To k’i ka jigiya barika bonya

1. Jehova ye jigiya juman lo di an ma?

JEHOVA ye ɲɛnamaya banbali jigiya di an ma. O ye jigiya ɲuman ye dɛ! Dɔw ka jigiya ye ka ɲɛnamaya kɛ fɔɔ abada sankolo la ani ka sabaliya sɔrɔ (1 Kor. 15:50, 53). Nka, an fanba ka jigiya ye ka ɲɛnamaya kɛ fɔɔ abada dugukolo kan, kɛnɛya dafanin na ani hɛɛrɛ la (Yir. 21:3, 4). An ka jigiya ye ka ɲɛnamaya kɛ sankolo la wo wala dugukolo kan wo, an b’o jati fɛɛn nafamanba ye.

2. An ka jigiya basiginin be mun lo kan ani mun na an b’o fɔ?

² Bibulu kɔnɔ, “jigiya” kɔrɔ ko “ka koo ɲuman dɔ makɔnɔ.” An be ni jigiya min ye siniɲasigi koo la, an lanin b’a la k’o bena dafa sabu Jehova lo y’o jigiya di an ma (Ɔrɔm. 15:13). An b’a lɔn a ye layidu min ta ani an b’a lɔn fana ko a b’a ka layiduw dafa tuma bɛɛ (Nɔnb. 23:19). An lanin b’a la ko a b’a fɛ ani ko see b’a ye k’a ka layiduw bɛɛ dafa. O la, an b’a miiri ko koo minw bena kɛ wala an b’a fɛ koo minw ka kɛ, an ka jigiya basiginin tɛ o lo kan. A basiginin lo daliluw ni tiɲɛnkow le kan.

3. An bena mun lo lajɛ barokun nin na? (Zaburuw 27:14).

³ An sankolola Faa b’an kanu ani a b’a fɛ an k’an jigi la ale kan (Zaburuw 27:14 kalan). N’an b’an jigi bɛɛ la Jehova kan, an bena se ka kɔrɔbɔliw muɲu ani an bena jagwɛlɛya ni ninsɔndiya sɔrɔ an ka gwɛlɛyaw bɛɛ n’a ta. Barokun nin na, an bena a ye cogo min na an ka jigiya b’an latanga. An ka kɔn k’a filɛ cogo min na an ka jigiya be i ko banamini ani nɛgɛfugulan. O kɔ, an bena a ye an be se k’an ka jigiya sabati cogo min na.

AN KA JIGIYA BE I KO BANAMINI

4. Kɔrɔ juman na an ka jigiya be i ko banamini? (Eburuw 6:19).

⁴ Ciden Pol ye lɛtɛrɛ min ci Eburuw ma, o lɛtɛrɛ kɔnɔ, a ye an ka jigiya suma ni banamini ye (Eburuw 6:19 kalan).b Pol donna kurun kɔnɔ siɲɛ caaman na a ka voyaziw la. O kama, a tun b’a lɔn ko banimini b’a to kurun be lɔ ka ɲa. A ka voyazi dɔ la, fɔɲɔba dɔ wulila. A ye kurunbolilaw ye u ye banamini fili jii kɔnɔ walisa kurun kana taga kabakurubaw gosi ani ka halaki (Kɛw. 27:29, 39-41). I ko banamini b’a to kurun be lɔ ka ɲa cogo min na, an ka jigiya sababu la an magwɛrɛnin be to Jehova la. O la, hali ni gwɛlɛyabaw b’an kan minw be i ko fɔɲɔba, an tɛna tiɲɛn sira bila. Gwɛlɛyaw tuma na, an ka jigiya b’an dɛmɛ an hakili siginin be to sabu an lanin b’a la ko koow bena fisaya. An k’a to an hakili la ko Yezu ye an lasɔmi ko an bena kɔrɔbɔli sɔrɔ (Zan 15:20). O la, Jehova ye layidu ta an ye fɛɛn minw koo la, an ka to ka miiri u la. O bena an dɛmɛ an ka to k’a sago kɛ.

5. Yezu tun be ni jigiya min ye, o y’a dɛmɛ cogo di hali k’a sɔrɔ a tun b’a lɔn ko a bena sa?

⁵ An k’a filɛ jigiya ye Yezu dɛmɛ cogo min na ka to kantigiya la hali k’a sɔrɔ a tun b’a lɔn ko a bena ɲani ka sa. Pantekɔte tile 33nan loon, ciden Piyɛri ye Zaburuw ka kiraya kuma dɔ kofɔ min b’a yira ko Yezu hakili tun siginin lo kosɔbɛ. A fɔra yen ko: “Ne jigi siginin bena lafiɲɛ. Bari e tena ne to lahara [wala kaburu la]. Ne min y’i ka mɔgɔ senuman ye, i ten’a to ne suu be toli. . . . I be ne nisɔn diya kosɔbɛ i ɲakɔrɔ.” (Kɛw. 2:25-28; Zab. 16:8-11). Yezu tun b’a lɔn ko a bena sa. Nka, a jigi tun b’a la kosɔbɛ ko Ala tun bena a kunu ka bɔ saya la ani ko a bena kɛ n’a Faa ye sankolo la kokura.—Eburuw 12:2, 3.

6. Balimacɛ dɔ ye mun lo fɔ jigiya koo la?

⁶ Kerecɛnw be ni jigiya min ye, o ye an balima caaman dɛmɛ ka kɔrɔbɔliw muɲu. An ka balimacɛ kantigi dɔ ka koo lajɛ. A tɔgɔ ko Leonard Chinn ani a be Angletɛri jamana na. Kɛlɛba fɔlɔ wagati la, u y’a don kaso la sabu a banna ka sɔrɔdasiya kɛ. U y’a datugu kasobon dennin dɔ kɔnɔ a kelen n’a kelen kalo fila. O kɔ, u y’a waajibiya ka fanga baaraw kɛ wagati dɔ la. Kɔfɛ, a y’a sɛbɛ ko: “Koo minw ye n’ sɔrɔ, o ye n’ dɛmɛ k’a faamu ko an mako be jigiya la walisa ka muɲuli kɛ. Yezu, cidenw ni kiraw ye ɲɛyirali to an ye ani an be ni Ala ka layidu kuma nafamanw ye Bibulu kɔnɔ. O bɛɛ be jigiya barikaman di an ma siniɲasigi koo la ani ka fanga di an ma walisa an ka se ka muɲuli kɛ.” Leonard fɛ, jigiya tun be i n’a fɔ banamini. An fana be se k’an ka jigiya jati o cogo la.

7. Kɔrɔbɔliw b’an ka jigiya sabati cogo di? (Ɔrɔmukaw 5:3-5; Zaki 1:12).

⁷ N’an ye kɔrɔbɔliw muɲu ani n’an y’a ye Jehova y’an dɛmɛ cogo min na, an b’a faamu ko an koo ka di a ye. O b’an ka jigiya sabati fana (Ɔrɔmukaw 5:3-5; Zaki 1:12 kalan). O b’a to an ka jigiya barika be bonya ka tɛmɛ tuma min na an sɔnna kibaro diiman na. Sutana b’a fɛ an ka gwɛlɛyaw k’an hakili ɲagami. Nka Jehova ka dɛmɛ barika la, an be se k’u kelen kelen bɛɛ muɲu koɲuman.

AN KA JIGIYA BE I KO NƐGƐFUGULAN

8. Kɔrɔ juman na an ka jigiya be i ko nɛgɛfugulan? (1 Tesalonikaw 5:8).

⁸ Bibulu b’a fɔ fana ko an ka jigiya be i ko nɛgɛfugulan (1 Tesalonikaw 5:8 kalan). Sɔrɔdasi be nɛgɛfugulan don k’a kuun latanga walisa a juguw kana a mandimi. An be kɛlɛ min na Alako ta fan fɛ, an ka ɲi k’an hakili latanga Sutana ma. Sutana be tɛmɛ fɛɛn caaman fɛ k’an kɔrɔbɔ ani k’an hakili ɲagami. I ko sɔrɔdasi ka nɛgɛfugulan, an ka jigiya b’an ka miiriya latanga walisa an ka to ka kantigiya kɛ Jehova ye.

9. Mɔgɔ minw tɛ ni jigiya ye, olu be ɲɛnamaya kɛ cogo di?

⁹ An be ni jigiya ye ka ɲɛnamaya kɛ fɔɔ abada minkɛ, o b’an dɛmɛ ka desizɔn ɲumanw ta. An ka jigiya barika be se ka dɔgɔya fɔɔ an b’a daminɛ ka miiri an negelakow dama lo la. O be se k’a to an be ɲinɛ an ka jigiya kɔ, o min ye ka ɲɛnamaya kɛ fɔɔ abada. Kerecɛn minw ye ɲɛnamaya kɛ galen Korɛnti dugu la, an k’u dɔw ka koo lajɛ. Ala ka layidu jɔnjɔn min ye ko suuw bena kunu, u tun lanin t’o la tugun (1 Kor. 15:12). Pol y’a sɛbɛ ko minw lanin t’a la ko suuw bena kunu, olu b’a ɲini k’u negelakow dɔrɔn lo wasa (1 Kor. 15:32). Bi, minw tɛ ni jigiya ye, olu be koo bɛɛ lajɛnnin kɛ k’u negelakow wasa sisan yɛrɛ. Nka, an kɔni lanin be Ala ka layiduw la siniɲasigi koo la. An ka jigiya be i ko nɛgɛfugulan, o min b’an ka miiriyaw latanga. O jigiya b’an dɛmɛ fana an kana miiri an yɛrɛ dama koo la. N’o tɛ, o be se k’an ni Jehova ka jɛnɲɔgɔnya nagasi.—1 Kor. 15:33, 34.

10. An ka jigiya be se k’an tanga miiriya juguw ma cogo di?

¹⁰ An ka jigiya be i ko nɛgɛfugulan ani a be se k’an bali k’a miiri ko an tɛ se k’an koo diya Jehova ye abada. Misali la, dɔw be se k’a miiri ko: “Mɔgɔ minw bena ɲɛnamaya banbali sɔrɔ, n’ tɛna kɛ u cɛma abada sabu n’ man kan n’o ye. N’ tɛna se ka Ala ka sariyaw labato fewu.” A to i hakili la ko Zɔbu dususalobaga jugu Elifazi y’o ɲɔgɔn lo fɔ Zɔbu ye. A ko: “Adamaden be se ka saniya wa? . . . Ala yɛrɛ lanin te a ka mɛlɛkɛw la, sankolo yɛrɛ saniyanin te a ɲana.” (Zɔbu 15:14, 15). O ye ngalonfin yɛrɛ lo ye! Kana ɲinɛ ko Sutana lo b’a fɛ i ka o miiri. A b’a lɔn ko n’i tora ka miiri o cogo la, i ka jigiya bena nagasi. O la, kana la o ngalon kumaw na ani sinsin Jehova ka layiduw kan. Kana sigasiga abada ko Jehova b’a fɛ i ka ɲɛnamaya banbali sɔrɔ ani ko a bena i dɛmɛ k’o laɲinita dafa.—1 Tim. 2:3, 4.

TO K’I KA JIGIYA BARIKA BONYA

11. K’a to an be kɔnɔni kɛra ko Jehova k’a ka layiduw dafa, mun na an ka ɲi ka muɲu?

¹¹ A man nɔgɔ tuma bɛɛ k’an ka jigiya barika bonya. N’a sɔrɔ an kɔrɔtɔnin lo kojugu Ala k’a ka layiduw dafa. Nka, Jehova be yen fɔɔ abada ani a ka wagati jaticogo ni an ta tɛ kelen ye (2 Piyɛri 3:8, 9). A bena a ka layiduw dafa cogo fisaman na. An b’a miiri ko a bena o kɛ wagati min na, n’a sɔrɔ a tɛna o kɛ o wagati lo la. K’a to an be kɔnɔni kɛra ko Jehova k’a ka layiduw dafa, mun lo be se k’an dɛmɛ an ka to k’an ka jigiya barika bonya?—Zaki 5:7, 8.

12. Ka kɛɲɛ ni Eburuw 11:1, 6 ye, jɛɛn juman lo be jigiya ani limaniya cɛ?

¹² An ka jigiya sabatinin bena to, n’an tora k’an magwɛrɛ Jehova la sabu an jigi be min na, ale lo bena o dafa. Walisa ka kɛ ni jigiya ye, an ka ɲi ka la a la ko Jehova be yen ani ko “a b’a yɔrɔ ɲinibagaw wasa.” (Eburuw 11:1, 6 kalan). N’an lanin b’a la bɛrɛbɛrɛ ko Jehova be yen, o bena a to an be la a la ko a bena a ka layiduw bɛɛ dafa. Jɛnɲɔgɔnya min be an ni Jehova cɛ, an k’a filɛ an be se k’o barika bonya cogo tigitigi minw na ani ka to k’an ka jigiya sabati.

13. An be se k’an magwɛrɛ Ala la cogo di?

¹³ Jehova deli ani a ka Kuma kalan. Hali n’an tɛ se ka Jehova ye, an be se k’an magwɛrɛ a la. An be se ka kuma a fɛ delili la ani an lanin b’a la ko a bena an lamɛn (Zer. 29:11, 12). An be se k’a lamɛn an kɛtɔ k’a ka Kuma kalan ani ka miiri a kan. Jehova y’a janto a sagokɛla kantigiw la cogo min na galen, n’an b’o maanaw kalan, an ka jigiya barika bena bonya kosɔbɛ. Fɛɛn o fɛɛn be sɔrɔ Ala ka Kuma kɔnɔ, o sɛbɛra walisa “ka hakili d’an ma, janko an jaa ka gwɛlɛya ani ka muɲu, ka jigi sɔrɔ o barika la.”—Ɔrɔm. 15:4.

14. Jehova ye min kɛ tɔɔw ye, mun na an ka ɲi ka miiri o la?

¹⁴ Jehova y’a ka layiduw dafa cogo min na, miiri o la. An k’a filɛ Jehova ye min kɛ Ibrayima ni Sara ye. U tun kɔrɔnin lo kojugu ani u tun tɛ se ka deen sɔrɔ tugun. Nka, Ala ye layidu ta u ye ko u bena deen sɔrɔ (Zɛnɛzi 18:10). Ibrayima y’o koo ta cogo di? Bibulu b’a fɔ ko: “Mɔgɔ tun te se k’a jigi la fɛɛn min kan, a y’a jigi la o kan. O la, a kɛra siya caaman faa ye.” (Ɔrɔm. 4:18). Hali ni adamadenw fɛ o koo tɛ se ka kɛ, Ibrayima tun lanin b’a la ko Jehova bena a ka layidu dafa. Jehova ma o cɛɛ kantigi jigi tigɛ (Ɔrɔm. 4:19-21). O maana ɲɔgɔnw b’a yira an na ko Jehova b’a ka layiduw dafa tuma bɛɛ, hali n’a b’an ɲɛɛ na ko o tɛ se ka kɛ.

15. Jehova ye min kɛ an ye, mun na an ka ɲi ka miiri o la?

¹⁵ Jehova ye min kɛ i ye, miiri o la. Jehova ka layidu minw kofɔra a ka Kuma kɔnɔ ani u dafara, miiri k’a filɛ u ye ele nafa cogo min na. Misali la, Yezu ye layidu ta ko a Faa bena an makoɲɛfɛnw di an ma (Mat. 6:32, 33). A y’a fɔ fana ko Jehova bena hakili senu di an ma n’an y’o deli a fɛ (Luka 11:13). Jehova y’o layiduw dafa an koo la. A ye layidu wɛrɛ minw dafa i koo la, miiri o la. Misali la, a ye layidu ta ko a bena yafa i ma, ka i dusu saalo ani k’i mako wasa Alako ta fan fɛ (Mat. 6:14; 24:45; 2 Kor. 1:3). A ye min kɛ i ye ka ban, miiri o la. O bena a to i be la a la kosɔbɛ ko a y’a daa di ko a bena min kɛ i ye sini ma, a bena o dafa.

NINSƆNDIYA I KA JIGIYA KOSƆN

16. Mun na jigiya ye fɛɛn nafamanba dɔ ye?

¹⁶ Ɲɛnamaya banbali jigiya ye Jehova ka nilifɛn nafamanba dɔ ye. O jigiya ɲuman bena dafa, siga t’o la. O be i n’a fɔ banamini min b’an dɛmɛ ka lɔ kelen kan. O b’a to an be gwɛlɛyaw ni kɔrɔbɔliw muɲu, hali n’an niin be farati la. O jigiya be i n’a fɔ nɛgɛfugulan, o min b’an ka miiriyaw latanga walisa an ka ban koo jugu ma ani ka koo ɲuman kɛ. An ka jigiya basiginin lo Bibulu kan. O jigiya b’a to an b’an magwɛrɛ kosɔbɛ Ala la ani a b’a yira ko Ala b’an kanu kosɔbɛ. N’an be to k’an ka jigiya barika bonya, o bena an nafa yɛrɛ le!

17. Mun na an ka jigiya b’an ninsɔn diya?

¹⁷ Ciden Pol ye bataki min ci Ɔrɔmukaw ma, a y’u jija ko: “Jigi min b’aw la, aw ka nisɔndiya o kosɔn.” (Ɔrɔm. 12:12). Pol tun be se ka ninsɔndiya sabu a tun lanin b’a la ko n’a tora kantigiya la, a bena ɲɛnamaya kɛ fɔɔ abada sankolo la. An fana be se ka ninsɔndiya an ka jigiya kosɔn sabu an lanin b’a la ko Jehova bena a ka layiduw dafa. Zaburu sɛbɛbaga dɔ y’a fɔ ko: “Mɔgɔ min . . . b’a jigi la Masaba a ka Ala kan, o tigi dagamunin lo. Ale lo ye tiɲɛtigi ye kudayi.”—Zab. 146:5, 6.