali be ɲiningali dɔw lawuli. Misali la, u tun be se ka koo fila nunu kɛ cogo di: Ka Ala sago kɛ sanni ka adamadenw ta kɛ ani ka Bibulu ka sariya nin labato o min ye ko an k’an “yɛrɛ majigi faamaw kɔrɔ olu minw b’an kunna”? (Ɔrɔm. 13:1). Ciden Pol ko an k’an “yɛrɛ majigi kuntigiw ni faamaw ye, k’u boɲa.” An be se k’o cii labato cogo di ani ka to ka kantigiya kɛ Ala ye, ale min y’an Kuntigiba ye?—Titi 3:1.

‘FAAMA . . . MINW B’AN KUNNA’

6. a) ‘Faama’ minw kofɔra Ɔrɔmukaw 13:1 kɔnɔ, olu ye jɔnw lo ye ani an ka ɲi k’u jati cogo di? b) An be se ka mun lo fɔ adamadenw bɛɛ ka kuntigiya koo la?

⁶ Ɔrɔmukaw 13:1 kalan. O vɛrise kɔnɔ, n’a fɔra ko ‘faama . . . minw b’an kunna,’ o ɲɛsinna adamadenw ka kuntigiw lo ma minw be tɔɔw mara. Kerecɛnw ka ɲi ka mɛnni kɛ u fɛ. O faamanw b’u jija janko koow ka kɛ cogo bɛnnin na jamana kɔnɔ, u b’u janto walisa mɔgɔw ka sariyaw labato ani tuma dɔw la yɛrɛ u be Jehova sagokɛlaw latanga (Yir. 12:16). O la, an ka ɲi ka lanpow sara u ye, ka mɛnni kɛ u fɛ ani ka bonya la u kan (Ɔrɔm. 13:7). Nka, o faamanw be kuntigiya kɛra sabu Jehova y’a to u k’o kɛ. Yezu y’o lo yira ka gwɛ tuma min na Ɔrɔmukaw ka gofɛrɛnɛrɛ Pilati tun be kumana a fɛ. Tuma min na Pilati ko ale be se ka Yezu niin kisi wala k’a kɛ u b’a faga, Yezu y’a fɔ a ye ko: “See min b’i fɛ k’a yira ne la, i m’o sɔrɔ i yɛrɛ ma, Ala le ye o see d’i ma.” (Zan 19:11). I ko Pilati, adamaden minw be kuntigiya kɛra bi, daan be u bɛɛ ka kuntigiya la.

7. Koo jumanw lo la an man ɲi ka mɛnni kɛ adamadenw ka kuntigiw fɛ? O kuntigiw ka ɲi ka mun lo to u hakili la?

⁷ Kerecɛnw ka ɲi ka faamanw ka sariyaw labato, n’o sariyaw tɛ Ala taw kɛlɛ. Nka, ni faamanw be fɛɛn dɔ ɲini an fɛ Ala tɛ sɔn min ma wala n’u b’an bali ka Ala sago kɛ, an tɛ sɔn u ta ma. Misali la, u be se k’a ɲini kanbelew fɛ u k’u seen don marifakɛlɛ la.c U be se k’a fɔ fana ko an man ɲi ka Bibulu n’an ka gafew kalan ani ka lajɛnw kɛ n’an balimaw ye wala u be se ka bali sigi an ka waajuli baara kan. Ni faamanw b’u fanga digi Krista ka kalandenw kan u kɛtɔ k’u kɛlɛ, Ala bena u ɲininga o la. U be min bɛɛ kɛra, Jehova ɲɛɛ b’o la!—Waaj. 5:7.

8. Faranfasi juman lo be kumasen nunu cɛ: “minw b’an kunna” ani “fɛɛn bɛɛ Kuntigi”? Mun na a kɔrɔtanin lo an k’o lɔn?

⁸ N’a fɔra ko “minw b’an kunna,” o kɔrɔ ko “minw kɔrɔtanin lo, minw lɔyɔrɔ ka bon.” Nka, n’a fɔra ko “fɛɛn bɛɛ Kuntigi,” o kɔrɔ ko “fisaman, kɔrɔtaninba wala min lɔyɔrɔ ka bon ka tɛmɛ bɛɛ ta kan.” Tiɲɛn lo ko adamadenw ka kuntigiw weelela ko ‘faama . . . minw b’an kunna.’ Nka kuntigi wɛrɛ be yen min lɔyɔrɔ ka bon kosɔbɛ ka tɛmɛ olu ta kan. Ale lo ye fɛɛn bɛɛ Kuntigi ye. Jehova Ala weelela “fɛɛn bɛɛ Kuntigi” siɲɛ naani Bibulu kɔnɔ.—Dan. 7:18, 22, 25, 27.

“FƐƐN BƐƐ KUNTIGI”

9. Kira Daniyɛli ye mun lo ye yelifɛn dɔw la?

⁹ Kira Daniyɛli ye yelifɛn dɔw ye minw y’a yira ka gwɛ ko Jehova ka kuntigiya ka bon kosɔbɛ ka tɛmɛ kuntigi tɔɔw bɛɛ ta kan. A fɔlɔ, Daniyɛli ye sogobaba naani ye. O sogow ye duniɲa ka fangatigiyaw tagamasiɲɛ lo ye, o minw ye kuntigiya kɛ galen ani an ka wagati la. O fangatigiyaw ye nunu ye: Babilɔni, Mɛdi ni Pɛrɛsi masaya, Gɛrɛsi, Ɔrɔmu ani Angletɛri ni Ameriki ka fangatigiya (Dan. 7:1-3, 17). O kɔ, Daniyɛli ye Jehova Ala siginin ye masasigilan kan sankolo la (Dan. 7:9, 10). O kira kantigi ye min ye o kɔ, o ye lasɔminiko ye faamanw fɛ bi.

10. Ka kɛɲɛ ni Daniyɛli 7:13, 14, 27 ye, Jehova ye kuntigiya di jɔnw lo ma dugukolo kun na ani o be mun lo yira a koo la?

¹⁰ Daniyɛli 7:13, 14, 27 kalan. Ala ye kuntigiya bɔsi adamadenw ka kuntigiw la k’a kalifa mɔgɔ wɛrɛw ma minw ka kan n’a ye ani minw ka sebagaya ka bon kosɔbɛ. O ye jɔnw lo ye? A ye kuntigiya kalifa dɔ ma min be “i n’a fɔ mɔgɔ dencɛ.” O ye Yezu Krista lo ye. Ani, o kuntigiya kalifara “fɛɛn bɛɛ Kuntigi ka jama” ma, o kɔrɔ mɔgɔ 144 000 minw ka masaya “tena bɔsi u la abada.” (Dan. 7:18). Tiɲɛn na, Jehova lo ye “fɛɛn bɛɛ Kuntigi” ye sabu see b’ale kelenpe lo ye k’o kɛ.

11. Daniyɛli ye koo wɛrɛ juman lo sɛbɛ min b’a yira ko Jehova ye masaba ye siyaw bɛɛ kun na?

¹¹ Daniyɛli ye koo minw ye yelifɛn na, o be koo dɔ tiɲɛntigiya yira a tun kɔnna ka min fɔ. A ko “Sankolotigi Ala . . lo be masaw sigi masaya la, ale lo b’u bɔ a la fana.” Daniyɛli y’a sɛbɛ fana ko: “Fɛɛn bɛɛ Kuntigi Ala ka sebagaya be adamadenw ka kuntigiya bɛɛ kan. Mɔgɔ min ka d’a ye, a be masaya di o tigi ma.” (Dan. 2:19-21; 4:14). Yala Jehova delila ka kuntigi dɔw bɔ masaya la wala ka dɔw sigi wa? Kosɔbɛ!

12. Misali dɔ fɔ min b’a yira ko Jehova ye masacɛ dɔw bɔ masaya la galen. (Jaa lajɛ.)

¹² ‘Faama . . . minw b’an kunna,’ Jehova y’a yira ka gwɛ ko a ka kuntigiya ka bon kosɔbɛ ka tɛmɛ olu ta kan. An ka misali saba lajɛ. Ezipiti masacɛ Farahuna tun ye Jehova ka jama bila jɔnya la ani siɲɛ caaman, a banna k’u labila. Nka, Ala y’u hɔɔrɔnya ka bɔ jɔnya la ani a y’a kɛ Farahuna tununa kɔgɔji wulen kɔnɔ (Ɛkiz. 14:26-28; Zab. 136:15). Loon dɔ, Babilɔni masacɛ Balitazari ye fɛti dɔ kɛ ani a “wilila Matigi . . . kama, Sankolotigi.” A ye “batofɛn warigwɛlamanw tanu, ni sanulaman,” a ma bonya la Jehova kan (Dan. 5:22, 23). Nka Ala y’o cɛɛ kuncɛba majigi. “O loon yɛrɛ sufɛ,” u ye Balitazari faga ani a ka masaya donna Mɛdiw ni Pɛrɛsiw bolo (Dan. 5:28, 30, 31). Palɛstine masacɛ Erɔdi Agiripa y’a kɛ u ye ciden Zaki faga. O kɔ, a ye ciden Piyɛri don kaso la sabu a tun b’a fɛ k’ale fana faga. Nka Jehova ye Erɔdi bali k’o kɛ. “Matigi ka mɛlɛkɛ dɔ nan’a gosi” ani a sara.—Kɛw. 12:1-5, 21-23.

13. Misali dɔ fɔ min b’a yira ko Jehova ye see sɔrɔ kuntigiw jamakulu dɔw kan.

¹³ Jehova y’a yira fana ko a ka kuntigiya ka bon kosɔbɛ ka tɛmɛ kuntigiw jamakulu ta kan. A ye kɛlɛ kɛ Israɛldenw ye ani a y’u dɛmɛ ka Kanankaw ka masacɛ 31 lajɛnnin halaki. A y’u dɛmɛ fana ka Layidu jamana fanba minɛ (Zozuwe 11:4-6, 20; 12:1, 7, 24). Tuma min na masacɛ Bɛnadadi ni Siri masacɛ 32 wɛrɛw nana Israɛldenw kama, Jehova ye Israɛldenw dɛmɛ ka see sɔrɔ u kan cogo kabakoman na.—1 Mas. 20:1, 26-29.

14-15. a) Masacɛ Nabukodonozɔri ni Dariyusi ye mun lo fɔ Jehova ka Masabaya koo la? b) Zaburu sɛbɛbaga dɔ ye mun lo fɛ Jehova n’a ka jama koo la?

¹⁴ Jehova y’a yira siɲɛ caaman ko ale lo ye fɛɛn bɛɛ Kuntigi ye! Babilɔni masacɛ Nabukodonozɔri m’a yɛrɛ majigi ka sɔn a ma ko Jehova lo ka kan ni tandoli ye. Nka, a ye wasoya kɛ ko ale lo ye Babilɔni dugu ‘sigi ni a ka fanga, ni a ka sebagaya ye, k’a kɛ masadugu ye, ale ka kunkɔrɔta kama.’ O kama, Ala ye fatɔya bila a la. Nabukodonozɔri kɛnɛyanin kɔ, a ye “fɛɛn bɛɛ Kuntigi fo, k’a tanu” ani a sɔnna a ma ko “[Jehova] ka masaya ye waati bɛɛ koo ye.” A ko: “Mɔgɔ si te se ka Ala bali koo la.” (Dan. 4:27, 30-32). Tuma min na Daniyɛli ka kantigiya kɔrɔbɔra ani Jehova y’a kisi ka bɔ jaraw ka dingɛ kɔnɔ, masacɛ Dariyusi ye cii di ko: “Bɛɛ ka boɲa la Daniyɛli ka Ala kan, ani ka siran a ɲa. Bari Ala lo, a be yen kudayi! A ka masaya te nagasi abada. A ka fanga ye waati bɛɛ koo ye.”—Dan. 6:8-11, 20-23, 27, 28.

¹⁵ Zaburu sɛbɛbaga dɔ y’a fɔ ko: “Masaba be siya wɛrɛw ka koo labɛnnin yɛlɛma, a b’u ka kolatigɛnin cɛn.” O Zaburu sɛbɛbaga y’a fɔ fana ko: “Masaba ye siya min ka Ala ye, o siya nin dagamuna. A ye jama min woloma k’a kɛ a ta ye, o fana dagamuna.” (Zab. 33:10, 12). Tiɲɛn na, kuun bɛrɛ be an fɛ ka kantigiya kɛ Jehova ye!

KƐLƐ LABAN

16. An be se ka la mun lo la “tɔɔrɔba” wagati koo la, ani mun na? (Jaa lajɛ.)

¹⁶ Jehova ye koo minw kɛ galen, an y’o lajɛ Bibulu kɔnɔ. Nka mun lo bena kɛ yanni dɔɔni? An be se ka la a la ko Jehova bena a sagokɛla kantigiw kisi “tɔɔrɔba” wagati la, o min bena kɛ yanni dɔɔni (Mat. 24:21; Dan. 12:1). A bena an kisi tuma min na jamanaw bena jɛn ka wuli Jehova sagokɛla kantigiw kama ni fariya ye duniɲa kuru bɛɛ kɔnɔ. O jamanaw lajɛnnin be weele ko Gɔgi min be Magɔgi jamana na. Jamana 193 minw be Nasiyɔn Zini kɔnɔ, hali ni olu bɛɛ lo bena fara ɲɔgɔn kan, u tɛna se ka foyi kɛ fɛɛn bɛɛ Kuntigi n’a ka sankola kɛlɛbolo la! Jehova ye layidu ta ko: “Ne bena o kɛ ka ne ka boɲa yira siya caaman na, ani k’a yira u la ko ne ɲɔgɔn tɛ. O la, u ben’a lɔn ko ne ye Masaba le ye.”—Ezek. 38:14-16, 23; Zab. 46:11.

17. Ka kɛɲɛ ni Bibulu ka fɔta ye, mun lo bena duniɲa kɔnɔ masaw ani Jehova sagokɛla kantigiw sɔrɔ sini ma?

¹⁷ Arimagedɔn kɛlɛ bena daminɛ tuma min na Gɔgi bena wuli Ala sagokɛlaw kama. O kɛlɛ la, Jehova bena “diɲɛ kɔnɔ masaw” halaki (Yir. 16:14, 16; 19:19-21). Nka, “mɔgɔtilenninw le bena dugukolo tigiya kɛ, olu le bena to a kan.”—Talenw 2:21.

AN KA ƝI KA TO KANTIGIYA LA

18. Kerecɛn sɔbɛ caaman sɔnna ka mun lo kɛ ani mun na? (Daniyɛli 3:28).

¹⁸ Kabi wagatijan, kerecɛn sɔbɛ caaman sɔnna u k’u don kaso la ani u yɛrɛ y’u niin bila farati la. Mun na do? Sabu u be Jehova kanu ani u sɔnna a ma ko ale lo y’u ka Masaba ye. U tun jijanin lo ka kantigiya kɛ Jehova ye. U be i ko Eburu kanbele saba minw tora kantigiya la fɛɛn bɛɛ Kuntigi Jehova ye. Jehova ye o kanbelew kisi ka bɔ tasuma dibiman na.—Daniyɛli 3:28 kalan.

19. Jehova bena basigi mun lo kan k’a ka jama kiti? An ka ɲi ka mun lo kɛ kabini sisan?

¹⁹ Zaburu sɛbɛbaga Dawuda y’a yira ko a kɔrɔtanin lo an ka to kantigiya la Ala ye. A ko: “Masaba, ele lo ye siyaw kitibaga ye. Ne ka kan ni min ye, o kɛ n ye. I k’o kɛ k’a kɛɲɛ ni ne ka tilenninya, ni n ka ɲumanya [wala kantigiya] ye.” (Zab. 7:9). Dawuda y’a fɔ fana ko: “Ne mara tilennninya ni ɲumanya la.” (Zab. 25:21). An be se ka ɲɛnamaya kɛ cogo fisaman min na, o ye ka to ka kantigiya kɛ Jehova ye, a mana kɛ min o min ye! O la, an bena kɛ ni Zaburu sɛbɛbaga ka miiriya ɲɔgɔn ye. Ale y’a sɛbɛ ko: “Mɔgɔ minw taamacogo ka ɲi [wala minw ye kantigiw ye], n’u be Masaba ka sariya bato, olu dagamunin lo.”—Zab. 119:1.