Jehova ni Yezu miiricogo ladegi

1-2. An ka ɲi ka Jehova kanu cogo di ani Yezu y’o ɲɛyira an na cogo di?

YEZU y’a yira ka gwɛ ko Musa ka sariya kɔnɔ, cikan nin lo tun kɔrɔtanin lo ka tɛmɛ tɔɔw bɛɛ kan: “I ka Matigi i ka Ala kanu n’i dusu bɛɛ ye, an’i kɔnɔ bɛɛ ye, n’i fanga bɛɛ ye, an’i hakili bɛɛ ye.” (Luka 10:27). O la, an ka ɲi ka Jehova kanu n’an niin bɛɛ ye. Ka Jehova kanu n’an niin bɛɛ ye, o ɲɛsinna an negelakow, an dusukunnakow, ani an fanga ma. O ɲɛsinna an miiricogo fana ma. Tiɲɛn lo ko an tɛ se abada ka Jehova ka miiriya bɛɛ faamu cogo dafanin na. Nka, an be se k’a ka miiriya faamu ka ɲɛ n’an be “Krista ka miiriya” sɛgɛsɛgɛ. Mun na do? Sabu Yezu b’a Faa miiricogo ladegi cogo dafanin la.—1 Kor. 2:16.

² Yezu ye Jehova kanu n’a miiriya bɛɛ ye. Yezu tun b’a lɔn Ala b’a fɛ a ka min kɛ ani a tun cɛsirinin lo k’o kɛ hali n’a tun bena tɔɔrɔ o kosɔn. Komi Yezu tun b’a fɛ n’a dusu bɛɛ ye k’a Faa sago kɛ, a m’a to foyi k’a bali k’o laɲinita dafa.

3. Ciden Piyɛri ye mun lo faamu Yezu koo la ani a y’a kerecɛnɲɔgɔnw jija u ka mun lo kɛ? (1 Piyɛri 4:1).

³ Piyɛri ni ciden tɔɔw ye nɛɛma sɔrɔ ka wagati kɛ ni Yezu ye ani k’a miiricogo faamu. Tuma min na Piyɛri y’a ka lɛtɛrɛ fɔlɔ sɛbɛ hakili senu barika la, a ye kerecɛnw jija u ka Yezu miiricogo ladegi (1 Piyɛri 4:1 kalan). Yɔrɔ min na Piyɛri y’a fɔ ko “aw fana ka kɛ,” gɛrɛkikan na, a ye kumaden dɔ fɔ min ɲɛsinna sɔrɔdasiw ma minw b’u ka kɛlɛkɛminanw ta walisa k’u yɛrɛ labɛn kɛlɛ kama. O la, ni kerecɛnw be Yezu miiricogo ladegi, u mako be fanga min na walisa ka ban kojugukɛ la ani ka see sɔrɔ Sutana ka duniɲa kan, u bena o sɔrɔ.—2 Kor. 10:3-5; Efɛz. 6:12.

4. Barokun nin bena an dɛmɛ cogo di an ka tugu Piyɛri ka ladili kɔ?

⁴ An bena Yezu miiricogo sɛgɛsɛgɛ ani k’a filɛ an be se k’o ladegi cogo min na. O bena an dɛmɛ k’a lɔn 1) an be se ka Jehova miiricogo ladegi cogo min na walisa an ka miiriyaw ka kɛ kelen ye anw ni ɲɔgɔn cɛ. 2) O bena an dɛmɛ fana an k’an majigi ani 3) ka kɛ hakilitigiw ye an kɛtɔ ka Jehova deli ani k’an jigi la a kan.

JEHOVA MIIRICOGO LADEGI

5. Wagati dɔ la, mun lo y’a yira ko Piyɛri miiricogo ani Jehova ta tun tɛ kelen ye?

⁵ An ka koo dɔ lajɛ, o min na Piyɛri miiricogo ma bɛn ni Jehova ta ye. Yezu tun y’a fɔ a ka cidenw ye ko a ka ɲi ka taga Zeruzalɛmu, ko diinan kuntigiw bena a minɛ, k’a tɔɔrɔ ani o kɔ, k’a faga (Mat. 16:21). Piyɛri tun b’a lɔn ko Yezu lo ye Masiya ye, layidu tun tara min koo la ani ko ale lo bena Ala ka jama kisi. O kama, n’a sɔrɔ a gwɛlɛyara a ma ka sɔn a ma ko Jehova bena a to u ka Yezu faga (Mat. 16:16). O la, Piyɛri tagara ni Yezu gɛrɛn na ani k’a fɔ a ye ko: “Matigi, kana kɛ i yɛrɛ ma jugu ye. O tɛna i sɔrɔ.” (Mat. 16:22, NW). Komi Piyɛri miiricogo tun bɛnnin tɛ ni Jehova ta ye o koo la, o la a miiricogo fana ma bɛn ni Yezu ta ye.

6. Yezu y’a yira cogo di ko a miiricogo bɛnnin lo Jehova ta ma?

⁶ Yezu miiricogo tun bɛnnin lo n’a sankolola Faa ta ye koo bɛɛ la. O kama a y’a fɔ Piyɛri ye ko: “E Sutana nin, taga ka bɔ n kɔrɔ. E be ne ka koow cɛnyɔrɔ le ɲinina. I ka miiriya ni Ala ta te kelen ye, i be miiri i n’a fɔ adamaden tɔw.” (Mat. 16:23). N’a sɔrɔ Piyɛri tun be ni ŋaniya ɲuman ye, nka Yezu banna a ka ladili la. Mun na do? Sabu Yezu tun b’a lɔn ko walisa ka Jehova sago kɛ, a tun ka ɲi ka tɔɔrɔ ani ka sa. O la, Piyɛri y’a faamu ko a ka ɲi ka kɛ ni Ala ka miiriya ye. O ye koo kɔrɔtanin ye an fana ka ɲi ka kalan sɔrɔ min na.

7. Kɔfɛ, Piyɛri y’a yira cogo di ko a b’a fɛ a ka miiriya ka bɛn ni Jehova ta ye? (jaa lajɛ).

⁷ Kɔfɛ, Piyɛri y’a yira ko a b’a fɛ a ka miiriya ka bɛn ni Jehova ta ye. Jehova tun ye wagati min latigɛ walisa siya wɛrɛ mɔgɔw ka kɛ a sagokɛlaw ye, o wagati tun sera. A ye Piyɛri ci ko a ka taga Kɔrinɛyi waaju. Siya wɛrɛ mɔgɔ minw kɔnna ka kɛ kerecɛnw ye, Kɔrinɛyi b’u cɛma. Fɔlɔ la, Yahutuw tun tɛ sɔn ka jɛn ni siya wɛrɛ mɔgɔw ye koo si la. O la, Piyɛri tun ka ɲi k’a miiricogo yɛlɛma walisa ka se ka o mɔgɔw waaju. Tuma min na a y’a faamu Ala sagonata ye min ye siya wɛrɛ mɔgɔw koo la, a y’a miiricogo yɛlɛma. O la, tuma min na Kɔrinɛyi ye Piyɛri weele a ka soo, Piyɛri “ma ban ka taga.” (Kɛw. 10:28, 29). A ye Kɔrinɛyi n’a somɔgɔw waaju ani u batizera.—Kɛw. 10:21-23, 34, 35, 44-48.

8. An be se k’a yira cogo di ko an ka miiriya bɛnnin lo ni Jehova ta ye? (1 Piyɛri 3:8).

⁸ Saan caaman o kɔ, ciden Piyɛri y’a kerecɛnɲɔgɔnw jija ko u ka kɛ “ni miiriya kelen ye.” (1 Piyɛri 3:8 kalan). An ye Jehova sagokɛlaw ye minkɛ, an n’an balimaw be se ka kɛ ni miiriya kelen ye, n’an be ni Jehova ka miiriya ye min be sɔrɔ Bibulu kɔnɔ. Misali la, Yezu y’a ka kalandenw jija ko u ka Ala ka Masaya kɛ u ɲɛnako fɔlɔ ye (Mat. 6:33). O la, an ka kafo balima dɔ be se k’a latigɛ k’a seen don kudayi cidenya baara faan dɔ la. Sanni an k’a fɔ an balima ye ko a kana kɛ a yɛrɛ ma jugu ye, an ka ɲi ka jijali kuma fɔ a ye ani k’a dɛmɛ a ka taga ɲɛ.

I YƐRƐ MAJIGI

9-10. Cogo juman na Yezu y’a yira ko an majiginin lo kosɔbɛ?

⁹ Suu min kɔnna Yezu fagatuma ɲɛ, a ye Piyɛri ni ciden tɔɔw kalan fɛɛn kɔrɔtanin dɔ la majigilenya koo la. Dɔɔni ka kɔn o ɲɛ, Yezu ye Piyɛri ni Zan ci k’u ka taga labɛnw kɛ walisa a ka se ka surafana laban kɛ n’u ye ka kɔn a saya ɲɛ. Labɛnw kɛtɔ, siga t’a la ko u ma ɲinɛ ka tasa, jii ani fani ɲini ka bila walisa lonanw seen ka ko yanni u ka dumuni kɛ. Nka, jɔn lo tun bena a yɛrɛ majigi k’o baara kɛ?

¹⁰ Yezu ma sigasiga k’o baara kɛ. A y’a yira o sen fɛ ko a majiginin lo kosɔbɛ. N’a sɔrɔ Yezu ka cidenw kabakoyara k’a ye ko Yezu lo y’o baara kɛ k’a sɔrɔ baaraden dɔ lo tun ka ɲi k’o kɛ. Yezu y’a ka forokiya bɔ ka fani wɛrɛ ta k’a cɛsiri. O kɔ, a ye jii don minan dɔ kɔnɔ ani a y’a daminɛ k’a ka cidenw seen ko (Zan 13:4, 5). Ka se k’a ka ciden 12 nunu bɛɛ seen ko, n’a sɔrɔ o ye wagati ta. A yɛrɛ ye Zuda seen ko, ale min tun bena a janfa. Yezu y’a yɛrɛ majigi k’o baara kɛ. O kɔ, a muɲuna u kɔrɔ ani k’a fɔ u ye ko: “Ne ye koo min kɛ aw ye, aw y’o faamu wa? Aw be ne wele ko karamɔgɔ ani Matigi, o bɛnnin lo, bari ne y’o le ye. Ni ne y’aw seen ko, ne min ye aw ka Matigi ni karamɔgɔ ye, aw fana ka kan ka ɲɔgɔn seen ko ten.”—Zan 13:12-14.

11. Mun lo b’a yira ko Piyɛri ye majigilenya degi? (1 Piyɛri 5:5; jaa lajɛ fana).

¹¹ Piyɛri ye koo caaman faamu Yezu ka majigilenya koo la. Yezu yɛlɛnin kɔ sankolo la, Piyɛri ye kabako kɛ ka cɛɛ dɔ kɛnɛya min tun ye muruku ye kabi a wolotuma (Kɛw. 1:8, 9; 3:2, 6-8). A tɛ bari an na k’a ye ko jama ye o kabako ye minkɛ, u girinna ka Piyɛri lamini (Kɛw. 3:11). Nka, Piyɛri tun t’a ɲinina mɔgɔw ka nɔɔrɔ la ale kan hali k’a sɔrɔ a tun lamɔna yɔrɔ min na, tɔgɔba tun ka di mɔgɔw ye. Piyɛri tun majiginin lo minkɛ, a ye nɔɔrɔ la Jehova ni Yezu lo kan. A ko: “An lara Yezu tɔgɔ la minkɛ, o le y’a to a ye cɛɛ nin kɛnɛya, aw ɲaa be min na, aw b’a lɔn fana ka kɔrɔ.” (Kɛw. 3:12-16). O kɔ, Piyɛri ye lɛtɛrɛ ci kerecɛnw ma walisa u k’a lɔn fɛɛn min kama a kɔrɔtanin lo u k’u yɛrɛ majigi. A ye kumaden dɔ fɔ gɛrɛkikan na min b’a yira ko an ka ɲi ka majigilenya koo jati i n’a fɔ fani donta. Wagati min na Yezu ye fani ta k’a cɛsiri ani k’a cidenw seen ko, Piyɛri ka kumaw b’an hakili jigi o le la.—1 Piyɛri 5:5 kalan.

12. I n’a fɔ Piyɛri, an be se ka majigilenya degi cogo di?

¹² I n’a fɔ Piyɛri, an fana be se ka majigilenya degi. A to i hakili la ko n’an majiginin lo sɔbɛ la, o tɛ ye an ka kumaw dɔrɔn fɛ. Piyɛri ka kumaw b’a yira ko an b’an yɛrɛ ani tɔɔw jati cogo min na, o lo fana b’a yira n’an majiginin lo sɔbɛ la. An be koo ɲuman kɛ tɔɔw ye sabu an be Jehova kanu ani an be mɔgɔw kanu. An t’o kɛ sabu an b’a fɛ u k’an tando. Tɔɔw b’an ka jijaliw kɔrɔsi wo, u t’o kɔrɔsi wo, n’an ninsɔn ka di ka baara kɛ Jehova ye ani k’an balimaw mako ɲɛ, an b’a yira o cogo la le ko an majiginin lo sɔbɛ la.—Mat. 6:1-4.

‘KƐ HAKILITIGI YE’

13. ‘Ka kɛ hakilitigi ye’, o kɔrɔ ye mun ye?

¹³ ‘Ka kɛ hakilitigi ye’, o kɔrɔ ko di? (1 Piyɛri 4:7). Kerecɛn min ye hakilitigi ye, ale b’a seko bɛɛ kɛ ka desizɔn ɲumanw ta minw bɛnnin lo ni Jehova ka miiriya ye. O kerecɛn b’a lɔn ko a ka ɲɛnamaya kɔnɔ, fɛɛn si kɔrɔtanin tɛ ka tɛmɛ ale ni Jehova ka jɛnɲɔgɔnya kan. A b’a seko daan lɔn ani a be sɔn a ma ko ale tɛ koo bɛɛ lɔn. Ka fara o kan, a b’a yira ko a jigi lanin be Jehova Ala kan a kɛtɔ k’a yɛrɛ majigi ani k’a deli tuma o tuma.a

14. Wagati dɔ la, Piyɛri ye mun lo kɛ min y’a yira ko a m’a jigi la Jehova kan?

¹⁴ Suu min kɔnna Yezu saya ɲɛ, a y’a ka kalandenw lasɔmi ko: “Bii suu nin na, aw bɛɛ bena boli ka ne to.” Piyɛri lara a yɛrɛ la kojugu ani a y’a fɔ ko: “Hali ni bɛɛ bolila k’i to, ne kɔni tena boli abada”! O suu kelen nin na, Yezu y’a ka kalanden dɔw ladi ko: “Aw ye to ɲana ka Ala daali.” (Mat. 26:31, 33, 41). Ni Piyɛri tun y’o ladili sira tagama, n’a sɔrɔ a tun bena kɛ ni jagwɛlɛya ye k’a fɔ ko ale ye Yezu ka kalanden dɔ ye. Nka, a ko a tɛ Yezu lɔn. O kɔ, a dusu kasira kosɔbɛ.—Mat. 26:69-75.

15. Suu min kɔnna Yezu saya ɲɛ, a y’a yira cogo di ko a ye hakilitigi ye?

¹⁵ Yezu y’a jigi bɛɛ la Jehova lo kan. Hali n’a tun dafanin lo, a tun be delili kɛ tuma o tuma. O la, Jehova tun be min ɲinina a fɛ, a ye jagwɛlɛya sɔrɔ k’o kɛ (Mat. 26:39, 42, 44; Zan 18:4, 5). Suu min kɔnna Yezu fagatuma ɲɛ, Piyɛri y’a ye ko a ye delili kɛ siɲɛ caaman. Siga t’a la ko Piyɛri ma ɲinɛ o kɔ abada.

16. Piyɛri y’a yira cogo di ko a kɛra hakilitigi ye? (1 Piyɛri 4:7).

¹⁶ Kɔfɛ, Piyɛri tora k’a jigi la Jehova kan kosɔbɛ a kɛtɔ ka delili kɛ. Yezu suu kununin kɔ, a ye Piyɛri ni ciden tɔɔw hakili sigi ko u bena hakili senu sɔrɔ walisa ka se ka kibaro diiman fɔ. Nka yanni o ka kɛ, Yezu y’a ɲini u fɛ k’u ka kɔnɔni kɛ Zeruzalɛmu (Luka 24:49; Kɛw. 1:4, 5). Piyɛri ye mun lo kɛ tuma min na u tun be kɔnɔni kɛra? Ale n’a kerecɛnɲɔgɔnw tun be “Ala daali” tuma bɛɛ (Kɛw. 1:13, 14). Kɔfɛ Piyɛri ka lɛtɛrɛ fɔlɔ kɔnɔ, a y’a kerecɛnɲɔgɔnw jija ko u ka kɛ hakilitigiw ye ani k’u jigi la Jehova kan u kɛtɔ k’a deli (1 Piyɛri 4:7 kalan). Piyɛri y’a jigi la Jehova kan ani a sera k’a balimaw dɛmɛ ani k’u sabati.—Gal. 2:9.

17. An ka setigiya mana kɛ min o min ye, an ka ɲi ka mun lo kɛ tuma bɛɛ? (jaa lajɛ fana).

¹⁷ Walisa ka kɛ hakilitigi ye, an ka ɲi ka Jehova deli tuma o tuma. An ka setigiya mana kɛ min o min ye, an k’a lɔn ko an mako b’a la ka Jehova deli. O la, n’an ka ɲi ka desizɔnbaw ta, an ka Jehova deli walisa a k’an ɲɛminɛ. Ani, an ka la a la ko a b’a lɔn min ka fisa an ma.

18. An be se ka Jehova miiricogo faamu koɲuman cogo di?

¹⁸ An be Jehova tando sabu a y’an dan cogo dɔ la min b’a to an be se k’a ka jogow ladegi (Zɛnɛzi 1:26). Tiɲɛn lo, an tɛ se k’a ladegi cogo dafanin na (Ezayi 55:9). Nka i ko Piyɛri, an be se ka Jehova miiricogo faamu koɲuman. Cogo di do? An kɛtɔ ka Jehova miiricogo ladegi, k’an yɛrɛ majigi, ani ka kɛ mɔgɔ hakilitigiw ye.