K’an magwɛrɛ ɲɔgɔn na, o b’an nafa

1-2. Mun lo kɔrɔtanin lo Jehova ɲɛɛ kɔrɔ ani a b’a fɛ an ka mun lo kɛ?

AN BE mɔgɔ tɔɔw minɛ cogo min na, o kɔrɔtanin lo kosɔbɛ Jehova ɲɛɛ kɔrɔ. Yezu y’a fɔ ko an ka ɲi k’an mɔgɔɲɔgɔn kanu i ko an b’an yɛrɛ kanu cogo min na (Mat. 22:37-39). O kɔrɔ ko hali minw tɛ Jehova batora, an ka ɲi ka olu fana minɛ ni ɲumanya ye. N’an b’o kɛ, an be Jehova Ala lo ladegira ale min “be tile bɔ mɔgɔjuguw ni mɔgɔɲumanw ye, ka sanji di koɲumankɛlaw ni kojugukɛlaw ma.”—Mat. 5:45.

² Jehova be adamadenw bɛɛ kanu. Nga minw be koo ɲuman kɛ, a be olu yɛrɛ lo kanu kosɔbɛ (Zan 14:21). Jehova b’a fɛ an k’ale ladegi. O kama, a b’a ɲini an fɛ an k’an balimaw “kanu kosɔbɛ.” (1 Piyɛri 4:8; Ɔrɔm. 12:10). N’a fɔra ko an k’an balimaw kanu kosɔbɛ, o b’an hakili jigi kanu barikaman min be an n’an somɔgɔ wala an teri sɔbɛ dɔ cɛ.

3. An ka ɲi ka mun lo to an hakili la kanuya koo la?

³ Kanuya be i ko yiri dennin an ka ɲi k’an janto min na walisa a ka bonya. Ciden Pol y’a kerecɛnɲɔgɔnw jija ko: “Ɲɔgɔnkanuya ka barika sɔrɔ aw cɛma.” (Eburuw 13:1). Jehova b’a fɛ an ka to ka ɲɔgɔn kanu. Barokun nin na, an bena a ye fɛɛn min kama an ka ɲi k’an magwɛrɛ kosɔbɛ an kerecɛnɲɔgɔnw na ani an be se ka to k’o kɛ cogo min na.

MUN NA AN KA ƝI K’AN MAGWƐRƐ KOSƆBƐ ƝƆGƆN NA?

4. Ka kɛɲɛ ni Zaburuw 133:1 ye, kelenya min be an n’an balimaw cɛ, cogo juman na an be se ka to k’o jati fɛɛn nafamanba ye? (jaaw lajɛ fana).

⁴ Zaburuw 133:1 kalan. Zaburu sɛbɛbaga y’a fɔ ko ka teriya kɛ ni Jehova kanubagaw ye, “o ka ɲi” ani “o ka di.” An fana sɔnnin b’o ma. Mɔgɔ be se ka yiriba dɔ jati fɛɛn gwansan ye sabu a be tɛmɛ a kɔrɔ loon o loon. O cogo kelen na, kelenya kabakoman min be an n’an balimaw cɛ, n’an ma farati an be se k’o jati fɛɛn gwansan ye. An b’an balimaw ye tuma caaman na, n’a sɔrɔ siɲɛ caaman lɔgɔkun kɔnɔ. An be se ka to k’u koo diya an yɛrɛ ye cogo di? Nafa b’an balima kelen kelen bɛɛ la kafo kɔnɔ ani an mako b’u bɛɛ la. N’an be wagati ta ka miiri o la, an ka kanuya barika bena bonya an balimaw koo la.

5. Kanuya min be an ni an balimaw cɛ, o be se ka mun lo kɛ mɔgɔ wɛrɛw la?

⁵ Mɔgɔ dɔw siɲɛ fɔlɔ ka na an ka lajɛnw na, n’u y’a ye kanuya min be an ni ɲɔgɔn cɛ, o b’u kabakoya kosɔbɛ. O koo dama be se k’a to u b’a faamu ko u ye tiɲɛn sira sɔrɔ. Yezu y’a fɔ ko: “Mɔgɔ bɛɛ ben’a lɔn o seen fɛ ko aw kɛra ne ka kalandenw ye, ni aw be ɲɔgɔn kanu.” (Zan 13:35). An ka Chaithra ka koo lajɛ. A tun be inivɛrisite la ani a tun be bibulukalan kɛra ni Jehova Seerew ye. U y’a weele tile saba lajɛnba dɔ la ani a sɔnna ka taga. Lajɛnba loon fɔlɔ banni kɔ, a y’a fɔ a ka Bibulu kalanfa ye ko: “N’ bangebagaw ma deli k’u bolo meleke n’ na. Nga aw ka lajɛnba loon fɔlɔ dɔrɔn na, mɔgɔ 52 lo y’u bolo meleke n’ na! N’ y’a ye ko Jehova tɛmɛna a ka denbayamɔgɔw fɛ k’a yira n’ na ko a be n’ kanu. Ne fana b’a fɛ ka kɛ o denbayamɔgɔ dɔ ye.” Chaithra tora ka ɲɛtaga kɛ ani a batizera saan 2024 kɔnɔ. Mɔgɔw mana an ka kɛwale ɲumanw ye ani fana k’a ye ko an n’an balimaw be ɲɔgɔn kanu, tuma caaman na o b’a to olu fana b’a ɲini ka Jehova bato.—Mat. 5:16.

6. N’an y’an magwɛrɛ an balimaw na kosɔbɛ, cogo juman na o b’an latanga?

⁶ K’an magwɛrɛ an balimaw na kosɔbɛ, o be se k’an latanga. Pol y’a kerecɛnɲɔgɔnw jija ko: “Aw ka ɲɔgɔn ladi loon o loon . . . janko hakɛ kana mɔgɔ si bila tulogwɛlɛya la.” (Eburuw 3:13). An fari be se ka faga fɔɔ a be gwɛlɛya an ma ka koo ɲuman kɛ. An kerecɛnɲɔgɔn dɔ be se k’o kɔrɔsi ani Jehova be tɛmɛ a fɛ k’an dɛmɛ (Zab. 73:2, 17, 23). Tiɲɛn na, o dɛmɛ ɲɔgɔn be an nafa.

7. Mun na an be se k’a fɔ ko kanuya ni kelenya tɛ taga ka ɲɔgɔn dan? (Kɔlɔsikaw 3:13, 14).

⁷ An be jɛnkulu dɔ kɔnɔ, o min na an bɛɛ be jijalibaw kɛ k’a yira ko an be ɲɔgɔn kanu. O kama, an be duga caaman sɔrɔ (1 Zan 4:11). Misali la, kanuya barika la, an be “ɲɔgɔn dɛmɛdɛmɛ,” ani o b’a to kelenya be kɛ an ni ɲɔgɔn cɛ (Kɔlɔsikaw 3:13, 14 kalan; Efɛz. 4:2-6). O la, an be hɛɛrɛ diyabɔ an ka lajɛnw na. O hɛɛrɛ ɲɔgɔn tɛ jɛnkulu wɛrɛ kɔnɔ duniɲa kuru bɛɛ la.

AN KA TO KA ƝƆGƆN BONYA

8. Jehova b’an dɛmɛ cogo di walisa an n’an balimaw kaan bɛnnin ka to?

⁸ Kelenya min be an ni ɲɔgɔn cɛ duniɲa kuru bɛɛ la, o ye kabako lo ye. An ka dafabaliya bɛɛ n’a ta, Jehova b’a to o kelenya ka kɛ an ni ɲɔgɔn cɛ (1 Kor. 12:25). Bibulu b’a fɔ ko an ‘kalanna Ala fɛ ko an ka ɲɔgɔn kanu.’ (1 Tes. 4:9, Bible senuma). Fɔcogo wɛrɛ la, Jehova ka Kuma barika la, a b’a fɔ an ye an ka ɲi ka min kɛ tigitigi walisa ka se k’an magwɛrɛ kosɔbɛ ɲɔgɔn na. N’an be Ala ka Kuma sɛgɛsɛgɛ koɲuman ani k’a ka sariyaw sira tagama, an b’a yira o cogo la ko an “kalanna Ala fɛ.” (Eburuw 4:12; Zaki 1:25). Jehova Seerew b’u seko bɛɛ kɛra k’o lo kɛ.

9. Ɔrɔmukaw 12:9-13 be mun lo yira an na ɲɔgɔnbonya koo la?

⁹ Ala ka Kuma b’an dɛmɛ cogo di an k’an magwɛrɛ kosɔbɛ ɲɔgɔn na? An k’a filɛ Pol ye min fɔ o koo la Ɔrɔmukaw 12:9-13 kɔnɔ (o vɛrisew kalan, Biblu Ala ta Kuma). A y’a fɔ ko: “A ye kɛ bɛɛ jusu ra ko ale le ka kan ka kɔn ka tɔw bonya.” O kɔrɔ ko di? O kɔrɔ ko an ka ɲi k’a bɔ an yɛrɛ la k’a yira tɔɔw la ko an b’u “kanu kosɛbɛ.” Misali la, an ka ɲi ka yafa u ma, k’an tɛgɛ labila k’u sɔn ani k’u ladon an ka soo (Efɛz. 4:32). Kana kɔnɔni kɛ i balimaw lo ka kɔn ka gwɛrɛ i la. Ele yɛrɛ be se “ka kɔn” ka dɔ kɛ dɔ ye. N’i y’o kɛ, i bena Yezu ka kuma nunu tiɲɛntigiya ye: “Nisɔndiya be mɔgɔ sɔnni na ka tɛmɛ sɔrɔli kan.”—Kɛw. 20:35.

10. Cogo juman na an be se k’an jija “ka tɔw bonya”? (jaa lajɛ fana).

¹⁰ Pol ko anw lo ka ɲi ka kɔn ka tɔɔw bonya. O kɔ dɔrɔn, a y’a fɔ ko: “Aw ye jija, aw kana kɛ salabagatɔw ye.” Mɔgɔ min b’a jija, o tigi kisɛyanin lo ani a be baaraba kɛ. Ni baara dɔ kalifara a ma, a b’a sɔbɛ don k’o kɛ. Talenw 3:27, 28 b’an jija ko: “Ni koɲumankɛ see b’i ye, ni mɔgɔ dɔ mako b’o la, kana ban k’o kɛ a tigi ye.” O la, n’an y’a ye ko mɔgɔ dɔ mako be dɛmɛ na, an b’an seko bɛɛ kɛ ka dɛmɛ lase o tigi ma. An t’o koo bila ka suma wala k’a miiri ko mɔgɔ wɛrɛ bena o kɛ.—1 Zan 3:17, 18.

11. Mun lo be se k’an dɛmɛ an k’an magwɛrɛ kosɔbɛ ɲɔgɔn na?

¹¹ Cogo wɛrɛ min na an be se ka tɔɔw bonya, o ye ka sɔn ka yafa u ma joona joona, n’u donna an gasi la. Efɛzikaw 4:26 b’a fɔ ko: “Aw kana dimi mara fɔɔ ka tilekun don.” Mun na do? Vɛrise 27nan b’a fɔ ko n’an y’o kɛ, an bena “donyɔrɔ di Sutana ma.” Tuma o tuma, Jehova b’a fɔ an ye a ka Kuma kɔnɔ ko an ka yafa ɲɔgɔn ma. Kɔlɔsikaw 3:13 b’an jija ko an ka to “ka yafa ɲɔgɔn ma tuma bɛɛ.” N’an be yafa tɔɔw ma u ka filiw kosɔn, o ye fɛɛrɛ ɲuman dɔ ye walisa k’an magwɛrɛ u la kosɔbɛ. N’an be yafa tɔɔw ma, ‘bɛɛn min be sɔrɔ Nii Senuman fɛ, an bena banba ka to o la hɛrɛ kosɔn.’ (Efɛz. 4:3). K’a fɔ ka surunya, n’an be yafa tɔɔw ma, hɛɛrɛ bena kɛ an ni ɲɔgɔn cɛ ani an ka kelenya bena sabati.

12. Jehova b’an dɛmɛ cogo di an ka se ka yafa tɔɔw ma?

¹² Tiɲɛn lo ko ni tɔɔw donna an gasi la, a be se ka gwɛlɛya ka yafa u ma. Nga an be se k’o kɛ Ala ka hakili senu barika la. Pol ko an ka “ɲɔgɔn kanu kosɛbɛ” ani ko an k’an “jija”. O kɔ, a y’a fɔ ko an “ka banba.” O kɔrɔ ko Ala be se k’a kɛ an be kisɛya kosɔbɛ a ka hakili senu barika la. Ala ka hakili senu be se k’an dɛmɛ ka tɔɔw kanu kosɔbɛ ani ka sɔn yafa u ma. O kama, an ka ɲi k’an kɔnɔ gwɛ ka Jehova deli walisa a k’an dɛmɛ.—Luka 11:13.

“FARALI KANA SƆRƆ AW CƐMA”

13. Mun lo be se ka na ni farali ye an cɛma?

¹³ “Mɔgɔ [sifa] bɛɛ” be sɔrɔ an ka kafow kɔnɔ ani an bɔyɔrɔw tɛ kelen ye (1 Tim. 2:3, 4). O kama, an tɛ desizɔn kelen ta fanidoncogo, kuun dilancogo, furakɛli, ɲɛnagwɛkow wala a ɲɔgɔnnaw na. Nga n’an ma farati, o koow be se ka na ni farali ye an cɛma (Ɔrɔm. 14:4; 1 Kor. 1:10). Ala y’an kalan ko an ka ɲɔgɔn kanu. O kama, an ka ɲi k’an janto an kana a jati ko an ka desizɔnw lo ka fisa ni tɔɔw ta ye.—Filip. 2:3.

14. An ka ɲi ka banba ka mun lo kɛ tuma bɛɛ ani mun na?

¹⁴ An ka ɲi ka banba fana ka tɔɔw jija tuma bɛɛ walisa farali kana kɛ kafo kɔnɔ (1 Tes. 5:11). Mɔgɔ minw sumana Alako ta fan fɛ wala u ye minw bɔ kafo kɔnɔ, kɔsa la u caaman segira ka na. Ani an y’u bisimila ni dusudiya ye! (2 Kor. 2:8). Balimamuso dɔ tun sumana Alako ta fan fɛ saan 10 kɔnɔ. Tuma min na a kɔsegira Masaya Boon kɔnɔ, a kɔrɔsi min kɛra. A y’a fɔ ko: “Bɛɛ nana n’ fo ani ka yɛlɛmisɛnw kɛ.” (Kɛw. 3:19). O ɲumanya walew ye mun lo kɛ an balimamuso la? A y’a fɔ ko: “O y’a to n’ y’a faamu ko Jehova tun be n’ dɛmɛna walisa n’ ka ninsɔndiya sɔrɔ tugun.” N’an be banba ka bɛɛ jija, ‘minw niin tɔɔrɔnin lo, ni sigɛn b’u kan,’ Krista be se ka tɛmɛ an fɛ k’olu dɛmɛ u ka lafiya sɔrɔ.—Mat. 11:28, 29.

15. Cogo wɛrɛ juman na an be se k’a kɛ kelenya be sabati an ni ɲɔgɔn cɛ? (jaa lajɛ fana).

¹⁵ An be se fana k’a kɛ kelenya be sabati an ni ɲɔgɔn cɛ an ka kumaw sababu la. Zɔbu 12:11 b’a fɔ ko: “Tulo be kuma sɛgɛsɛgɛ, i ko nɛɛn be dumuni nɛnɛ cogo min na.” Tobilikɛla ŋana b’a ka dumuni nɛnɛ k’a filɛ n’a ka di, ka sɔrɔ k’a di tɔɔw ma. O cogo kelen na, an fana ka ɲi ka miiri koɲuman ka sɔrɔ ka kuma (Zab. 141:3). An k’an janto tuma bɛɛ ko an ka kumaw bena an lamɛnbagaw jija ani k’u “mako ɲa.”—Efɛz. 4:29.

16. Jɔnw lo ka ɲi k’u janto ka tɔɔw jija u ka kumaw fɛ?

¹⁶ Furucɛw ni bangebagaw yɛrɛ lo ka ɲi k’u janto kosɔbɛ walisa ka tɔɔw jija u ka kumaw fɛ (Kɔlɔs. 3:19, 21; Titi 2:4). Diinan mɔgɔkɔrɔw ye Jehova ka sagakulu kɔrɔsibagaw ye. O kama, olu fana ka ɲi k’u janto walisa ka tɔɔw jija ani k’u dusu saalo (Ezayi 32:1, 2; Gal. 6:1). Bibulu ka talen dɔ b’a fɔ ko: “N’i ka fɔta fɔwaati ɲana, o ka ɲi dɛ!”—Talenw 15:23.

AN KA ƝƆGƆN KANU “TIƝƐ NA N’AN KA KƐWALIW YE”

17. An be se ka mun lo kɛ walisa k’an balimaw kanu sɔbɛ la?

¹⁷ Ciden Zan y’an jija ko “an kan’a fɔ an daa la dɔrɔn ko an tɔɲɔgɔn koo ka di an ye. Nga an k’a yira tiɲɛ na n’an ka kɛwaliw ye.” (1 Zan 3:18). An b’a fɛ k’an balimaw kanu n’an dusu bɛɛ ye. Mun lo bena an dɛmɛ k’o kɛ? N’an tora ka wagati caaman kɛ n’an balimaw ye, an bena an magwɛrɛ ɲɔgɔn na kosɔbɛ ani an ka kanuya barika bena bonya ɲɔgɔn koo la. O la, an ka sababuw ɲini ka wagati kɛ n’an balimaw ye. Misali la, an be se k’o kɛ lajɛnw ni waajuli tuma na. An ka wagati kunmabɔ fana walisa ka taga bɔ tɔɔw ye. N’an b’o kɛ, an b’a yira ko an ‘kalanna Ala fɛ ko an ka ɲɔgɔn kanu.’ (1 Tes. 4:9, Bible senuma). Ani an bena a ye ko “tiɲɛ na, balimaw ka to ɲɔgɔn fɛ, o ka ɲi, o ka di.”—Zab. 133:1.