Yala i limaniyanin lo wa?

Walisa k’an koo diya Jehova ye, an ka ɲi ka limaniya. Nka Bibulu b’a fɔ ko “lanaya [wala limaniya] tɛ bɛɛ fɛ.” (2 Tes. 3:2, Biblu Ala ta Kuma). Ciden Pol tun be kumana “mɔgɔjugu hakirintanw” lo koo la, o minw tun b’a tɔɔrɔla. Nka a ye min fɔ limaniya koo la, o ɲɛsinna mɔgɔ wɛrɛw ma fana. Dalilu minw b’a yira ka gwɛ ko Danbaga Ala be yen, dɔw b’u ɲɛɛ tugu o kan (Ɔrɔm. 1:20). Dɔ wɛrɛw b’a fɔ ko olu lanin lo fɛɛn dɔ wala mɔgɔ dɔ la min barika ka bon kosɔbɛ. Nka walisa k’an koo diya Jehova ye, o limaniya dama tɛ bɔri kɛ.

An ka ɲi ka la a la ko Jehova be yen ani ko minw limaniyanin lo a la kosɔbɛ, a b’olu duga (Eburuw 11:6). Limaniya ye hakili senu deen faan dɔ ye. Ani walisa ka hakili senu sɔrɔ, an ka ɲi k’a deli Jehova fɛ (Luka 11:9, 10, 13). Fɛɛrɛ jɔnjɔn wɛrɛ min be se k’an dɛmɛ ka hakili senu sɔrɔ, o ye ka Bibulu kalan, o min sɛbɛra hakili senu barika la. O kɔ, an ye min kalan, an be miiri o kan ani k’an jija k’o sira tagama. N’an b’o kɛ, an b’a to Jehova ka hakili senu k’an dɛmɛ k’an ka ɲɛnamaya kɛ cogo dɔ la, min b’a yira ko an be ni limaniya sɔbɛ ye.